Hopp til hovedinnhold

Lágideamit ávvudanvahkkoloahpa

Sotnabeaivvi ođđajagimánu 17. beaivvi lea 25 jagi dan rájes Majestehtaguovttos Gonagas Harald ja Dronnet Sonja šattaiga Norgga Gonagasbárran. Dás oaidná makkár lágideamit leat ávvudanvahkkoloahpa.

11.01.2016

Ráđđehusa skeaŋka Gonagasbárrii lea stuora lágideapmi Universitehtašiljus Oslos, man čuovvu feastačájáhus Aulas. Šloahttašiljus leat dálvesuohttasat mánáide, maid váldolágideaddji lea Falástallanlihttu.

Danmárkku Majestehta Dronnet Margrethe ja Ruoŧa Majestehtaguovttos Gonagas Carl Gustaf ja Dronnet Silvia leat Gonagasbára guossit ávvudoaluin.

Šloahttašilju ja Universitehtašilju lágideamit leat nuvttá ja buohkaide lea vejolašvuohta dohko boahtit, ja NRK TV čájeha ollu dain dáhpáhusain.

Bearjadaga: Lihkkosávaldagat

Ávvudoalut álget bearjadaga ođđajagimánu 15.beaivvi. De váldiba Gonagas ja Dronnet vuostá ovddasteaddjijoavkkuid Šloahta unna feastasálas. Dat lea almmolaš Norgga ovddasteaddjit geat bohtet sávvat lihku Gonagasbárrii – Ráđđehusa, Stuoradikki ja Sámedikki ovddasteaddjit, Fylkkamánnit ja suohkaniid organisašuvnnat. Diplomáhtalaš korpsa, Girku ja eará eallinoainnuservviid ovddasteaddjit bohtet maid.

Lihkkosávvanprotokolla

Bearjadaga diibmu 15.00 rájes sáhttet sii geat hálidit čállit dearvvuođaid Gonagasbárrii. Sii gat hálidit ja geain lea vejolašvuohta boahtit Šlohttii, sáhttet doppe čállit Lihkkosávvanprotokollii. Boađe Šloahta váldoportii.

Mii áigut maid rahpat lihkkosávvanprotokolla kongehuset.no neahttabáikkis. Dat rahppojuvvo seammás go Šloahta protokolla, ja neahttaprotokolla lea rabas gaskaidjii sotnabeaivvi ođđajagi mánu 17.beaivvi.

Sii geat sáhttet čuovvut doaluid Universitehtašiljus sotnabeaivvi, sáhttát čállit iežaset dearvuođaid stuora lihkkosávvangirjái mii lea doppe.

Ávvusotnabeaivi

Ávvusotnabeaivvi dáhpáhuvvá ollu. Álggos lea ipmilbálvalus diibmu 11.00 ja dálvestoahkamat, ja loahpahuvvo feastačájáhusain Universitehta Aulas. Diibmu 13.00 bávkalit saluhta saluhttabávkalanbáikkiin miehtá riikka. Bávkaluvvojit 21 skuohta gudnin Gonagasbárrii.

Ipmilbálvalus Šloahttakapeallas

Sihke Gonagasbárra, Dronnet Margrethe, Gonagas Carl Gustaf ja Dronnet Silvia čuvvot ipmilbálvalusa Šloahttakapeallas diibmu 11.00. Doppe lea maid buohkat earát gonagasbearrašis ja maiddái Almmolaš Norgga ovddasteaddjit. Ipmilbálvalusa jođiha norgga girku preses, bisma Helga Haugland Byfuglien, ja dat sáddejuvvo NRK 1 TV kanálas.

Dálvedoalut Šloahttašiljus

Diibmu 11.00 rájes gitta diibmu 16.00 rádjái lágiduvvojit ollu doaimmat mánáide ja nuoraide Šloahttašiljus. Doppe lea vejolaš geahččalit sabehiid, snowboard, njuiket sabehiiguin, čierastit jieŋas ja čuoigat ja báhčit laseriin.  Spikersuppas sáhttet mánát geahččalit luistet ja dánset jieŋa alde. Doppe lea vejolaš oažžut luoikkas sabehiid ja snowboard.

Gaskal diibmu 12.45 ja 13.35 boahtá Gonagasbearaš maid Šloahttašilljui oaidnit ja searvat doaimmaide.

OL-dolla: Diibmu 13.35 fievrreduvvo OL- dolla Šloahttašiljus Universitehtašilljui, mii galgá buollit Nuoraid -OL lágideami oktavuođas Lillehammeris.

Gaskal diibmu 13.30 ja 14.00 lágiduvvo jiekŋadánsenshowa Spikersuppas ja 14.30 lea snowboardshow Šloahttašiljus. «Tráhppa measttir» galgá válljejuvvot.

Čuovgacahkkeheapmi

Ávžžuhit olbmuid váldit mielde gintaliid ja cahkkehit daid gudnin ávvudeddjiide ja Gonagas Olavii muitun, diibmu 15.15.

Lágideamit Universitehtašiljus

Universitehtašilju lágidemiid rahpá sátnejođiheaddji Marianne Borgen diibmu 12.30. Erik Solbakken lea jođiheaddji ja láidesta olbmuid dan beaivvi doaluid oktavuođas. Ollu artisttat servet, earet eará Daniel Kvammen, Morgan Sulele ja Thea, gii vuittii Melodi Grand Prix jr.

Mánáide leat doaimmat nugo ruvdnobádji, muitalusbottut, tennjenbádji ja govvaseaidni. Poasttas lea sierra ávvupoastakantuvra doppe, gos sáhttá sáddet poastagoartta mas lea sierra ávvudansteampil, ja doppe leat maid biebmobuvrriid gos sáhttá oastit borramuša.

Aktivitehtalávut ja buvrriid leat rabas gitta diibmu 17.30 rádjái.

Feastačájáhus Aulas

Diibmu 15.40 vázzá Gonagasbearaš Šloahttašiljus Universitehtašilljui ja Aulai, gos stáhtaministtar Erna Solberg vuostáiváldá sin. Feastačájáhus álgá diibmu16.00. Christian Eggen ođđa duodji "Vær hilset"/" Salvete rex et regina" ovdanbuktojuvvo.

Kringkastingsorkester čuojaha ja prográmma jođiheaba Espen Beranek Holm ja Lena Kristin Ellingsen. Artisttat ovddastit iešguđetlágan musihkkasurggiid, ja  sin sáhttá máŋgga láhkái čatnat maŋemus 25 jagi historjái ja servodatovdáneapmái. Fárus leat earet eará Elias Akselsen, Sissel Kyrkjebø, Tuva Syvertsen, Kirsten Bråten Berg, Toralv Maurstad ja Espen Skjønberg.

Feastačájáhus čájehuvvo stuorašearpmas olgun Universitehtašiljus, ja dan sáhttá maid geahččat NRK 1 kanálas seamma eahket.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas