Prinseassa konfirmerejuvvon

Buot eará guossit ledje čohkkámin Šloahttakapeallas go Prinseassa fáddarat ja lagamus bearaš bohte dohko. Buot Prinseassa fáddarat leat boahtán otná konfirmašuvdnii: Spania Majestehta Gonagas Felipe, Danmárkku Gonagaslaš Allavuohta Ruvdnaprinsa Frederik, Ruoŧa Gonagaslaš Allavuohta Ruvdnaprinseassa Victoria, Prinseassa Märtha Louise ja Prinseassa áhkku, Marit Tjessem. Majestehta Gonagas Harald lea Prinseassa ristáhčči.

Ja de bođii konfirmánta ieš, Prinseassa Ingrid Alexandra, ovttas Oslo bismmain Kari Veiteberg,  Antonio Vivaldi musihkain.

Prinseassa Ingrid Alexandra ja Oslo bisma Kari Veiteberg. Govva: Vidar Ruud / NTB scanpix

Ja de lávlo guossit sálmma "Hearrá lehkos gudnijahttojuvvon".

Seremoniija

Ipmilbálvalusa jođiheigga preses Helga Haugland Byfuglien ja bisma Kari Veiteberg, ja máŋggas lohke teavsttaid, lávlo ja lei maid poesiija ovdanbuktin.

Sámediggepresideanta Aili Keskitalo logai sálmma 21, buot ođđaseamos jorgaleamis, guossit besse dan čuovvut dárogillii prográmmas. Prinseassa Märtha Louise logai 1. korintalaččaid girjjis: «Stuorámus lea ráhkisvuohta».

Sártnistis konfirmántii deattuhii bisma Kari Veiteberg earenoamážit Prinseassa birasberoštumi. Govva: Terje Bendiksby / NTB scanpix

Bisma Veiteberg sártnui njuolga Prinsessii, ja deattuhii earet eará dan man stuora beroštupmi sus lea lundui ja birrasii. Prográmmagirjjis maid buot guossit ožžo geat ledje Šloahttakapeallas, lei gilvvaárka masa Prinseassa Ingrid Alexandra lea čállán dearvuođaid: 

"Go dán gilvvabáhpira bidjá eatnamii, de das áiggi mielde ihtet iešguđetlágan ivdnás geasselieđit. Sávan dat livččii čáppa muitun ja muittuhussan midjiide ahte leat dušše mii geat sáhttit iežamet eatnama suodjalit ja gáhttet. Ingrid"

Maiddái poehta Evelyn Rasmussen Osazuwa ovdanbuktimis lei biras fáddán "Jeg er syk" (“Lean buohcci”).

Prinseassa logai Assisis Fransa rohkosa. Govva: Lise Åserud, NTB scanpix  

Maria Solheim lávllui "Jeg er i Herrens hender" ovdal go Prinseassa Ingrid Alexandra logai Assisis Fransa rohkosa. Gonagas Harald láidii konfirmántta go fáddarat ja vieljat cahkkehedje čuovggaid.

Spania Gonagas Felipe cahkkeha čuovgga. Govva: Lise Åserud / NTB scanpix

Preses ja bisma doalaiga konfirmašuvdnaipmilbálvalusa ovttas.

Prinseassa Ingrid Alexandra konfirmerejuvvo. Govva: Lise Åserud, NTB scanpix

Olggosvázzin Georg Friedrich Händel musihkain.

Govva: Lise Åserud, NTB scanpix

Maŋŋel konfirmašuvdnaipmilbálvalusa bovdejedje almmolaš lunšii Stuora boradansálas, gosa ledje láhčán 159 guossái čohkkánsajiid.