Hopp til hovedinnhold

Searvva ávvudeapmái

Hálidat go searvat lávlut riegádanbeaivvi lávlaga gonagasbárrii? Majestehtaguovttos Gonagas ja Dronnet deavdiba 80 jagi dán jagi, ja buohkat bovdejuvvojit Šloahttašilljui.

02.05.2017

Gonagas Harald devddii 80 jagi guovvamánus ja Dronnet Sonja deavdá 80 suoidnemánus. Danin lágiduvvo goappašagaide oktasaš ávvudeapmi sudno riegádanbeivviid gaskkas: disdaga 9. beaivvi ja gaskavahku 10. beaivvi miessemánus.  Vuordit gaskal 30 ja 40 guossi Eurohpá gonagasviesuin, lassin Islándda ja Suoma presideantabáraide.

Lávllo riegádanbeailávlaga Gonagasbárrii

Ávvudeapmi álgá Šloahttašiljus miessemánu 9.beaivvi diibmu 17.30. Doppe galgá Majestehta Gonagasa Garde doallat drillčájeheami, ja Soul Children musihkka ja lávlun.  

Guossoheapmi? Krone-is, diehttelas, nu guhká go diet lákcajieŋat bistet!

 

Garden musihkka- ja drilltrohppa doallá čájeheami, ja jođihit Riegádanbeailávlaga ovttas Soul Children. Govven: Espen Bratlie / SamfotoGarden musihkka- ja drilltrohppa doallá čájeheami, ja jođihit Riegádanbeailávlaga ovttas Soul Children. Govven: Espen Bratlie / Samfoto

Diibmu 18.30 boahtá Gonagasbárra Šloahta olggobeallái, fárrolaga iežaska gonagaslaš gussiiguin. Mii bovdet buohkaid geat bohtet Šloahta lusa lávlut hui jitnosit riegádanbeailávlaga Gonagasbárrii.


3.000 mánáidgárdemáná lávlo riegádanbeailávlaga dalle go Gonagas ja Dronnet devddiiga 75 jagir. Govven: Liv Osmundsen, Gonagaslaš hoavva.
 

Neavttár Bjarte Hjelmeland loahpaha lágideami monologa lohkamin Gonagasbárrii.

Eahkes leat gállamállásat Šloahtas. Festii čiŋadan guossit bohtet Šlohttii gaskal  19.00 ja 19.15.

Veahket ávvudeami fuomášuhttit miessemánu 10.beaivvi

Ávvudeapmi boahtá dovdot Oslo gávpogis maiddái miessemánu 10.beaivvi. Dalle bovde ráđđehus Gonagasbára feastamállásiidda Operaviesus gosa bohtet 300 guossi. Šaddá ovddolaš oaidnit go Gonagasbárra oktan gussiiguin mátkkošta ráidun Šloahtas, Karl Johan gáhta mielde Jernbanetorgetii ja das viidáseappot Operavissui.

Majestehta Gonagasa Garden lea njunnošis. Sii maršerejit Šloahtas Opera guvlui diibmu 18.15. Diibmu 18.30 rájes vudjet gonagaslaš guossit sin maŋis, sihke dán riikka ja olgoriikka guossit.


Ráđđehus bovde feastamállásiidda gudnin Gonagasbárrii. Dáhki alde lea sadji 1 000 olbmui, geat hálidit oaidnit go guossit bohtet. Govven: Liv Osmundsen, Gonagaslaš hoavvaRáđđehus bovde feastamállásiidda gudnin Gonagasbárrii. Dáhki alde lea sadji 1 000 olbmui, geat hálidit oaidnit go guossit bohtet. Govven: Liv Osmundsen, Gonagaslaš hoavva

Mátkki vuolde galgá gullot lávlun ja musihkka. Mánáid-ja nuoraidkoara galgá lávlut Universitehta olggobealde, Høybråten skuvlakorpsa galgá čuojahit dakko gokko Kirkegata manná Karl Johan gáhta badjel ja Ullevål skuvlla musihkkakorpsa čuojaha Jernbanetorget báikkis.

Karl Johan gáhtta giddejuvvo buot johtolaga várás gaskal diibmu 17.00 ja 19.00. Dan lea dehálaš muitit jus leat áigumin dien guovllus vánddardit dien áiggi.

Operadáhkki

Gonagaslaš guossit joavdagohtet Operai diibmu 18.40 rájes, Gonagasbárra boahtá buot maŋemus, diibmu 19.00. Doppe sudno vuostáiváldá dán eahkedii bovdejeaddji, stáhtaministtar Erna Solberg. Olggobealde Opera lea dánsun ja musihkka. 1 000 olbmo besset boahtit Opera dáhki ala diibmu 16.00 rájes. Buohkat galget leat boahtán diibmu 17.30 rádjái, ja buohkat galget mannat sihkarvuođa bearráigeahču čađa. Buot dieđuid dien birra gávnnat Facebookas maid Stáhtaministara kantuvra almmuha (geahča leaŋkalisttu).

Maŋŋi eahket, maŋŋel go feastamállásiiguin leat geargan, de lea feastarakeahtaid báhčin olggobealde Opera. Dat dáhpáhuvvá diibmu 22.30.

Honnørbrygga

Dus lea maid vejolašvuohta oainnestit Gonagasbára ja sudno gonagaslaš gussiid árabut dien beaivvi, go sii mannet Gonagasskiipii Norge. Dat dáhpáhuvvá  Honnørbryggas, Ráđđeviesukájás miessemánu 10. beaivvi diibmu11.00. 


Gonagasskiipa Norge doalvu gussiid oanehis -cruise mátkái Oslovuonas. Govven: Ivar Ekseth / NTB ScanpixGonagasskiipa Norge doalvu gussiid oanehis -cruise mátkái Oslovuonas. Govven: Ivar Ekseth / NTB Scanpix

Dánska gonagasskiipa, KS Dannebrog, lea dánska gonagasbearraša orrunsadji ávvudeami oktavuođas, ja dat boahtá leat Akershus kájás.  Ii leat nu dávjá go dien guokte skiippa beassá oaidnit oktanaga ná.

Čuovo TV:s

sáhttet ávvudeami čuovvut TV:s. NRK  sádde goappešat beivviid lágidemiid njuolggosáddagis diibmu 17.20 rájes.

Beassá oaidnit olles ávvudeami Šloahta olggobealde,ja go guossit bohtet gállamállásiidda. Šloahta siste beassat oaidnit go Gonagas ja Dronnet dearvvaheaba gussiid, go vázzet gállamállásiidda ja beavdesártniid Stuora boradansáles.

NRK čuovvu maid go guossit jovdet Operai maŋit beaivvi ja sádde maid deháleamos osiid ráđđehusa feastamállásiin.

 

 

Fáktadieđut

Searvva ávvudeapmái

Gonagasbára 80-jagiid ávvudeapmi boahtá dovdot Oslo gávpogis miessemánu 9. ja 10. beivviid. Dáppe beasat vásihit ávvudeami:

Šloahta olggobealde miessemánu 9. beaivvi diibmu 17.30 
Buohkat bovdejuvvojit Šloahta olggobeallái 17.30.
Doppe galgá Majestehta Gonagasa Garde doallat drillčájeheami, ja  beassat gullat Soul Children musihka ja lávluma.   Diibmu 18.30 boahtiba Gonagas ja Dronnet Šloahttabalkoŋŋii ovttas muhtun sudno gonagaslaš gussiiguin. Searvva lávlut riegádanbeailávlaga Gonagasbárrii!

Honnørbrygga  miessemánu 10. beaivvi  11.00 

Gonagasskiipa Norge doalvu ávvudeddjiid ja sudno gussiid oanehis -cruise mátkái Oslovuonas. Guossit mannet Gonagasskiipii Honnørbryggas, Ráđđeviesu vuolábealde. Dánska guossit bohtet Gonagasskiipas Dannebrog, mii lea Akershus ladni kájás.

Karl Johan gáhta mielde miessemánu 10. beaivvi 18.15

Ráđđehus bovde Gonagasbára ja sudno gonagaslaš gussiid feastamállásiidda Operas. Majestehta Gonagasas Garde láidesta sin Karl Johan gáhta mielde. Sii márserejit Šloahtas Operai diibmu 18.15. Diibmu 18.30 rájes čuvvot dán riikka ja olgoriikkaid gonagaslaš guossit maid dohko.

Operadáhkis miessemánu 10. beaivvi (ferte boahtit maŋemustá 17.30)

Jus áiggut oaidnit go guossit bohtet Operai, de fertet áiggil dohko mannat. 1 000 olbmo besset boahtit Operadáhki ala diibmu 16.00 rájes, ja buohkat galget leat doppe maŋemustá 17.30. Gonagaslaš guossit ollejit Operai 18.40 rájes, Gonagasbárra boahtá maŋemus, diibmu 19.00.

 

Fáktadieđut

Karl Johan giddejuvvo

Karl Johan gáhtta giddejuvvo gaskal diibmu 17.00 ja 19.00. Dan lea dehálaš muitit jus leat áigumin dien guovllus vánddardit dien áiggi.

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas