Hopp til hovedinnhold

Stuora ávvudoalut

Máŋga duhát olbmo serve Gonagasbára 25-jagi ávvudeapmái odne. Ávvudeaddjit ieža leigga maid fárus aktivitehtain mat lágiduvvon olggobealde Šloahta.

17.01.2016

Ávvudoalut álge ipmilbálvalusain Šloahttakapeallas.

Ipmilbálvalus Šloahttakapeallas

Danmárkku Majestehta Dronnet Margrethe ja Ruoŧa Majestehtaguovttos Gonagas Carl Gustaf  ja Dronnet Silvia ledje Gonagasbára guossit ávvudoaluin, ja sii ledje maiddái Šloahttakapeallas. Doppe lei diehttelas maid Gonagasbearaš ja almmolaš Norgga ovddasteaddjit.

Norgga girku preses, bisma Helga Haugland Byfuglien doalai ipmilbálvalusa, sus lei veahkkin studeantabáhppa Bjørn Erik Bjerkreim-Bentzen.  Oslo duopmokoara  lávlo  ja trompetista Ole Edvard Antonsen čuojahii. Prinseassa Märtha Louise lei okta  teakstalohkkiin.

Dálveaktivitehtat olggobealde Šloahta

Seammás álggii stuora lágideapmi olggobealde Šloahta, doppe ledje ollu dálveaktivitehtat mánáide ja nuoraide. Gonagasbárra ieš lei sávvan dákkár ávvudoaluid, ja Falástallansearvi searvvai áinnas dien hástalussii. Dohko ledje ráhkaduvvon sihke sabetlahtut, snowboardluohkát ja njuikenluohkát, jiekŋaluohkká ja báiki gos sáhtte sabehiiguin stoahkat. Doppe sáhtii maid geahččalit sabetbáhčima laserbissuin.

Maŋŋá ipmilbálvalusa bođii maiddái Gonagasbearaš Šloahttašilljui – deaivvadan  dihtii muhtun dain duháhiin geat ledje doppe suohtastallamin, ja sii geahččaledje ieža maid muhtun stohkosiid. Majestehta Dronnet bijai sabehiid juolgái ja sihke Dronnet Sonja , Ruvdnaprinsabárra ja Prinseassa Ingrid Alexandra geahččaledje párkka sabetlahtuid.

Ruvdnaprinsabearaš geahččalii sihke jiekŋačierastallama ja laserbissu.

Prinsa OL-dolain

Guovvamánus álgá Nuoraid -OL  Lillehammeris. Odne cahkkehuvvui nuoraidgilvvohallamiid OL - dolla  ja fievrreduvvui Šloahttapárkka čađa.  Lei Prinsa Sverre Magnus gii lei ožžon dan gudni ahte guoddit dola, veahkkin sutnje ledje Bjørn Dæhlie,Tora Berger ja Sajandan Rutthira, gii aitto lea válljejuvvon dán jagaš nuorra “iildsjel”  Falástalliid feasttas Lillehammeris.

Gonagasbárra giittii

Go gonagas deaivvadii preassain, de son geavahii vejolašvuođa giitit Ráđđehusa, Falástallansearvvi ja ollu eará eaktodáhtolaš bargiid ovddolaš lágideami ovddas.

Lávdeshow ja aktivitehtat Universitehta luhtte

Seammás  go Šloahta olggobealde lágiduvvo dálveaktivitehtat, de lei lávdeshow ja stuorašearbma Universitehta luhtte. Doppe dáhpáhuvai ollu, sihke lávddis ja dain ollu lávuin mat ledje dakko birrasii ceggejuvvon. Dieppe sáhtte mánát sihke sárgut ja ráhkadit alcceseaset ruvnnuid – ja sáhtte maiddái bisánit ja guldalit muitalusaid muhtun lávuin. Ovtta seaidnái ledje bidjan gova Šloahta stuora feastasálas, ja buohkat geat hálidedje, sáhtte govvet iežaset " feastasálas".

Ollugat hálidedje čállit dearvuođaid dan stuora ávvugirjái masa olbmot sáhtte čállit lihkkosávaldagaid Gonagasbárrii. Ja poastta iežas ávvupoastakantuvrii lei maid stuora beroštupmi,  gos olbmot sáhtte sáddet dearvuođaid ja oažžut dasa sierra steampila ja poastamearkka mat leat ráhkaduvvon ávvudeapmái. Spikersuppas besse mánát luistet, ja Karl Johan gáhtas ledje borramušbuvrriid.

Feastačájáhus aulas

Veaigin lei ges áigi návddašit nuppi oasi Ráđđehusa skeaŋkkas: Feastačájáhusa  Universitehta aulas. Gonagasbárra ja Ruvdnaprinsabearaš vázze olmmošeatnatvuođa čađa Šloahtas Universitehta aulai, gos stáhtaministtar Erna Solberg sávai sidjiide buresboahtima.

Dat čájehuvvui NRK TV:s eahkes. Ollu norgalaš artisttat ledje mielde ja Espen Beranek Holm lei láidesteaddji ovttas Lena Kristin Ellingseniin.

 

 

Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas