Hopp til hovedinnhold

Gonagaslaš guossit Davvi-Norggas

Ruoŧa gonagasbárra, Majestehtaguovttos Gonagas Carl Gustaf  ja Dronnet Silvia, leaba almmolaš guossástallamis Norggas. Majestehtaguovttos Gonagas Harald ja Dronnet Sonja leaba gussiid vuostáiváldit. Guossástallan čađahuvvo ollislaččat Davvi-Norggas.

18.06.2013

Guossástallan bistá guokte beaivvi. Odne leat guossit Harstadas, ja ihttin leat ges Romssas. Gonagaslaš guossit geavahit Gonagasskiippa Norge dán mátkkis, ja odne iđđes lávkejedje ge gonagasbárat gáddái Harstad gávpogis.

Statoil váldoguovlu davvin

Vuosttaš guossástallanbáiki Harstad gávpogis lei Statoil  Davvi-Norgga váldokántuvrrain . Statoil guovlludirektøra Hans Jakob Hegge muitalii oljofitnodaga doaimmaid birra davviguovlluin ja makkár vejolašvuođaid son oaidná dáin guovlluin boahtteáigái. Seniorgeologa Geir Birger Larsen ruoŧa petroleumfitnodagas Lundin Norway muitalii Ruoŧa-Norgga ovttasbarggu birra sokkelis ja makkár vejolašvuođat ruoŧa ealáhusdoaimmaheddjiin leat.

Visjonariijas besse gonagaslaš guossit vásihit golmmadimenšunála «mátki čázevuollái»: Sii besse buokčat geologiijai ja oaidnit movt barget go ohcet resurssaid mearabotnis. Gonagasbárat besse maid video bokte ságastallat Norne-skiippain.  Sii besse gullat dan fatnasa jođiheddjiin ja bargoveagas movt offshore eallin ja bargu lea. 

Newtonlanjas

Stangnes skuvllas fitne gonagaslaš guossit Newtonlanjas. Dat latnja lea hui dehálaš gaskaoapmi dan barggus ahte oččodit eanebuid válljet realfágaid, sii geahččalit lasihit nuoraid dieđu ja beroštumi dieid fágaide. Ulbmil lea movttáskahttit nuoraid váldit dakkár oahpu maid sáhttet geavahit boahttevaš báikkálaš bargosájiin.

Oahppit čájehedje prošeavttaid maiguin leat bargamin. Juohke stašuvnnas besaiga Gonagasbáraguovttos gullat ohppiid barggu birra ja movt sii oaivvildit ahte juste sin bargu lea  áigiguovdil boahttevaš bargoeallimii.

Njunuš nissondáiddárat

Go ledje boradan lunšša Røkenes Gárdimis, gos guossohedje árbevirolaš borramušaid, de sii vulge geahččat feastaspealuidčájáhusa "Pioneer Voices". Davvi-Norgga feastaspealut čalmmustahttet dan go lea 100 jagi dan rájes nissonolbmot ožžo jienastanrievtti, ja sii leat lágidan čájáhusa mas čalmmustahttet njunuš nissondáiddáriid. Dáppe čájehit sihke govvadáidaga, skulptuvrraid ja installašuvnnaid. Harstad iežas avantgardedáiddár Ragnhild Kaarbø (1888 – 1949) lea guovddážis dán čájáhusas, ovttas sámi dáiddáriin Aslaug Juliussen, gii maiddái lea mearkkašahtti dáiddár ja dovddus ruoŧa dáiddár Astrid Svangren.

Váccašeamen

Gávpotváccašemiin loahpahuvvui Harstad guossástallan. Sii vázze Nord-Norge Galleriijas Harstad hámmánii. Ja besse dan mátkkis gullat ja oaidnit ollu kulturovdanbuktimiid, Vox Arctica lávlagiid, Django Reinhardt-stiila swingjazz ja 150 dánsejeaddji.

Eahkes lágida Gonagasbárra vuostáiváldima KS Norge fatnasis, ja dasto joatká guossástallan Romssas ihttin.



Kong Carl Gustaf og Dronning Silvia av Sverige besøker Norge. Første del av besøket fant sted i Harstad (Foto: Christian Lagaard, Det kongelige hoff)

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas