Hopp til hovedinnhold

Norgga-India ovttasbargu

India ja Norgga ovttasbargu ealáhus-ja kultureallimis lei guovddážis stáhtaguossástallama nuppi beaivvi. Majestehtaguovttos Gonagas ja Dronnet čuovuiga  H.E. Presideantta Pranab Mukherjee ja Sharmistha Mukherjee.

14.10.2014

Gonagas Harald ja Presideanta Mukherjee álggaheigga beaivvi dilálašvuođa Ealáhusviesus, NHO konferánssas, man čuvvo badjel čuođi oasseváldi, sihke Norgga ja India gávppálaččaid ovddasteaddjit, ja maiddái min riikkaid eiseválddiid ovddasteaddjit. Konferánssas iske makkár vejolašvuođat livčče nannet ovttasbarggu ealáhusain ja dutkan-ja oahpahussuorggis. Ja Gonagas ja Presideanta beasaiga čuovvut go ollu ovttasbargosoahpamušat vuolláičállojuvvo.

Ealáhusministtar Monica Mæland  ja oahpahusministtar Torbjørn Røe Isaksen doalaiga sáhkavuoru konferánssa rahpandilálašvuođas. Konferánssa lágidedje NHO ja Dutkanráđđi  ovttas NHO India oabbáorganisašuvnnain Confederation of Indian Industry (CII) ja Norway India Chamber of Commerce and Industry (NICCI).

Bálddalas prográmmat

Seammás čuovui Dronnet madam Sharmistha Mukherjee Dáiddaindustriija museai. Doppe beasaiga oaidnit designer Julie Skarland čájáhusa mii rahppojuvvo lávvordaga. Skarland lea ássan Indias maŋemus ovcci jagi, ja dan oaidná ge maid su čájáhusas Paris – New Delhi – Oslo. Das oaidná su kollekšuvnna biktasiid Parisas ja New Delhis, ja Dronnet Sonja ja Sharmistha Mukherjee beasaiga oaidnit biktasiid maid vuođđun lea ođđasis geavaheapmi, fair trade – ja gođđin.

Dáiddaindustriija museas vulge guossástallit viidáseappot Norgga opera ja balleahttavistái, gos oahpisteaddjit čájehedje sidjiide operaviesu. Guossit besse fitnat sihke váldosálas ja maiddái muhtun lanjain gos čájáhusaid duogábealde bargguid doaimmahit, nugo goarrunlanjas ja hárjehallanlanjain. Sii besse maid oaidnit oasi Kammer-Kylián – Last Touch First generálačájáhusas, mii čájehuvvo 2.Lávddis ihttin.

Lunša Akershusas

Ráđđehus bovdii lunšii Akershus Šloahtas odne, gudnin stáhtaguossástallamii. Sihke Gonagas ja Dronnet, Ruvdnaprinsa ja Ruvdnaprinseassa ledje doppe lunššas, gos stáhtaministtar Erna Solberg lei doalloeamit.

Loahpaheapmi Munchmuseas

Guossástallan Munchmuseas Tøyenis lei maŋemus oassi stáhtaguossástallama prográmmas. Presideanta Mukherjee ja madam Mukherjee beasaiga ovttas Gonagasbárain geahččat čájáhusa Gjennom Naturen. Čájáhusas oaidná hui čielgasit man ollu Munch geavahii luonddu iežas dáidagis, ja movt luonddumuitalusat čuvget Muncha govain.

Maiddái kultursuorggis čállojuvvui ovttasbargosoahpamuš gaskal India ja Norgga, mas earet eará boahtá ovdan ahte livččii dáhttu beassat čájehit Edvard Munch dáidaga India álbmogii.


Maŋŋá guossástallama Munch museas, dagaiga Majestehtaguovttos Gonagas ja Dronnet almmolaš earrodearvvuođaid Presideanttain Mukherjee ja Sharmistha Mukherjee.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas