Hopp til hovedinnhold

Stáhtaguossin Jordanis

Odne sávai Majestehta Gonagas Abdullah II Majestehta Gonagas Haraldii ja Dronnet Sonjai buresboahtima Jordanii. Lea vuosttaš geardi go Gonagasbárra lea stáhtaguossin Gaskanuortan.

02.03.2020

Gonagaslaš Allavuohta Ruvdnaprinsa Hussein bin Abdullah lei maid fárus buresboahtinseremoniijas, mii lágiduvvui olggobealde Al Husseiniya- palássa Ammanis.

Guossástallan čalmmustahttá sihke dan ahte 2019:s leigga Norga ja Jordan doalahan diplomáhtalaš oktavuođaid  50 jagi, ja ahte lea 25 jagi dan rájes Norga ásahii ambassáda Ammanii. Lea maid 20 jagi dan rájes Gonagas Abdullah ja Dronnet Rania leigga stáhtaguossin Norggas.

Olgoriikaministtar Ine Eriksen Søreide ja ealáhusministtar Iselin Nybø čuovvuba Gonagasbára stáhtaguossemátkkis.

Gonagas Harald ja Gonagas Abdullah inspisereba gudnigardena olggobealde Al Husseiniya- palássa. Govva: Heiko Junge, NTB scanpix

Maŋŋil dien allaáiggálaš seremoniija, manne gonagasbárat šlohttii almmolaš skeaŋkkaid addit ja ságastallat. Gonagas Harald lei maid fárus Norgga ja Jordan delegašuvnnaid ságastallamiin. 

Gonagasbárat ja Ruvdnaprinsa Hussein čoahkkanedje ságastallamiidda maŋŋil buresboahtinseremoniija. Govva: Muhammad Hamed, Reuters/NTB scanpix

Okta ságastallanfádda lei dat movt Jordan hui bures vuostáiváldá Syria ja eará dien guovllu riikkaid báhtareddjiid. Jordanis ásset maid ollu palestinalaččat. Norga addá Jordanii humaniteara doarjaga veahkkin dien bargui. Dat lea earenoamážit doarjja oahpahussii, vai ollu báhtareddjiid mánát besset oažžut oahpahusa.

Mearaborramušat beavddis

Norgga ja Jordan gaskasaš gávppašeapmi ii leat beare viiddis, muhto norgga mearaborramušaid vuovdin lea lassánan maŋemus jagiid. Gaskanuorta lea dehálaš guovlu ođđa márkaniid nannemis, ja odne bovdii ealáhusministtar Iselin Nybø sullii 120 guossi lunšii gos guossohedje mearaborramušaid. Doppe besse norgga buvttadeddjiid ovddasteaddjit ja vuovdaleaddjit deaivvadit Jordana importta ovddasteddjiiguin, dállodoallo gávppašeddjiiguin ja hoteallaiguin.

Norgga goahkka Sebastian Myhre lei borramušaid lágidan, ja čađahii maid workshop norgga borramušávdnasiid birra Jordan goahkkastudeanttaide sotnabeaivvi.

Vejolašvuođat ealáhusaide

Veaigin doalai Dronnet Sonja sártni ealáhusseminára rahpamis, mas dutke miellagiddevaš surggiid main Norga ja Jordan vejolaččat sáhttet ovttasbargat.

Dronnet Sonja ságastii earet eará dásseárvvu mearkkašumi birra ealáhussemináras Jordanis. Govva: Tom Hansen, Hansenfoto.no

Norgga delegašuvnnas lea máŋga fitnodaga mielde main lea beroštupmi energiijabuvttadeapmái ja distribušuvdnii. Sii deaivvadedje Jordan ovddasteddjiiguin mat háldit bargat garraseappot ođasmahtti energiijain, guovlluin gos leat earenoamáš buorit eavttut ásahit beaivvášenergiija.

Eará fádda lei borasdávddaid dutkan, gos earet eará Oslo Cancer Cluster ovddasteaddjit digaštalle King Hussein Cancer Foundation ovddasteddjiiguin klinihkalaš dutkamiid ja borasdávdadivššu.

Jordanis leat ollu ovddolaš báikkit gosa geasuhit turisttaid, earet eará dološgávpot Petra ja ollu eará báikkit mat leat UNESCO máilmmiárbelisttus. Ollu norgga mátkefitnodagat ledje fárus odne digaštallat nanu guoddevaš mátkeealáhusa.

Sihke Dronnet Sonjas ja Dronnet Ranias lea beroštupmi dásseárvui ja dasa makkár sadji nissonolbmuin lea servodagas. Govva: Heiko Junge, NTB scanpix

Nissonat bargoeallimis

Sierra oasis semináras geahčadedje dárkileappot nissoniid friddjandahkama ja makkár vejolašvuođat sis leat searvat servodahkii – fáddá mii lea Dronnega váibmoášši. Norgga buresbirgejeaddji stáhta ekonomalaš ovdáneami mearrideaddji eaktun lea leamaš dat ahte sihke nissonolbmot ja dievdoolbmot  servet bargoeallimii, deattuhii Dronnet. - Nissonolbmuid searvan bargoeallimii lea váikkuhan eanet Norgga ekonomiijai go olju- ja gássadietnasat -  oktiibuot.

"Women’s participation in working life has had a greater impact on Norway’s economy than our oil and gas revenues — together." 

Jordan lea čađahan dehálaš nuppástusaid maŋemus jagiid, oažžun dihte eanet nissonolbmuid searvat bargoeallimii, sihke bálkkáid dássemiin ja vealaheami eastademiin.

- Norga doarju dieid doaimmaid, logai Dronnet, ja sávai ahte Norga sáhtášii inspireret ain eanet doaimmaide dakko bokte ahte vásáhusaid juogadit dien suorggis.

"Gender equality is not only a human right. It is also smart economics! Talents are distributed equally among men and women. Therefore, opportunities should be equal, too.

Jordana nissoniin lea alla oahppu, muhto leat dávjá ruovttuin maŋŋil go náitalit. Jordana eiseválddit mihttomearri lea oažžut eanet nissonolbmuid searvat ámmáteallimii.

Loga Dronnega olles sártni

Bankeahta

 Eahkes leaba Gonagas Harald ja Dronnet Sonja Jordana Gonagasbára guossin almmolaš bankeahtas Ammanis. Maiddái Ruvdnaprinsa Hussein lea mállásiin mielde.

Eahkes lágideaba Gonagas Abdullah ja Dronnet Rania bankeahta stáhtagussiide. Govva: Tom Hansen, Hansenfoto.no

 Stáhtaguossástallan joatká ihttin, de leat searvadahttin ja interreligiovdna dehálaš fáttat.

Fáktadieđut

Faktadieđut Hasjemittihkka gonagasriika Jordan birra

Oaivegávpot:Amman
Stuorámus gávpogat:Amman ja Zarqa

Stivrejupmi: Konstitušonála monarkiija
Stáhtaoaivámuš 2020: Gonagas Abdullah II
Sierra stáhta 1946 rájes

Viidodat: 89 329 km² (Norga: 385 203 km²)
Olmmošlohku 2020: sullii 10,8 miljovnna
Almmolaš giella: Arábalašgiella
Ránnjáriikkat: Syria, Irak, Saudi-Arabia, Israel ja palestinalaš guovllut.

Norga ja Jordan ásaheigga diplomáhtalaš oktavuođaid 1969:s, ja Norga rabai ambassáda Ammanii 1994:s. Jordan ásahii ambassáda  Osloi 2017:s.

Norgga ja Jordan gaskavuohta lea buorre. Gonagas Abdullah ja Dronnet Rania leigga Norggas stáhtaguossin jagis 2000, ja Gonagas Abdullah finai Norggas maid 2010:s. 

Lea leamaš unnán ovttasbargu ealáhussuorggis, muhto leat geahčadeamen makkár vejolašvuođat lea ovttasbargagoahtit earet eará ođasmahtti energiija ja turisma surggiin.


Gáldu: OD

Buresboahtinseremoniija Ammanis. Gonagas Abdullah, Dronnet Rania ja Ruvdnaprinsa Hussein sávvet buresboahtima Gonagasbárrii. Govva: Heiko Junge, NTB scanpix

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas