- Stuora illun beassat leat dáppe davvin

Ovdalgaskabeaivve ollii Gonagasskiipa Norga Buvrovutnii. Kulturskuvlla musihkkajoavku Blåklokka čuojahii go Majestehtaguovttos Gonagas ja Dronnet olliiga gáddái Buvrovuonas.  Dat lea suohkanguovddáš Návvuonas mii lea Romssa davimus suohkan.

Dronnet Sonja ovdanbuvttii iežas dovdduid ja muitogovaid sártnistis:

- Ollu giitu dan liekkus vuostáiváldima ovddas maid moai Gonagasain letne vásihan Buvrovuonas čáppa Návvuonas! Lei hirbmat fiinna vásáhus borjjástit dán vuonas odne vaikko vel ii lean gal buot čábbámus dálki. Dii gal orrubehtet, nugo juo diehtit, báiti, šelges «luondduártnas 70 davvigrádas».

- Lehpet lihkolaččat go orrubehtet ná čáppa báikkis, gos lea nu stuorra kultuvrralaš  searvevuohta, ja gos leat nu buorit vejolašvuođat eallit buori, guoddevaš eallima. Lean hui ilus go beasan leat dáppe davvin.

Hápmanhoavda Jan Inge Karlsen, sátnejođiheaddji Kai Petter Johansen ja politiijameašttir Astrid Nilsen sávve buresboahtima Gonagasbárrii, ja nuoramusat Martine Kaasen (5) ja Ingrid Amalie Olsen-Åsheim (6), geigiiga liđiid. Govva: Ola Vatn, Gonagaslaš hoavva.

Kultuvra ja searvevuohta

Maŋŋel go liđiid ledje geigen ja muđui sávvan buresboahtima, de válddii sátnejođiheaddji Gonagasbára mielde galledit njealljása geat čájehedje árbevirolaš dujiid, álbmotbiktasiid ja čiŋaid, vuollaga ja borramuša mii lea báikkálaččat buvttáduvvon.

Ole Jan Knutsen ja Karen Ellen Inga Eira čájeheigga árbevirolaš sámi dujiid ja dáidaga – olles proseassa ullu kárema rájes čuoldima rádjái.  Golbma nuora ges čájehedje Návvuonabunáda, Návvuonagávtti ja Návvuona čikŋabiktasa, buot Davvi-Romssa musea hálddus. Helt Nord Lokalmat ja Kvænangen mikrobryggeri fálle iešguđetlágan báikkálaš máistovásáhusaid.

Moaddečuođi olbmo ledje čoahkkanan káijai gos viiddis prográmma speadjalastii Návvuona historjjá ja identitehta. Mánáidkoarra Samlingstund lávllui «Venner», ja mánát sávve buresboahtima golmma gillii: dárogillii, kvenagillii ja sámegillii – muittuhussan ahte guovvllus leat «golbma čeardda», mii maiddái boahtá ovdan suohkanmearkkas.

Dronnet Sonja. Govven: Ola Vatn, Gonagaslaš hoavva

Bjørn Kristian Henriksen Báttáris eret, Návvuonas, attii albma álggu lávdeprográmmii heavy metal gitáračuojahemiin. Govva: Ola Vatn, Gonagaslaš hoavva

Soahtemuittut

Dán jagi ávvudit ahte leat gollan 80 jagi dan rájes go beasaimet eret duiskalaččaid fámus ja soahtevásáhusat davvin ledje guovddáš fáddán Dronnet Sonja sártnis. Dronnet deattuhii dehálažžan váldit oahpu vássan áiggi historjjás.

– Dii dáppe Návvuonas massiibehtet measta visot. Duiskalaččat bolde din dáluid ja ruovttuid, ja dii šattaibehtet báhtareaddjin iežadet riikkas. (...) Čieža Návvuotnalačča masse heakkaset. Buohkaide dáppe čuhce dat vihtta ilgadis jagi garrasit.

Dronnet jearai maiddái leat go mii oahppan maidege soađis ja soahtefámu eretbeassamis. Son ieš attii vejolaš vástádusa:

– Soaitit oahppan ahte ráfi ja friddjavuohta mearkkaša visot? Ahte eat sáhte luohttit friddjavuođa bistit álohii, ahte mii baicca beaivválaččat ferte rahčat dan ovdii ahte friddjavuohta bistá.  Ahte fertet várjalit demokratiija ja min árvvuid. Ja ahte dakkár servodat go mis lea, vuolgá das man bures eanetlohku váldá vára, ja ovttasbargá, unnitlogu joavkkuiguin.

Son namuhii maiddái dáruiduhttima dego sevdnjes kapihttalin historjjás, muhto deattuhii Duohtavuođa- ja seanadankommišuvnna barggu:

– Mun sávan ahte dát stuora ja dehálaš bargu sáhttá njulget muhtun boasttuvuođaid mat leat dahkkon, ja ahte mii buohkat sáhttit oahppa das. Ahte mii sáhttit eallit bures fárrolaga, nugo dii dahkabehtet dáppe dán máŋggabealat searvevuođas.

Juoigan ja máinnasteapmi

Prográmmas lei dasto juoigan, teáhter, máinnasteapmi ja jearahallamat sihke nuorain ja boarrásiin.  Prográmmas lei oasáš Kvääniteáhtera čájálmasas "Oaidnemeahttun olbmot" ja dasto musihkka Kulturskuvlla rávesolbmuid koaras Simalango, Marit Karlsenis, Svein-Hugo Sørensenis ja Elida Olsenis.

Prográmma láidesteaddjit leigga Carina Olset ja Frank Jørstad. Govven: Ola Vatn, Gonagaslaš hoavva

Návvuona giellaguovddáža oahppit ovdanbukte kveana "Sääsket" -nammasaš hoahkama mii galggašii baldit eret čuoikkaid. Govva: Liv Anette Luane, Gonagaslaš hoavva

Ovdal go Gonagasbárra fas jorgalii sjaluppain, de beasaiga oaidnit historjjálaš njuohtama ja dán gova namma lea "Gudstjeneste i fangeleir i Nord-Norge" ("Ipmilbálvalus fáŋgaleairras Davvi-Norggas"). Dán lea dáiddár Per Krohg ráhkadan jagis 1942. Guro Isaksen ovdanbuvttii dán. Sátnejođiheaddji Kai Petter Johansen geigii skeaŋkka báikkálaš borramušaiguin ja juhkosiiguin ovdal go dahke earrodearvvuođaid  govdunkáijas.

Vuostáiváldin Gonagasskiippas

Odne distaga lágideaba Gonagas ja Dronnet vuostáiváldima Gonagasskiippas giitosin buot dan ovddas maid leaba vásihan dan guovtti suohkanis maid leaba galledan Romssas. Sullii 50 guossi searvvis leat sii geat leat leamaš mielde dahkamin galledeami Báhccavuonas ja Návvuonas nu fiinna vásáhussan.

Gonagasbárraguovttos giittiiga fiinna beivviid ovddas Romssas, ja Mathis Eira rohttestii sihke Gonagasa ja Dronnet Sonja luđiid.

Gonagasskiipa áŋkorastojuvvon Buvrovuonas. Govva: Ola Vatn, Gonagaslaš hoavva

Dás joatkašuvvá mátki Svalbardii Gonagasakiippain.