Loahpaheigga albma argentiinnálaš vuogi mielde
Majestehtaguovttos Gonagas ja Dronnet loahpaheigga iežaska stáhtaguossástallama Argentinas odne. Dan soai dagaiga estancias, gos beasaiga vásihit argentiinnálaš kultuvrra; historjjá, dánssa, musihka ja borramušaid.
Njukčamánu 8. beaivi 2018
Estancia Villa María ranch lea olggobealde Buenos Aires gávpoga. Dat huksejuvvui 1927:s Tudor-málle mielde, ja jođihuvvo dál hoteallan ja virkkosmahttinbáikin. Gonagas ja Dronnet beasaiga oaidnit gauchos čájáhallama – searas heasta riidejeddjiid main lea hui guovddáš sajádat argentiinnálaš árbevierus ja dihtomielas.
Gonagasbárra beasai maid návddašit tango ja latiinnalaš musihka, dan botta go gárvvistedje árbevirolaš bassojuvvon borramuša – albma asado – stuora grillain.
Ođđa girdinruvttut
Ovdal go Gonagasbárra bođii dien ranhcii, de doai leigga fitnan dilálašvuođas mii lágiduvvui Ministro Pistarini internašuvnnalaš girdihámmanis, Ezeiza. Norwegian girdinfitnodat lea álggaheamen girdinruvttuid Argentinas, ja lea dál rahpamin ollu siseatnan ruvttuid ja maiddái internašuvnnalaš ruvttu gaskal Buenos Aires ja London. Dieinna ruvttuin lea álkit norgalaččaide girdit Argentinai.
Dronnet čanai báttiid, main leat Argentina ja Norgga ivnnit, ođđa oktavuođaid symbolan.
Loahpaheapmi
Veaigin (báikkálaš áiggi mielde) loahpaha Gonagasbárra guossástallanmátkkis Estancia Villa Marías – ja nu loahpaheaba olles stáhtaguossástallama Argentinas. Loahpahandilálašvuođas soai ságastalaiga norgalaš ja olgoriikkaid preassaolbmuiguin ranhcas. Dasto guossohedje albma argentiinnálaš borramušaid, ja de vulggiiga Gonagas ja Dronnet ruovttuguvlui mátkkoštit.
Argentina 2018
Gonagas ja Dronnet leigga stáhtaguossástallamis Argentinas njukčamánu 6. - 8. beivviid 2018, njunušin stuora delegašuvnnas mas ledje fárus politihka ja ealáhusaid ovddasteaddjit. Dás oainnát govaid iešguđet lágidemiin dien mátkkis.
Čájeha 8 oktiibuot 29