Hopp til hovedinnhold

Sámi giellavahkku

Majestehta Gonagas attii Sámedikki bealis Giellalokten bálkkašumi odne. Bálkkašumi juohkin lea oassi Sámi giellavahku čalmmustuhttimis. Dat čalmmustahttojuvvo lágidemiiguin miehtá riika.

24.10.2019

Sámi giellavahku ulbmil lea bajidit sámegielaid árvvu, ja lasihit dieđuid sámegielaid ja sámi kultuvrra birra oppa servodagas.

Gonagas Harald lei álggos Kárášjoga mánáidskuvllas, gos rektor Jan Gunnar Johansen vuostáiválddii su. Sus ledje veahkkin lieđđemánát ja ohppiidráđi ovddasteaddjit.

Máret Isabell Aslaksdatter Skum ja Sáve Májjá Gaup-Johansen attiiga liđiid Gonagas Haraldii go son bođii Kárášjoga vuođđoskuvlii. Govva: June Bjørnback/Ságat

Čájáhusat 

Kárášjoga vuođđoskuvlla oahppit barget ollu sámegielain, ja sii leat ráhkadan sierra čájáhusa Sámi giellavahku oktavuođas.  Ohppiidráđi ovddasteaddjit Jana Linneá Sara Gulsrud ja Mia Cecilie Siri Anti muitaleigga Gonagassii čájáhusa birra.

Soai muitaleigga Gonagassii govaid birra maiguin leat čiŋahan seinniid, main oaidná sihke skuvlla logo, mánuid illustrašuvnnaid ja boazodoalu.

Jana Linneá Sara Gulsrud ja Mia Cecilie Siri Anti leigga Gonagas Harald oahpisteaddjit skuvllas. Govva: Guri Varpe, Gonagaslaš hoavva

Skuvllas vulge sii falástallanhállii gos ledje ollu čájáhusat main sáhttá oaidnit dan mot sámegiella geavahuvvo beaivválaš eallimis - diehtogalbbat, t-báiddit, gávppašanseahkažat ja árbevirolaš atnudiŋggat.

Falástallanhálla guossástallan loahpahuvvui sierra ráppain, maid 8.luohkkálaččat ledje ráhkadan - "Rápmi Kárášjohkii" – mas muitalit buot dan mii lea buorre Kárášjogas.

Gonagas Harald ja sámediggepresideanta Aili Keskitalo geahčadeamen čájáhusaid falástallanhállas. Govva: June Bjørnback/Ságat

Snapchat-konto oaččui Giellabálkkašumi

Ja de lei áigi sirdit beaivvi váldoáššái. Giellalokten bálkkašumi juohkin, maid Sámediggi lea ásahan. Ulbmil lea "gudnijahttit aktevrraid, ealáhusaid dahje servviid mat barget oainnusindahkat sámegiela sihke báikkálaččat ja našuvnnalaččat".

Ánne Márjá Guttorm Graven lei vuosttaš historjjás guhte oaččui dán bálkkašumi, Snapchat-konto Snaepmie ovddas. 

Gonagas ja bálkkašumi vuoiti Ánne Márjá Guttorm Graven ja Sámediggepresideanta Aili Keskitalo. Govva: June Bjørnback/Ságat

Guttorm Graven hálidii ásahit báikki sosiála mediain gos sámegiella oidno ja gullo, ja son lea geavahan ollu friddjaáiggi hálddašit dien konto. Juohkehaš gii áigu čálistit juoidá diehko, galgá čállit sámegillii.

– Snaepmie lea dagahan dan ahte sámegiella lea oidnogoahtán sosiála mediain. Nuorat geat muđui eai beasa gullat dahje gulahallat sámegillii, leat ožžon kanála gos sáhttet dan bargat, dajai sámediggepresideanta Aili Keskitalo.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas