Njuike váldosisdollui

Dáiddastállja rahppojuvvon

Odne beasai Dronnet almmolaččat rahpat Dronnet Sonja Dáiddastálja – gávcci mánu maŋŋá go Majestehta Gonagas vuorddekeahttá attii sutnje Šloahta stáljaid riegádanbeaiskeaŋkan.

04.07.2017

- Viimmat lea beaivi boahtán!
Nie álggahii Dronnet iežas sártni. Lea leamaš hui hušša gitta rahpanbeaivvi rádjái, ja Dronnet dovddahii ahte son eahpidii nagodit go sii geargat otná rahpanbeaivái – mii lea su 80-jagi beaivi. 

- Lea leamaš hui ollu mii galggai gárvvistuvvot otnážii, ja boađus lea mihá eanet ovddolaš go maid ledjen ipmirdan govahallat ge! Gehččet beare dás birrasis! Ii go din mielas maid leat ovddolaš? Go sáhttá dákkár bohtosa oažžut stáljas?

"Buresboahtin Dronnet Maud máilbmái!
Buresboahtin dán earenoamáš grafihkkačoagganeapmái!
Buresboahtin Oslo ođđa dáiddabáikái – guovdu oaivegávpoga!

Gonagas Harald hirpmástuhtii Dronnega go attii sutnje stálja skeaŋkan. Dan ulbmil lei maid mearriduvvon: Dohko galggai Dronnet Sonja Dáiddastállja ásahuvvot. Ja odne dat lea šaddan duohtan.


Gonagasbárra sávvá gussiide buresboahtima Dronnet Sonja Dáiddastálja rahpamii. Govva: Lise Åserud, NTB Scanpix.

Muhto dán skeaŋkka siste leat eanet skeaŋkkat. Ovdal go Dronnet manai sárdnestullui rahpat lágideami, de ovdanbuvttiiga guokte addi iežaska skeaŋkkaid.

Dronnet Mauda albuma

Govvainstallašuvdna mas leat Dronnet Maud govat- muhtun oasi lea ieš govven ja muhtun govain lea son ieš mielde. Dat lea ráđđehusa skeaŋka Dronnega 80-jagi beaivái. Stáhtaministtar Erna Solberg attii dien skeaŋkka odne, ja beasai ge sávvat Dronnet Mauda fas ruovttoluotta stálljii masa son liikui nu bures, ja maid ieš leamaš mielde hábmemin.


Veaháš installašuvnnas. Juohke "kapihtal" álggahuvvo Dronnet Maud biktasiiguin. Almmuhuvvo Našunálamusea mieđáhusain.

Dronnet Maud lei áŋgir riidet ja viššal govvet – nugo vissásit dálá dronnet maid lea. Installašuvnna lea daidda, arkitektuvra ja design Našunálamusea ráhkadan ovttas Gonagaslaš čoakkáldagaiguin ja Tellart.

Norgga grafihkkarat

Nubbe stuora skeaŋka maid DáiddaStálja guossit besse iluin vásihit, lea stuora gráfalaš govvačoakkáldat mii lea rahpančájáhus.


Olles dat fiinna skeaŋka, namalassii 164 gráfalaš dáidaga, leat čáhkan rahpančájáhussii. Govva: Liv Osmundsen, Gonagaslaš hoavva

Norske Grafikere searvvi stivrajođiheaddji, Magne Vangsnes, attii skeaŋkka "mis buohkain geat ráhkistit deaddelanivnni hája". Giittosin Dronnegii dan barggu ovddas maid son lea dahkan  buorrin obbalaččat norgga dáidagii, ja earenoamážit gráfalaš dáidagii, leat grafihkkarat addán dan dáiddaskeaŋkka. Olles 164 barggu leat das šaddan – viiddis ja máŋggabealat čoakkáldat mas oaidnit eanas gráfalaš teknihkaid ja ovdanbuktinmálliid.

Gonagaslaš stállja

Muhto čájáhussii gullá maid goalmmát, dehálaš oassi, namalassii iešalddis stállja. Dronnet Maud lei mielde hábmemin Gonagaslaš stálja, dalle go dat ođasmahttojuvvui gaskal 1908 ja 1911, Buckingham Palace stáljaid málle mielde. Viessodávvirat su áiggis leat divoduvvon ja heasttaid hiŋgalat, obbalaččat nugo dat ledje dalle, leat maid mielde galleriijas– juohke heastta namain. Dat divohallamat ja ođasmahttimat mat leat čađahuvvon go stállja lea rievdaduvvon dáiddabáikin, leat dahkkon ovttasráđiid Riikkaantikvárain.


Dronnet Maud áiggi vistedávvirat leat dehálaš oassi DáiddaStáljas. Govva: Jan Haug, Gonagaslaš hoavva.

Šloahta oahpisteaddji Nina Høye muitalii stálja historjjá otná rahpandilálašvuođas.

Ávvudeapmi viidáseappot

Fola, fola blakken – maid Nils Bech lávllui - loahpahii DáiddaStálja rahpama, ja guossit sirde Šloahttapárkii gosa ledje borramušbeavddit láhččojuvvo ruonas gieddái. Gesse vuorbbi mii mearridii guđe beavdái guhtege galggai mannat  – juohke vuorbbis maid gesse, lei muhtun čohka namma gos Dronnet lea leamaš su ollu várrečohkkamátkkiin. Okta čohkka guđege beavdái.

Eahkes jotket ávvudeami ustibiiguin ja bearrašiin Bygdø Gonagasgárdimis.

 

 

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas