Hopp til hovedinnhold

Gonagasa lusa sierra lágain

Odne ledje Kapellveien mánáidgárddi mánát audienssas Majestehta Gonagasa luhtte. Sis lei mielde sierra láhkaevttohus Gonagas Haraldii. Mánáidlága vuosttaš paragráfas daddjo ahte mis galget leat siivus gieđat.

14.03.2014

Kapellveien mánáidgárddis lea demokratiija ja jienastanriekta leamaš dehálaš fáddán dál go lea Vuođđolága ávvudanjahki. Rávisolbmot ja mánát leat gaskaneaset ságastallan dan birra ahte maid diet mearkkaša, ja sii leat maid čađahan iežaset válgga mánáidgárddis:  Válggas lei sihke jienastanlihtti ja jienastanbáhpirat maid mánát geavahedje go čađahedje suollemas jienasteami mas gažaldahkas lei liegga borramuš vai borramuš maid mánát ieža ráhkadit.

Ságastaladettiin Vuođđolága ja eará lágaid birra – ahte manne mis leat lágat ja gii daid ovddemus ráhkadii – fuomášedje mánát ráhkadišgoahtit iežaset vuođđolága.

Audienssas Gonagasa luhtte

Boahtte disdaga lea stuora Mánáidgárdebeaivi, ja dan oktavuođas besse ge mánát fitnat Gonagasa luhtte. Nu sii bohte ge Šlohttii odne; Emrik, Jessica, Agnes, Lars Kasander, Mari ja Hennie, ovttas jođiheddjiin Berit Kragebøl ja mánáidgárddi pedagogalaš jođiheddjiin Heidi Ruud Brabrand.

Gonagas vuostáiválddii mánáid Ministtarsálas. Doppe besse oaidnit mánáid láhkaárvalusa, ja Gonagas Harald beasai gullat buot paragráfaid ja maid sii leat jurddašan guđege paragráfain.

Šloahta gievkkan guossohii nuorra guossážiidda sáfta ja bulláid.

Mis galget leat «siivus gieđat» ...

Dá lea Kapellveien mánáidgárddi láhkaárvalus:

  1. Mis galget leat "siivus gieđat"
    - Ii galgga doaškalit, čiekčat, hoigat ii ge gáskkestit nuppiid

  2. Mii galgat geavahit "siivus sániid"
    - Ii givssidit, áitit ii ge hárdit nuppiid

  3. Stuora mánát veahkehit smávit mánáid

  4. Buot mánát galget beassat stoahkat juohke beaivvi

  5. Mii galgat ovttas stoahkat

  6. Buot rávisolbmot galget gullat maid mánát lohket

  7. Buot olbmot galget suodjalit min eatnama

  8. Buot mánát galget beassat mánáidgárdái

  9. Buot mánát galget beassat orrut  oadjebas báikkis gos leat duhkorasat

  10. Buot mánát galget váhnemiiddisguin beassat lupmui



Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas