Njuike váldosisdollui

Gonagas rabai Stuoradikki

Odne logai Majestehta Gonagas Truvdnosártni ja nu rabai ge 164. Stuoradikki. Maiddái Majestehta Dronnet ja Gonagaslaš Allavuohta Ruvdnaprinsa leigga fárus dán allaáiggálaš seremoniijas.

02.10.2019

Stuoradikki allaáiggálaš rahpan dáhpáhuvvá juohke jagi golggotmánus. Dat lea okta dain eanemus allaáiggálaš almmolaš seremoniijain mii mis lea Norggas, mas leat fárus sihke Gonagasviessu, ráđđehus, stuoradiggeáirasat ja Alimusriekti.

Gonagas Harald lea olles 56 geardde leamaš mielde Stuoradikki rahpamis, ja odne son logai Truvdnosártni 30. geardde. Truvdnosárdni markere ođđa sešuvnna álggu Stuoradikkis.

Gonagas Harald lohká Truvdnosártni. Govva: Terje Pedersen / NTB scanpix

Stuoradikki rahpan lea okta Gonagasa deháleamos vuođđolágalaš geatnegasvuođain, mii Vuođđolága § 74:s čuodjá ná: "Nu fargga go Stuoradiggi lea vuođđuduvvon, rahpá gonagas,dahje son gean gonagas gohčču dan dahkat, dikki šiehtadallamiid. Dan son dahká sártniin mas dieđiha riika dilálašvuođaid birra ja diliid birra maidda dáhttu láidet Stuoradikki earenoamáš čalmmustumi. Ii makkár ge áššeságastallan galgga dáhpáhuvvat gonagasa lagasvuođas."

Ikte čoahkkanii Stuoradiggi. Čoahkkima vuođđudeamis válljejuvvui stuoradiggepresideanta Tone W. Trøen ja sadjásaš presideanttat Eva Kristin Hansen, Morten Wold, Magne Rommetveit, Nils T. Bjørke ja Abid Q. Raja ođđasis.

Stuoradiggesála 164. Stuoradikki rahpamis. Govva: Ole Berg-Rusten / NTB scanpix

Gonagasbárra láve vieru mielde vuodjit rabas biillain Šloahtas Stuoradiggái, jus lea dálki heive. Doppe sávvá deputašuvdna Gonagasviesu lahtuide buresboahtima. Dan jagi jođihii dien deputašuvnna Hordalanda stuoradiggeáirras Eigil Knutsen. Deputašuvdnajoavku vuostáiváldá Gonagasa ja das leat mielde čieža stuoradiggeáirasa – geat dán jagi ledje Hordalanda áirasat, ja sii čuvvot Gonagasa nu guhká go son lea Stuoradikkis.

Gonagas ja Dronnet boahtiba Stuoradikki 164. rahpamii. Govva: Terje Pedersen / NTB scanpix

Stáhtaministtar Erna Solberg attii Gonagassii Truvdnosártni. Dan lea ráđđehus čállán, ja dat muitala ráđđehusa politihkalaš plánaid boahtte áigodahkii.

Stáhtaráđđi Jøran Kallmyr logai dieđáhusa Riika dilálašvuođa birra. Árbevieru mielde lea Ráđđehusa nuoramus lahttu guhte dien dieđáhusa galgá lohkat, mii sisttisdoallá dieđuid dan birra maid Ráđđehus lea nagodan olahit maŋemus jagis.

 

 

Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas