Ari Behn hávdáduvvon

Gonagasbárra, Ruvdnaprinsabárra ja Prinseassa Astrid, Ferner roavva ledje daid eatnat olbmuid searvvis geat ledje čoahkkanan girkui, ovttas  Ari Behn váhnemiiguin ja oappáin ja vieljain. Nu maiddái Prinseassa Märtha Louise ja sudno Ari Behn golbma nieidda: Maud Angelica, Leah Isadora ja Emma Tallulah.

Ruoŧa Gonagaslaš Allavuohta Prinsa Daniel ja Nederlándda Gonagaslaš Allavuohta Prinseassa Laurentien ledje maid hávdádeamis, nu maiddái stáhtaministtar Erna Solberg ja almmolaš Norgga ovddasteaddjit.

Bisma Kari Veiteberg sárdnidii hávdádeamis. Govva: Håkon Mosvold Larsen / NTB scanpix

Bearraša dáhtu mielde lei Oslo duopmogirku rabas buohkaide geat hálidedje čuovvut hávdádeami.

Franz Schubert nuohtta «Ave Maria» álggahii hávdádanipmilbálvalusa

Muitosánit

Ledje Ari Behn buot lagamus olbmot geat dolle muitosártniid. Su váhnemat, oabbá ja viellja ja su boarráseamos nieida, Maud Angelica muittašedje bártni, vielja ja áhči.

Váhnenguovttos Marianne Behn ja Olav Bjørshol, lohkaba muitosániid. Govva: Håkon Mosvold Larsen / NTB scanpix

Maud Angelica muitalii áhči gova birra maid son lei tennjen sutnje juovlaskeaŋkan, ja makkár ovddolaš ja áŋgiris doarjja su áhčči leamaš álo sutnje ja su oappáide, juohke dilálašvuođas ja doaimmas. - Don addet midjiide nu nohkameahttun fámu ja ilu, logai son. - Don addet midjiide dakkár dovddu ahte mii sáhttit nákcet olahit vaikko maid eallimis. - Don ledje álo nu rámis min dihtii. Ja mii leat rámis du dihtii.

Su tennjejuvvon govva lei biddjojuvvon gisttu ala, ja dat lei maid deaddeluvvon prográmmii.

Maud Angelica muitalii váillaheami birra, ja buvttii dán garra muittuhusa buohkaide geat leat váttis dilis: Álo gávdno čoavddus. Vaikko orro ahte ahte ii gávdno. Álo gávdnojit olbmot juostá geat sihke máhttet ja dáhttot veahkehit. Oza veahki. Dat čájeha givrodaga, ii ge headjuvuođa.

Musihkka ja teakstalohkan

Oslo duopmogirku organista Kåre Nordstoga čuojahii Oslo duopmogirku lávlunjoavkku lávluide. Earát geat lávlo ja čuojahedje ipmilbálvalusas lei Sigvart Dagsland, gii lávlluid «Alt eg såg» ja fidjolčuojaheaddji Mari Samuelsen gii čuojahii Ennio Morricone čáppa «Gabriel obo».

Teavsttaid lohke Elisabeth Thorsen, Kåre Conradi ja Dennis Storhøi.

Dennis Storhøi logai 1. korintalaččaid girjjis: Stuorámus lea ráhkisvuohta. Govva: Håkon Mosvold Larsen / NTB scanpix   

Gisttu olggos guottidettiin čuojahuvvui Johann Sebastian Bach«Passacaglia c-mollas». Seremoniija loahpahuvvui bielluid čuojahemiin. Laura Marie Rueslåtten čuojahii Jon Håtuna «Arie for Ari». 

Gisttu guddet girkus olggos Ari áhčči Olav Bjørshol, viellja Espen Bjørshol, máhka Christian Udnæs, Ruvdnaprinsa Haakon, ja neabiguovttos Ask ja Isak. Govva: Vidar Ruud / NTB scanpix

Liekkuslaš doarjagat

Ari Behn sorddii iežas 1. juovlabeaivvi. Dalán go olbmot gulle su jápmima birra, de čájehišgohte ollugat doarjaga dearvuođaid bokte, čuovggaiguin ja liđiiguin. Ari Behn lagamuččat leat giitán buot dien liekkusvuođa ja doarjaga ovddas maid sii leat ožžon dán lossa áiggis. Majestehta Gonagas Harald logai ná iežas sártnis norgga álbmogii ođđabeairuohta:

"Olbmuid mielde morašteapmi ja čuovggat Šloahttašiljus leat liggen. Lea doarjja dain ollu buriin muittuin ja čáppa sániin mat leat gaskkustuvvon min golbma ráhkis mánáidmánáid áhči birra.

Muhtomin lea nu ahte olmmoš ii šat oba oro ge nagodeame eallit. Muhtumiidda sáhttá nu seavdnjat šaddat ahte ii mihkkege šat sáhte veahkehit. Ii buot lagamuččaid  ráhkisvuohta ge. Muhtumat eai oainne eai makkár ge eará geainnu go ahte guođđit eallima. Sii geat báhcet, fertejit joatkit viidáseappot. Geafibun – su haga gean ráhkistedje.

Mii diehtit nu unnán das mii min deaivida boahttevuođas. Diehtemeahttunvuohta dahká min raššin. Buoremus maid sáhttit bargat, lea ahte leahket guhtet guoibmáseamet doarjjan,  oaidnit guhtet guoibmáseame, muitit buriid sániid juogadit earáiguin. Ja guoddit guhtet guoibmáseame go dasa lea dárbu."

Ollugat leat cahkkehan čuovggaid Šloahttašilljui Ari Behn muitun. Govva: Ørn E. Borgen / NTB scanpix

Mental helse ja eará organisašuvnnat mat barget olbmuiguin geat leat heahtedilis, muitalit ahte ollu olbmot leat ohcan sis veahki vuosttaš beivviid maŋŋel Ari Behn jápmima. Ollugiin lea leamaš dárbu soapmásiin hupmat.