Njuike váldosisdollui

Prinseassa Märtha Louise

Prinseassa Märtha Louise riegádii čakčamánu 22. beaivvi 1971:s Rikshospitálas Oslos. Son lea Majestehta Gonagas Harald ja Majestehta Dronnet Sonja boarrasit mánná. Prinseassas lea okta viellja, Gonagaslaš Allavuohta Ruvdnaprinsa Haakon. Prinseassa Märtha Louise ii ovddas Gonagasviesu almmolaš oktavuođain.

Prinseassa lea gásttašuvvon iežas áhčibeale áhku, Ruvdnaprinseassa Märtha, ja iežas máttaráhku, Gonagas Haakona eatni, Dronnet Louise gáibmin. Go Vuođđoláhka rievdaduvvui, de šattai Prinseassa ruvdnoárbbolaš, muhto álgonjuolggadussan mearriduvvui ahte dievdu mánná árbemis ovddabeallái nissonolbmo sin gaskkas geat leat riegádan ovdal 1990.

Bajásšaddan

Prinseassa vieljainis bajásšattaiga luonddu birrasis Skaugum gárdimis Askeris, oarjjalulabealde Oslo. Váhnemat leaba garrasit deattuhan dan ahte goappešat mánáid bajásgeassin galgá leat eanemus lági mielde seammalágan go norgga nuorain muđui. Danin leaba sihke Prinseassa ja Ruvdnaprinsa leamaš suohkanmánáidgárddis ja vázzán dábálaš skuvllas.

Prinseassa Märtha Louise liiko sihke musihkkii ja girjjálašvuhtii. Ollu jagiid lei son mielde muhtun dánsenjoavkkus Norgga Álbmotmuseas, ja lasa lassin lei son áŋgir riidet heastagilvvuin. Son lea maid lávlon koaras, čuojahan piano ja njurggonasa (tverrfløyte).

Oahpu

Prinseassa álggii vuosttaš luohkkái Smestad skuvlii Oslos 1978:s, ja eadni ja áhčči čuovuiga su vuosttaš skuvlabeaivái. 1990:s gearggai son joatkkaskuvllas Kristelig Gymnasiumas Oslos. Prinseassas ledje gielat čiekŋudahttinfágan. Seamma čavčča vulggii Prinseassa Englándii Waterstock Ridesenterii oahpahallin ja maiddái lohkan dihtii girjjálašvuođa Oxford Universitetehtas. Muhtun áiggi maŋŋá fárrii son Arena UK riidenguovddážii oahppat profešunealla heastariidema, sprangrytter riidema.

Govven: Mariam Butt / NTB scanpix

1992 čavčča álggii Prinseassa Märtha Louise Bjørknes Priváhtaskuvlii Oslos. Maŋŋá čálihuvvui son studeantan Bislet allaskuvlaguovddážii Oslos gos son čađahii fysioterapeuta oahpu. Maŋŋá eksámena, válljii Prinseassa bargat praksisáiggi Maastrichtas Nederlánddas. Juovlamánus 1997 oaččui son fysioterapeuta duođaštusa. Dan maŋŋá álggii son ollesáiggi bargat sprangrytter gilvvuin ja lei máŋgga geardde riikkajoavkkus. Seamma áiggis logai son Rosenmetoda oahpu. 2000:is oaččui son Rosenmetoda dikšunduođaštusa. Seamma jagi heittii son riidengilvvohallamiin.

Bearaš

Juovlamánu 13.  beaivvi 2001 lohpádalaiga Prinseassa ja girječálli Ari Behn (1972-2019), guhte lea Mossas eret. Bára vihahii bisma Finn Wagle Nidaros Duopmogirkus, Troandimis miessemánu 24. beaivvi  2002.  Jagis 2016 mearrideigga soai fárret goabbat sadjái, ja bárra earránii 2017:s.

Prinseassas ja Ari Behnas leat golbma nieidda. Maud Angelica Behn riegádii Rikshospitálas Oslos cuoŋománu 29. beaivvi 2003, Leah Isadora Behn riegádii Bloksbjergas Hankøas cuoŋománu 8. beaivvi 2005 ja Emma Tallulah Behn riegádii Lommedalenis čakčamánu 29. beaivvi 2008.

Geassemánu 7. beaivvei 2022 almmuheigga Prinseassa Märtha Louise ja Durek Verrett ahte leaba lohpádaddan.  

Geassemánu 7. beaivvei 2022 almmuheigga Prinseassa Märtha Louise ja Durek Verrett ahte leaba lohpádaddan. Govven: Daryl Henderson / NTB

Prinseassa orru iežas nieiddaiguin Lommedalenis Bærum suohkanis.

Eai šat almmolaš doaimmat

Prinseassa Märtha Louise ii šat čađat almmolaš doaimmaid Gonagasviesu ovddas 2022 skábmamánu rájes, muhto son lea ain stivrajođiheaddji foanddas: Prinsesse Märtha Louises Fond.

Prinseassa foanda vuođđuduvvui čakčamánu 15. beaivve 1972 ja vuoitu foandda kapitálas galgá doarjut doaibmabijuid Norggas mat bohtet doaibmahehttejuvvon mánáide buorrin. Ruđa juolludeapmi dáhpáhuvvá Prinseassa Märtha Louise riegádanbeaivve, čakčamánu beaivve.

Iežas fitnodat

Prinseassa Märtha Louises lea dál ovttaolbmofitnodat ja don bokte son čađaha iešguđetlágan kommersiála doaimmaid, nugo girjealmmuhemiid, bivttas-ja čábbudanbuktagiid vuovdima ja logaldallamiid. 2000-logu álggu rájes lea Prinseassa Märtha Louise olu áŋgiruššan kulturgaskkustemiin, ovdamearkkadihte muitalit norgalaš álbmotmuitalusaid earret eará tv-ráiddus. 2002 ođđajagimánus álggii Prinseassa bargat iešheanalaččat kulturgaskustemiin ja rosenmetodain. Dan rájes lea son leamaš iešheanalaš ealáhusdoalli ja lea máksán vearu.

Gaskal 2007 ja 2019 jođihii Prinseassa Astarte Education/Soulspring  ovttas Elisabeth Nordengain. Jagis 2018 álggahii Prinseassa Märtha Louise YouTube-kanála HEST360 ovttas Geir Kamsvågain.

Prinseassa lea čállán girjiid ja buvttádan jietnagirjiid, ja lea leamaš prográmmajođiheaddji máŋga tv-ráiddus.

 

08.11.2022

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas