Ánsoárvomearkka doaibmanjuolggadusat
Dán Árvomearkka ásahii Gonagas Olav V geassemánu 14. beaivvi 1985. Seamma beaivvi mearridii Majestehta Gonagas doaibmanjuolggadusaid. Dat leat dan maŋŋil rievdaduvvon golmma geardde, 1986:s, 1992:s ja 2006:s.
Doaibmanjuolggadusat mat dál leat fámus, leat dohkkehuvvon geassemánu 27. beaivvi 2006 ja dat čudjet ná:
§ 1
Dát Árvomearka addojuvvu bálkán mearkkašanveara ánssolaš bálvalusaid ovddas maid lea doaimmahan buorrin váhneneatnamii ja olmmošsogaide olgoriikkain, ja sáhttá maid addot olgoriikka boargáriidda geat ásset Norggas.
§ 2
Ráđđejeaddji Monárka Norggas lea dán Árvomearkka Stuorameasttir.
§ 3
Boarraseamos geas lea truvdnui árbenriekti oažžu dán Árvomearkka alimus dási dan beaivvi go son olle válddálašvuođaahkái.
§ 4
Árvomearkaráđđi, mas leat mielde Gonagaslaš Hoava hoavda (Kansler), Gonagaslaš Olgoritdepartemeantta Protokollahoavda (sadjásaš kansler) ja Gonagaslaš Norgga St. Olav Orden árvomearkka Kansellihoavda, buktá árvalusa Árvomearkka Stuorameasttirii, gos evttoha geat ánssášivčče oažžut dákkár gudni.
Árvomearkka addin Fyrstalaš olbmuide, norgalaččaide ja árvomearkka addin earenoamáš áššiin dáhpáhuvvá nu movt Stuorameasttir mearridii.
Jus lea dárbu johtilit mearridit, sáhttá ášši hui earenoamáš dilis ovddiduvvot dan evttohusa vuođul maid kansler ieš okto árvala.
Ovdal cuoŋománu 1. beaivvi juohke jagi ovddida Árvomearkaráđđi jahkeraportta Stuorameasttirii.
Árvomearkaráđđi sáhttá ieš ráhkadit váldonjuolggadusaid mat gusket bargoortnegii ja ovddidit daid Stuorameasttirii dohkkeheapmái.
§ 5
Árvomearkaráđi čoahkkima jođiha kansler, gii lea ráđi jođiheaddji. Árvomearkaráđđi ii leat mearridanválddálaš jus okta miellahttu lea eret.
§ 6
Gonagaslaš Olgoritdepartemeanta doaimmaha Árvomearkka čállingotti.
Kansellias bargá Kansellihoavda ja Árvomearkačálli.
Kansellihoavda ráhkkanahttá áššiid Árvomearkaráđđái, jođiha Árvomearkakansellia, mii lea Árvomearkaráđi ekspedišuvdnakántuvra, ja juohká Stuorameastira ovddas árvomearkadekorašuvnnaid.
Árvomearkačálli veahkeha Árvomearkaráđi ja bargá Árvomearkakansellias.
Dieid bálvváid nammada Stuorameasttir daid árvalusaid vuođul maid Kansler ja sadjásaš kansler ovddideaba.
§ 7
Árvomearkka bálvábargiid nammada Árvomearka ieš ja sin virgeámmáhii gullevaš mearkkat lea dákkárat:
- Árvomearkaráđi fásta miellahtut: Kommandørruossa
- Kansellihoavda: Kommandørruossa
- Árvomearkačálli: Riddárruossa
- Maŋŋá go sii leat heaitán ráđis, sáhttet Árvomearkka bálvábargit ain guoddit dieid namahuvvon mearkkaid.
§ 8
Árvomearkkas leat golbma dási:
- Stuoraruossa
- Kommandøra, mii lea guovtti luohkkái juogaduvvon:
- Kommandøra mas lea násti
- Kommandøra
- Riddár, mii lea guovtti luohkkái juogaduvvon:
- 1.luohká Riddár
- Riddár
§ 9
Dát árvomearkkat leat ná hábmejuvvon:
Gollehuvvon dahje silba Olavruossa mas lea eaŋkilis ruvdna guđege ruossasárggi geažis, ja dan siste lea rukses ruossa mas leat seamma guhkkosaš sárggit ja Gonagas Olav V ruvdnejuvvon monográmma vel guovdu.
Árvomearkkaid sturrodat ja hábmen galgá leat daid tevnnegiid mielde maid Stuorameasttir lea dohkkehan. Árvomearkka galgá guoddit sevdnjesalit báttis dahje sløyfas.
Stuoraruossa:
Gollehuvvon gávccesárggát násti masa lea darvvihuvvon 1. luohká riddárruossa guovdu. Nástti galgá guoddit gurutbealde rattis.
10 cm govdosaš sevdnjesalit oalgebáddi, man čulbmii lea darvvihuvvon kommandørruossa nugo dat lea čilgejuvvon dás vuolábealde. Nissonolbmuide galgá geavahit seakkit árvomearkabátti, mii lea seamma govddu go dievdduid kommandørmearkkas. Dát báddi galgá mannat olgeš oalggis gurut alemii.
Kommandøra mas lea násti:
Silba gávccesárggát násti mas lea 1. luohká riddárruossa guovdu. Nástti galgá guoddit gurutbeade rattis. Gollehuvvon kommandørruossa 6 cm govddu árvomearkabáttis, maid dievddut galget guoddit čeabehis.
Nissonolbmot guddet kommandørruossa riddárruossabátti sløyfas gurutbealde rattis. Uniforpma alde galget nissonolbmot guoddit kommandørruossa seammaládje go dievddut.
Kommandøra:
Gollehuvvon kommandørruossa 6 cm govddu árvomearkabáttis, maid dievddut guddet čeabehis ja nissonolbmuin galgá mearka leat riddárruossa sløyfas gurutbealde rattis.
Nissonolbmot guddet kommandørruossa riddárruossabátti sløyfas gurutbealde rattis. Uniforpma alde galgá kommandørruossa leat seammaládje nissonolbmuin go dievdduin.
1. luohká Riddár:
Gollehuvvon ruossa ráhkaduvvon seammaládje go kommandørruossa, muhto lea unnit. Dán árvomearkka galgá guoddit gurutbealde rattis 4 cm govddu báttis, dievdduin galgá leat árvomearkabáddi, ja nissonolbmuin sløyfa, goappešagat seamma govdadat. Uniforpma alde galgá riddárruossa leat seammaládje nissonolbmuin go dievdduin.
Riddár:
Silba ruossa mii lea ráhkaduvvon seammaládje go 1.luohká riddárruossa. Dán árvomearkka galgá guoddit gurutbealde rattis 4 cm govddu báttis, dievdduin árvomearkabáddi, ja nissonolbmuin sløyfa, goappešagat seamma govdadat. Uniforpma alde galgá riddárruossa leat seammaládje nissonolbmuin go dievdduin.
Girkolaš stuoraruossa guoddit galget, go leat gárvodan girkolaš biktasiiguin, guoddit kommandørruossa stuoraruossabáttis čeabehis dan sajis go oalgebáttiin.
§ 10
Árvomearkka goluid gokčá Gonagašlaš Olgoritdepartemeanta.
§ 11
Árvomearkka sinjeahtta sisttisdoallá čállaga “Den Kgl. Norske Fortjenstorden”.
§ 12
Árvodipmola vuolláičállá Stuorameasttir, ja dan maŋŋil maid Kansler (Hoavvahoavda), ja su nama bálddas maid Árvomearkka Kansellihoavdda vuolláičála ja Árvomearkka seaila.
Dakkár oktavuođain go ii leat Stuorameasttir dahje muhtun ovddasteaddji geasa Stuorameasttir lea addán fápmudusa, addimin Árvomearkka ja diploma, de Árvomearkačállingoddi sádde daid.
Dipmola fárus addojuvvo maid okta eksemplára Árvomearkka doaibmanjuolggadusain.
§ 13
Stuorameasttir mearrida, maŋŋá ráđđádallama Árvomearkaráđiin, maid galgá dahkat jus badjána gažaldat ahte galgá go muhtun miellahtu sihkkut dohkkemeahttun dili vuođul.
§ 14
Árvomearka bissu vuostáiváldi opmodahkan. Liikká galget árvomearkkat maid ovdal lea ožžon doaimmahuvvot ruovttoluotta Árvomearkačállingoddái jus oažžu alit dási dahje alit luohká mearkkaid.
