Hopp til hovedinnhold

Tone Vigeland DáiddaStáljas

Odne eahkes lei Majestehta Dronnet Sonja mielde go «Tone Vigeland. Smykker og skulptur» rahppojuvvui Dronnet Sonja DáiddaStáljas. Dan čájáhusas oaidnit Norgga eanemus dovddus čikŋadáiddára dujiid.

20.09.2018

Tone Vigeland lea internašuvnnalaččat dovddus ja dohkkehuvvon njunušdáiddár čikŋadesigna suorggis. Son sirdigođii 90-logus eará dáiddasuorgái - skulptuvrraide. Son liiko áinnas bargat metálla materiálain, ja su bargguin oaidná dávjá dien garra materiálas ráhkaduvvon litna hámit ja iešguđetlágan tekstuvrrat.

Čájáhusas leat čiŋat áigodagas 1956 gitta 1998 rádjái ja skulptuvrrat 1998 rájes otnážii.

Almmolaš rahpan

Dronnet sávai buresboahtima rahpamii eske veaigin. - Lea stuora illun beassat bovdet din dakkár dáiddára universii maid mun – ja oallugat muinna – atnit hui árvvus, dajai Dronnet Sonja gussiide. Guossin ledje bures sajáiduvvan gollečeahpit ja čikŋadáiddárat ja nuorat geat leat oahpu váldimin.

Dronnet Sonja ja Tone Vigeland eahkeda rahpandilálašvuođas. Govva: Lise Åserud, NTB scanpix

Anniken Thue doalai rahpansártni, maŋŋel go Petra Hölscher lei muitalan movt dát čájáhus šattai duohtan, go álggus čájehuvvui oassi das Die Neue Museas Münchenis. Anne Grete Preus loahpahii lávddi prográmma guvttiin lávlagiin maid lei válljen dán dilálašvuhtii.

Čájáhus rahppojuvvo álbmogii ihttin, čakčamánu 21. beaivvi ja lea rabas DáiddaStáljas gitta skábmamánu 25. beaivái 2018.

Pioner

Tone Vigeland dáiddalaš bargoáigodat lea badjel 60 jagi, ja 50-logus šattai son okta pioner Norgga gollečeahppiduoji ođasmahttimis. Son šattai oalle johtilit dovddusin olggobealde dán riikka, danin go geavahii ođđa materiálaid ja rádjenjeaidi hámiid. Son šattai dehálaš oassin Scandinavian Designas, ja lei mielde álggaheamen ođđa áigodaga Norgga ja olles Skandinavia čikŋadujiid design suorggis.


Tone Vigeland lea ieš leamaš mielde ordnemin DáiddaStálja čájáhusa. Govva: Lise Lise Åserud, NTB scanpix

 
Rávisolmmožin lávkii son ođđa dimenšuvdnii, čiŋaid duddjomis skulptuvrraide. Skulptuvrralaš hámit mat čiŋahit čájáhusa plakáhta čájehit čielgasit mii lea vuordimis.

Die Neue Sammlung

Tone Vigeland dáidá leat dat norgga dáiddár gean duojit gávdnojit eanemus museain olgoriikkain.

Dát čájáhus lea ordnejuvvon ovttasbarggus Die Neue Sammlung – The Design Museum  München, gos čájehedje osiid das 2017:s. Majestehta Dronnet lei dan čájáhusa suodjaleaddji, mii navdojuvvui dan jagi buoremus čájáhussan Duiskkas 2017:s Vigeland lea vuosttaš skandinávalaš čikŋadáiddár guhte lea ožžon nu stuora gudni ahte lea beassan lágidit čájáhusa dien hui beakkálmas duiska museas.

Rávisolmmožin molssui Tone Vigeland dáiddasuorggi čiŋain skulptuvrraide. Goappešat surggiid dáidagat ledje mielde dán čájáhusas. Govva: Lise Åserud, NTB scanpix

Dronnet Sonja DáiddaStálja čájáhus lea čielgasit viiddiduvvon go doppe leat maid skulptuvrrat maid leat luoikkahan Našunálamuseas, KODE:s ja priváhta olbmuin. Tone Vigeland lea ieš ordnen dán čájáhusa ovttas Gonagaslaš čoakkáldagaid bargiin Kjartan Hauglid. München čájáhusa lei ordnen ja lágidan Petra Hölscher, gii doalai sártni otná rahpamis.

 


Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas