Hopp til hovedinnhold

Loahpaheapmi Narviikkas

Polena gussiid stáhtaguossástallan loahpahuvvui Håkvik hávdeeatnamis odne. Majestehta Gonagas ja Polena presideantabárra gudnijahtte polskalaš soalddáhiid mat gahčče Norggas nuppi máilmmisoađis.

25.05.2016

Polena ja Norgga suodjalusovttasbargu lea dehálaš oassi stáhtaguossástallamis, ja odne ovdalgaskabeaivvi fitne Majestehta Gonagas Harald ja H. E. Presideanta Andrzej Duda Suodjalusa operatiivvalaš váldobáikkis Reitanis olggobealde Budejju. Dan ossodagas lea ovddasvástádus plánet ja čađahit norgalaš militearadoaimmaid riikka siskkobealde ja olgoriikkain.

Soahti mii lei Narviikkas

Duiska militearaveagat válde Narviikka cuoŋománu 9.beaivvi  1940, iđđes árrat. Ulbmilin lei oažžut Girona ruvkkiid ruovdemálmma iežaset háldui -  maid dáppe dolvo skiippaiguin –  dat lei dárbbalaš resursa duiska vearjoindustriijai. Norgga 6. divišuvdna vulggii soahtái vuostálastit, ja dađistaga sii ožžo veahki brihttalaš mearrasoahteveagas ja Frankriikka ja Polena soahteveagain.

Nazi – Duiska lei váldán Polena vuollásis čakčamánu 1938, ja 5 000 polskalaš eksiilabrigade soalddáha sohte stuora duostilvuođain ovttas brihttalaš, fránskkalaš ja norgalaš soalddáhiiguin Narviikka guovlluin. Miessemánu 28. beaivvi nagodedje lihtolaččat fas oažžut gávpoga háldosis. Dat lei Nazi-Duiska vuosttaš stuora vuoittahallan.

Gudnijahtte soađis gahččan polskalaččaid

Gonagas Harald muittašii polskalaš soalddáhiid doarjaga sártnistis mánnodat eahket:

- Nuppi máilmmisoađi vuolde bohte duostilis polskalaččat midjiide doarjjan ja veahkkin. Miessemánu 1940  searvvai Polena Podhale-brigada ovttas norgalaš brihttalaš ja fránskkalaš soahteveagaiguin dan issoras dramáhtalaš soahtái mii Narviikkas  lei. Guokte polskalaš áhpefievrru vuodjuduvvo dien soađis, ja 97 polskalaš soalddáha gahčče soahtešiljus. Gonagas Haakon VII attii Podhale-brigadii «Den norske snoren», mii lea oalgebáddi mas leat Norgga našuvnnaivnnit, giitun sin soahtedoarjaga ovddas. Mu dieđuid mielde geavaha otná Podhale – brigada ain dien bátti.

Odne eahkes oassálaste Gonagas Harald, Presideanta Duda ja su roavvá Agata Kornhauser-Duda muitoseremoniijas Håkvik hávdeeatnamis Narviikkas. Hávdeeatnamis leat álbmogiid ja našuvnnaid muitomearkkat, gudnin sin doarjagii soađi áiggi. Soađis gahččan polskalaš soalddáhiid monumeantta lusa biddjojuvvo lieđit odne eahkes.

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas