Hopp til hovedinnhold

Shanghai lihtti

Shanghai urna lei skeaŋka Gonagas Haakon ja Dronnet Maud ruvdnemii

Shanghai lea okta Kina stuorámus gávpogiin, mii lea áigá juo leamaš dehálaš hámmangávpot danin go dat lea lahka ovtta dain čáhcegeainnuin Yangtzenjálmmádagas gos lea eanemus johtolat čázi mielde. Kina lei protekšonisttalaš ja giddejuvvon riika gitta 1842 Nanking-soahpamuša rádjái, go Kina bággehalai rahpat riikka olgoriikka gávppašemiide. Dan rájes šattai Shanghai guovddáš internašunála hámman gos vuolggahedje gálvvuid vuovdimii olgoriikkaide ja gos maid bukte gálvvuid olgoriikkain, ja 1854 rájes ledje olgoriikkalaččat geat gozihedje kiinnalaš duolloásahusa. 1906:s barge eanas norgalaččat Shanghaias mearrajohtolatdoaimmain, muhto maiddái riikkaidgaskasaš duollodoaimmas, mišunearan, ingeniøran, sii ledje fitnodatdoaimmain dahje mielde olgoritbálvalusas.

Historihkka

Urna maid leat addán "Nordmænd i Shanghai", mii addojuvvui 1906 ruvdnejupmái, lea ovdamearka mii čájeha makkár nanu gullevašvuođa norgalaččat olgoriikkas dovde ruovttueatnamii ja dan ođđa gonagasvissui. Norgalaččat geat ásse Shanghaias ávvudedje maid ruvdnema ovttas muhtun gussiiguin. Jarlsberg Amtstidende (borgemánu 11. beaivvi 1906) ja Morgenbladet (borgemánu 8. beaivvi) čálle ahte ruvdnema ávvudedje eŋgelas klubbas ja dámpaskiippamátkkiin ”Whampoaflodenis”.

Hábmen

Dán lihti lea várra ráhkadan Cheung Shing. Dat lea hervejuvvon klassihkalaš kiinnalaš hervemiiguin nugo drágageavjjain ja bámbusovssiiguin. Urna lea ruvdnejuvvon unna pagode tempelaččain. Pagodat leat buddhisttaid monumeanttat, ja dat sáhttá dán oktavuođas jurddašuvvon lihkufievrredeaddji diŋgan. Drágaornamentihkka geardduhuvvo muđui urna hervemis. Kinas atnet drága bassin ja buorideaddjin, dat buktá buressivdnádusa, ilu ja lihku. Ja go dien atná muittus, de sáhttá roahkka dadjat ahte dát lei hui heivvolaš ruvdnenskeaŋka.
 

Materiálat
Silba ja muorra

Mihttu
Allodat: 86,5 cm

 

Inventarnummar
DKS.014557

 

04.06.2012

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas