Nobel Ráfibálkkašupmi 2014

Nobellávdegotti jođiheaddji, Thorbjørn Jagland, álggahii seremoniija sárdnestuolus. Son čilgii lávdegotti mearrádusa ahte addit bálkkašumi Satyarthi ja Yousafzai dan ovddas go soai rahčaba mánáid ja nuoraid badjelduolbmama vuostá ja dan ovdii ahte buot mánáin lea riekti oažžut oahpu. Mánát galget beassat vázzit skuvlla, ii sin galgga geavahit ekonomalaš ulbmiliidda.

Kailash Satyarthi

Nobellávdegoddi cealká:
Stuora persovnnalaš roahkkatvuođain lea Kailash Satyarthi, Gandhi árbevieru mielde, jođihan iešguđetlágan vuostálastinakšuvnnaid ja miellačájehemiid, aivve ráfálaš vugiiguin, ja dan láhkái čalmmustahttán dan movt mánáid geavahit roavvát ekonomalaš dinema várás. Son lea maid váikkuhan guovddáš internašuvnnalaš konvenšuvnnaide mat gusket mánáid vuoigatvuođaide.

- Mu áidna mihttomearri eallimis lea ahte buot mánát galget beassat eallit friddjan mánnán, logai Kailash Satyarthi, guhte iežas Nobellogaldallamis muitalii mánáid birra geaid son lea veahkehan luovos fabrihkaid ja ruvkkiid šlávvavuođas – mánát geaid leat veagal váldán kriminalitehta eallimii dahje prostitušuvdnii.
- Manne ehpet boahtán ovdal? Jearai okta sis. Ja das lea minuhtain sáhka, logaiSatyarthi, dasgo geat leat diet mánát? Sii leat min mánát.

Malala Yousafzay

Nobellávdegoddi cealká:
Malala Yousafzay lea, vaikko lea ge ná nuorra, ollu jagiid juo soahtan ovddidit nieiddaid vuoigatvuođaid beassat oažžut oahpu ja lea ieš ovdamearkan dasa ahte maiddái mánát ja nuorat sáhttet váikkuhit dasa ahte buoridit sin iežaset dili. Dán son lea bargan buot váráleamos dilálašvuođain. Son lea su sáŋgáris roahkkadis vuostálastimiid bokte šaddan láidesteaddji jietnan nieiddaid oahppovuoigatvuođa áššis.

Odne ledje Malalas fárus vihtta skihpára – buohkat nieiddat geat maiddái leat šaddan gillát veahkaválddálašvuođa ja illásteami, nugo son ieš maid – ja eai jeagat orrut jávohaga. Malala Yousafzai deattuhii su Nobellogaldallamis ahte son dáhttu leat buot daid miljovnnaid jietna geaid ii oktage gula.

- Dasgo mun in muital iežan historjjá danin go dat lea nu earelágan go buot eará, muhto danin go dat ii leat earalágan.

Malala deattuhii maid man čeavlái son lea go oažžu bálkkašumi ovttas Kailash Satyarthi, "gii lea bargan mánáid vuoigatvuođaiguin duppal nu guhkes áiggi go mun lean eallán" – ja movt soai ovttas sáhttiba duođaštit dan ahte India ja Pakistana olbmot sáhttet ovttasbargat oktasaš mihttomeari guvlui.

Olbmot čuoččahedje ja doško gieđaid goappešat Nobelbálkkašumi vuitiide sudno garra logaldallamiid maŋŋá, ja sudno ávžžuhusaide ahte addit doarjaga ja bargat juoidá máilmmi mánáide buorrin.

Nobelmállásat

Eahkes leat Gonagas Harald ja Dronnet Sonja, Ruvdnaprinsa Haakon ja Ruvdnaprinseassa Mette-Marit fárus árbevirolaš feastamállásiin mat lágiduvvojit Grand Hoteallas gudnin ráfibálkkašumi vuitiide.