Hopp til hovedinnhold

Máŋggakultuvrralaš nissonbeaivi

- Muhtomin mii fertet leat roahkkadeappot, vai duostat iežamet jiena geavahit. Ja juohke háve šaddat mii eanet ollisin olmmožin, logai Majestehta Dronnet go sus lei sáhkavuorru Folketeateris odne, gos ledje ollu olbmot. Dronnet searvvai IMDI nissonbeaivvi lágideapmái ja nissonolbmuid jienastanlobi ávvudeapmái.

08.03.2013

Lágideapmi lei nissonbeaivvi váste, muhto doalut ledje maid muitun dasa go lea 100 jagi dan rájes nissonolbmot ožžo almmolaš jienastanlobi Norggas. Lei Searvadahttin- ja girjáivuođadirektoráhtta (IMDI) mii lei doaluid lágideaddji. Doaluid váldoparola lei "Geavat jienat". Die lea duppal ávžžuhus, buohkat ávžžuhuvvojit geavahit jienastanrievtti, muhto maiddái diktit iežaset jiena gullot oaivváldallamin, beaivválaš eallimis, vai olaha mieldemearrideami ja dásseárvvu. 

Geavat jienat

- Jiena sáhttá máŋgga láhkai geavahit, logai Dronnet Sonja. Sáhttá ovdamearkkadihte dadjat juoidá váhnenčoahkkimiin, ovddidit dakkár oainnu masa eai soaitte nu bures liikot, bealuštit rašes olbmo – ja maiddái sáhttá jiena geavahit go válggain jienasta.

Juoga dáhpáhuvvá minguin go mii geavahit iežamet jiena: Mii njulgestit čielggi. Mii dovdat nannosit iešvuođa ja jáhkku alccesis nanosmuvvá.  Das lea sáhka min iežaset árvvus. Muhtomin mii fertet faŋaldahttit veaháš guhkkelebbui vai duostat geavahišgoahtit iežamet jiena.

Ja juohke háve dovdat mii ahte mii šaddat eanet ollisin olmmožin.


Ulbmil Searvadahttin- ja girjáivuođadirektoráhta lágidemiin lei oažžut olbmuid searvat ja beroštit das ahte nissonolbmuin galget leat seamma vuoigatvuođat beassat oassálastit servodagas. Buohkat geat hálidedje ávvudit njukčamánu 8.beaivvi besse searvat, muhto earenoamáš buresboahtin ledje sii geain lea sisafárrejeaddji duogáš, ja badjel duhát olbmo ledje boahtán Folketeaterii odne.

Amtmannens Døtre

Dronnet muittii maid sártnistis ovddeš áiggi nissonolbmuid vuoigatvuođaid bealušteaddji, Camilla Collett:

- 160 jagi dás ovdal čálii Camilla Collett románas«Amtmannens Døtre» nissonolbmuid birra geat iešguđetláhkai rahče gávdnat alcceseaset saji servodagas. Son čállá nissonolbmuid birra geat šadde rahčat oažžut servodaga sin dohkkehit ja gullat. «Amtmannens Døtre» romána nissonolbmot guđđe iežaset oadjebas birrasa gos sis ledje ruohttasat – ja vulge ođđa ruovttubáikái gos dovde iežaset amas olmmožin. Jáhkán ollugat mis geat odne leat dasa čoahkkanan dovdat dien dovddu … 

Feastačájáhus

Konferansier Hannah Wozene Kvam jođihii čájáhusa mii sisttisdoalai sihke musihka, mas ledje fárus Queendom ja Navid Rezvani, Francesca Golfetto ja Kari Helene Østby dánssa.  Kulturministtar Hadia Tajik doalai nuppi sártni dán beaivvi, njealji áŋgiris nissonolbmo jietna gullui ságastallama bokte. Evelyn Rasmussen Osazuwa ovdanbuvttii monologa mas muitalii mahkáš muhtun suffájienasteaddji jurdagiid. Nosizwe Baqwa band loahpahii dilálašvuođa.

  

Maŋŋel čájáhusa beasai Dronnet Sonja deaivvadit njeallje sisafárrejeaddji nissonolbmo, ja beasai singuin ságastallat.



Dronnet doallá sártni IMDI lágideamis nissonbeaivvi ja nissonolbmuid jienastanlobi ávvudandilálašvuođas (Govva: Lise Åserud, Scanpix)
Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas