Hopp til hovedinnhold

Lihkku beivviin!

Odne lei Gonagaslaš Allavuohta Ruvdnaprinsa fárus ávvudeamen Sámeálbmot beaivvi ođđa Girkonjárgga skuvllas. Ruvdnaprinsa ságastalai ohppiiguin dan birra man mávssolaš lea leahket dakkárin go olmmoš juo lea.

06.02.2013

-Jáhkán mis buohkain lea seamma dárbu árvvusatnit iežamet ja min identitehta, logai Ruvdnaprinsa Haakon. Ja de lea ge hui dehálaš oahppat dovdat iežamet, geat mii leat ja makkár kultuvrralaš ruohttasat mis leat. De šaddá geahppaseabbon eallit dakkárin go guhtege mis lea, ja soaitit de maid dovdat ahte mis lea eanet árvu. Ja de jáhkán maid šaddat álkibun deaivvadit earáiguin rabas ja buori lági mielde.
Danin lea ge buorre go mis lea dákkár beaivi gos beassat sámi álbmoga ávvudit.

Nuoraid prošeavttat

Maŋŋel rahpama, oaččui Ruvdnaprinsa vejolašvuođa geahčadit muhtun prošeavttaid maiguin skuvlla oahppit barget. Álggos beasai gullat ja oaidnit juoiganprošeavtta, mas ledje fárus 100 oahppi Sandnes, Girkonjárgga ja Bjørnevatn skuvllain, geat juige ja derpe rumbbuid. Ruvdnaprinsa beasai maid deaivvadit ohppiiguin geat barge tennjegiiguin ja bárgiidedje sámi báttiid.

Skuvlašiljus ledje njoarostallamin, doppe čikče spárkkain ja ráhkadedje luonddubálgá. Ruvdnaprinsa beasai maid geahččalit njoarostit suohpaniin, ja son beasai maid máistet liepmabierggu maid oahppit ieža ledje vuoššan.

Sámeálbmot beaivi

Odne leat ollu lágideamit miehtá riikka. Earet eará galgá sámediggepresideanta Egil Olli doallat sáhkavuoru Girkonjárggas ja Sámedikki várrepresideanta Laila Susanne Vars fas Álttás.

Otná beaivi lágiduvvo muitun vuosttaš sámi riikkačoahkkima birra mii lágiduvvui Metodistagirkus Troanddimis 1917:s. Dat lei vuosttaš geardi go sápmelaččat ledje čoahkkanan bargat oktasaš sámi áššiiguin gaskariikkalaččat. Sámeálbmot beaivi lágiduvvui vuosttaš geardde 1993:s.

 

Sámeálbmot beaivi (Govva: Gonagaslaš hoavva)

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas