Hopp til hovedinnhold

Beassášdearvuođat Gonagasbáras

Majestehtaguovttos Gonagas ja Dronnet leaba Kongsseterenis, Voksenkollenis Oslos. Dá leat beassášdearvuođat buohkaide Gonagasbáras.

03.04.2020

 - Moai Gonagasain ovddošetne čiekŋalepmosis buot daid buriid bargguid mat leat dahkkon - dan dehálaš stuora barggu maid guhtege bargá dáid áiggiid miehtá riika, lohká Dronnet Sonja videodearvuođain.

Beassášdearvuođat Gonagasbáras. Govva: Simen Løvberg Sund, Gonagaslaš hoavva

- Jáhkán duođas ahte dás boahtá juoga buorre, joatká Dronnet. - Mii fertet nuppástahttit ollu iežamet eallimis. Fertet ovddos geahččat. Ja fertet gávdnat čovdosiid maid jáhkán boahtit ávkin maiddái de go okte dán heahtedilis beassat eret.

- Muhto moai dihte ahte ollugiin lea váttis dilli. Sihke ekonomalaččat ja eará láhkái, deattuha Gonagas. - Ollugat leat permitterejuvvon. Ollu fitnodatjođiheaddjit ballet massit iežaset fitnodaga. Bargit ballet massit barggu. Ja leat ollugat geat njulgestaga ballet massimis iežaset dearvvašvuođa.

- Dan jáhkán mun maid, joatká Dronnet. - Muhto jáhkán ahte mis ferte leat luohttámuš. Mis ferte leat stuora luohttámuš eiseválddiide ja fertet buoremus lági mielde geahččalit bargat daid rávvagiid mielde maid oažžut, vai beassat nu jođánit go vejolaš eret fas dán váttis dilis. Jáhkán mii nagodit dan hui buori lági mielde. Mii fertet nubbi nuppi veahkehit. Ja fertet geahččalit oaidnit dan mii lea buorre, vaikko lea váttis dilli. Ja bargat stuora áŋgirvuođain. Dasgo dát sáhttá loaktit návccaid ja gierdavašvuođa. Muhto jáhkán mii leat nu dearvvašlaš olbmot ahte mii nagodit dan bures.

- Ovttas mii nagodit. Ovttas našuvdnan ja ovttas máilmmiin muđui, logai Gonagas.

Hui buorit beassážat

Gonagas Harald ja Dronnet Sonja leaba beassážiid Kongsseterenis, Voksenkollenis Oslos, ja háliideaba dáinna videovejolašvuođain sávvat buohkaide hui buriid beassážiid.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas