Hopp til hovedinnhold

Dronnet Sonja Internašunála Musihkkagilvu

Dronnet Sonja Internašunála Musihkkagilvu lágiduvvo juohke nuppi jagi ja geasuha čeahpes lávluntaleanttaid miehtá máilmmi. Dronnet čuovvu gilvvu, ja addá ieš bálkkašumi vuitiide.

Dronnet lea ollu klassihkalaš musihkkainstitušuvnnaid ja álbmotmusihka institušuvnnaid suodjaleaddji. Dronnet Sonja Internašunála Musihkkagilvu lágiduvvui vuosttaš geardde 1988:s, dalle lei pianočuojaheddjiidgilvu.

Ulbmilin lei ásahit internašunála musihkkabirrasa Norgii gos sáhtášii oainnusindahkat nuorra čuojaheddjiid, ja addit norgalaš solisttaide vejolašvuođa árvvoštallojuvvot internašunála dásis. Dan oktavuođas go lei 100 jagi gollan Kirsten Flagstad riegádeami rájes, de mearriduvvui 1995:s ahte dan jagi gilvu galggai leat dušše lávluid váste. Dat lihkostuvai hui bures, ja dan rájes lea gilvu leamaš lávlungilvu.

Oasálastit

Gilvui oasálastet eanas lávlut mat aitto leat oahpuin geargan, ja geat galggaše bargagoahtit operain ja klassihkalaš musihkain. Juohke gilvui bohtet gaskal 150 ja 200 ohcamuša lávluin miehtá máilmmi.

Vuoitit ožžot ruhtavuoittu ja gráfalaš deaddiluvvon gova mas lea Majestehta Dronnega nammačálus, ja dasa lassin vel bargogoargŋun vejolašvuođaid allaárvvus adnon bargguin ja dohkkeheami.

Organiseren

Gilvu lea organiserejuvvon vuođđudussan ja lágiduvvo juohke nuppi jagi. Ovttasbarggus leat mielde Den Norske Operai & Ballett, Norgga Musihkkaallaskuvla, Oslo-Filharmonien ja NRK. Juryai válljejuvvojit internašunála dovddus operaolbmot-ja hálddašeaddjit.
 

06.11.2012

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas