Hopp til hovedinnhold

Almmolaš guossástallan Serbias

Odne lea Gonagaslaš Allavuohta Ruvdnaprinsa guossástallanmátkkis Serbias. Ruvdnaprinssa prográmmas leat ollu doaimmat Serbia oaivegávpogis, Beogradas, gos son lea vuosttaš geardde guossin.

06.11.2014

Son álggahii guossástallama Telenor kantuvrrain, gos fitnodaga serbár neahttabáŋku ođđa modula  galggai almmuhuvvot.

Mobiila báŋkobálvalusat

Norgga fitnodagat leat leamaš stuorámus investerejeddjiid searvvis Serbias maŋemus logi jagiid, ja daid gaskkas lea Telenor stuorámus. Odne beasai Ruvdnaprinsa symbolalaččat rahpat sin mobiilabáŋku ođđa doaimma. Dainna ođđa modulain šaddá  Telenor Banka áidna báŋku Serbias gos kunddar sáhttá ásahit kontu nu ahte ii oba dárbbaš ge fitnat báŋkku kantuvrrain. Ulbmil lea ahte dát galggašit leat okta dain doaimmain mii sáhttá ovddidit Serbia ekonomiija boahtteáiggis.

Dearvvahii serbár nuoraid

Maŋŋel rahpama oaččui Ruvdnaprinsa vejolašvuođa dearvvahit serbár nuoraid geat leat čadnon Telenora Youth Forumii ja maiddái norgalaš studeanttaid geat lohket Scandinavia Instituhtas. Ruvdnaprinsa Haakon álggahii ságastallamiin, mas logai ahte Norgga-Serbia ovttasbargu ja fitnodagaid hutkandoaimmat leat dehálaččat, ja dasto ságastallan jorai dan guvlui ahte lei gažaldagas movt studeanttat jáhkket Serbia boahtteáigi šaddat ja makkár hástálusat sin ovddabealde leat dál:

Most of all I look forward to hearing from you guys; what your thoughts are about how Serbia is today. What your hopes and dreams are for the future – both for yourselves and for your country? What are the most pressing issues that you are feeling today and how will you contribute in solving them? Because it is not always about the other people, the people that are not here. It is about you and us here in this room. How can we work together to create a better world for the future.

Muhtumat dain nuorain geat ledje otná čoahkkimis, galget ovddastit Serbia Oslos Telenor Youth Summit lágideamis, mii lea juovlamánu 8. – 11. beivviid.

Maŋŋil Telenor čoahkkimiid, lei Ruvdnaprinsa čoahkkimis 1.várrestáhtaministariin ja olgoriikkaministariin Ivica Dačić , ja dan maŋŋá lei lunša.

Čalmmustahtte olmmošvuoigatvuođaid

Ođđajagimánu 21. beaivvi álggaha Serbia EU – miellahttovuođa šiehtadallamiid. Guovddáš gažaldagat diein ságastallamiin leat čadnon dasa makkár riektastáhta lea, makkár preassafriddjavuohta, vealahemiid vuostálastimat ja unnitlogu čearddaid suodjaleapmi.

Odne beasai Ruvdnaprinsa Haakon doaimmahit olmmošvuoigatvuođaviesu almmolaš rahpama Beogradas. Doppe galget iešguđetlágan serbár olmmošvuoigatvuođaorganisašuvnnat beassat doaibmat. Diet viessu lea okta ollu prošeavttain masa leat ožžon oasseruhtadeami Norggas.

Eará prošeakta lea St. Rocco ođasmahttinbargu Zemun gávpotoasis.

Girkut báldda-bálddalaga

Zemun gávpotoasis leat ollu girkut mat gullet iešguđetlágan oskkolaččaid searvegottiide. Okta dain lea katolihkalaš kapealla St. Rocco. Balkan soađi  vuolde 1990-logus billistedje iešguđetlágan ekstremajoavkkut girku ja dat leamaš dan geažil giddejuvvon ollu jagiid. Odne beasai Ruvdnaprinsa Haakon leat mielde girku allaáiggálaš ođđasisrahpamis, maid Beograda bisma čađaha. Girku lea ollásit divoduvvon ja ovddeštuvvon. 

Dien katolihkalaš kapealla bálddas lea serbár- ortodoksa girku. Maŋŋil St. Rocco ođđasis rahpandilálašvuođa finai Ruvdnaprinsa maiddái dien girkus, gos serbár - ortodoksa báhppa lei su oahpisteaddji.

Maŋŋel guossástallamiid girkuin, lei vejolašvuohta čađahit oanehaš sightseeing tuvrra historjjálaš Beogradas.

Almmolaš mállásat

Odne eahkes lea Ruvdnaprinsa almmolaš mállásiin Norgga ambassadevrra luhtte Beogradas.  Guosselistu speadjalastá man viiddis ovttasbargu lea Norgga ja Serbia gaskkas iešguđetlágan servodatsurggiin.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas