Hopp til hovedinnhold

Aftenlandskap

Gova lea málen norgga govvamálejeaddji Kitty Kielland (1843-1914) ja govas oaidnit Stokkavannet Stavangeris beaivváš luoitádeamis.

Dát máleriija lei okta dain vuosttaš govain mii addojuvvui ođđa norgga Gonagasbárrii go bođiiga 1905:s, ja dakka maŋŋá heŋgejuvvui govva Dronnet Maud saloŋgii Gonagaslaš šloahtas. Motiiva lea dáiddára iežas ruovttuguovlluin.

Historihkka

Máleriija addojuvvui skeaŋkan Dronnet Maudii su riegádanbeaivái skábmamánu 26. beaivvi 1905. Seammás lei dat maid buresboahtinskeaŋka našuvnna ođđa Dronnegii go son bođii Norgii skábmamánu 25. beaivvi seamma jagi. Dahkan dihtii norgga Gonagasviesu vuogasin ja ovddasteaddjin buot doaimmaide, de ledje norgga nissonolbmot čoahkkanan čađahit našuvnnalaš ruhtačoaggima vai besset oastit govvadáidaga ja silbadiŋggaid Gonagasbárrii. Rámmas lea mearka masa lea čállojuvvon: Til Norges Dronning fra Damer i Elverum 26de November 1905. (Norgga Dronnegii Elverum Roavváin, Skábmamánu 26. beaivvi 1905.)

Dáiddár

1886 geasi orui Kitty Kielland Fleskum gárdimis Bærumis ovttas eará dovddus govvamálejeddjiiguin nugo Christian Skredsvig, Erik Werenskiold, Eilif Peterssen, Gerhard Munthe ja Harriet Backer. Geassi Fleskum gárdimis mearkkašahttá ođđa kapihttala norgga kulturhistorjjás, ja sin dáida báidnigođii olles Norgga dáiddabirrasa. ”Fleskum govvamálejeaddjit” luvvegohte iežaset realismma jurdagiin ja dáhtto baicca dikšugoahtit máleriijaid mat čájehedje olggusteami ja luonddu molsašuddi girjáivuođa.

Kitty Kielland govain oaidná čázi speadjalastimiid čáppisvuođaid – geasi miehtá Fleskum gárdimis, ja Aftenlandlandskap navdojuvvo leat dán motiivasuorggi váldoduodji. Kielland moitojuvvui su áiggis dan dihte go lohke su bearehaga dikšut seavdnjada ja lossavuođa. Máleriija čájeha aŋkke hui jáhkkehatti lági mielde movt molsašuddi čuovga rievdada luonddu dilálašvuođa.
 

Materiálat
Olju liinni alde

Mihtut
115 x 120 cm.

Signatur
Kitty L Kielland / 1890

Inventarnummar
DKS. 001128

 

04.06.2012

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas
Guoskevaš leaŋkkat