7. Sámedikki allaáiggálaš rahpan

Dievasčoahkkima jođiheaddji láidestii Majestehta Gonagasa ja Gonagaslaš Allavuođa Ruvdnaprinsa dievasčoahkkinsálii, gos Gonagassálmmain álggahedje dikki allaáiggálaš rahpandilálašvuođa.

Marja Helena Fjellheim Mortensson doalai kulturbottoža ja dasto čuovui dievasčoahkkima jođiheaddji Jarle Jonassen buresboahtinsárdni. Dan maŋŋá rabai Gonagas Harald Sámedikki almmolaččat.   

Sámediggi lea dehálaš ovddideaddji min oktasaš servodahkii. Sámediggi lea barggustis bokte váikkuhan dasa ahte sámi kultuvra, giella ja servodateallin leat šaddan gievrrabun ja nannoseabbon, logai Gonagas Harald, gii maid rámidii sámi dáiddáriid ja kulturbargiid daid dehálaš bargguid ovddas maid sii doaimmahit sámi identitehta nannema oktavuođas.

Maŋŋel Gonagasa sártni bukte Norgga Stuoradiggi ja Ruoŧa ja Suoma Sámedikkit iežaset dearvuođaid.

Rahpandilálašvuohta loahpahuvvui Sámisoga lávlagiin.

Sámediggi

Sámediggi lea sápmelaččaid álbmotválljejuvvon ásahus Norggas.7 válgabirrasis válljejuvvojit diggái 39 áirasa juohke njealját jagi.  Lei Gonagas Olav V gii rabai vuosttaš Sámedikki golggotmánu 9.beaivvi 1989. Rahpandilálašvuohta lágiduvvo juohke njealját jagi, ja otná rahpan lei 7. rahpandilálašvuohta.

Sámediggi galgá nannet sápmelaččaid politihkalaš dili ja ovddidit sápmelaččaid beroštumiid Norggas. Dat galgá váikkuhit dasa ahte sápmelaččat ožžon seammadássásaš ja rievttalaš meannudeami Norggas, ja galgá bargat láhčit dilálašvuođaid nu ahte sápmelaččat sáhttet sihkkarastit ja ovddidit iežaset giela, kultuvrra ja servodateallima.

Gonagas Harald rabai Sámediggevistti Kárášjogas almmolaččat skábmamánu 2. beaivvi 2000. Dan visttis doaibmá sápmelaččaid álbmotválljejuvvon diggi ja doppe lea maid Norgga Sámedikki hálddahus.

(Gáldu: Samediggi.no)