Gaskal davvi – ja lulliguovlluid
Majestehtat Gonagas Harald ja Dronnet Sonja loahpaheigga dán jagi fylkkamátkki Nordlándda lulimus suohkanis, Bindal. – Munnos leat leamaš erenoamáš beaivvit čáppa Helgelánddarittus, dajai Gonagas.
2023 geassemánnu 8
Bindal suohkan lea Trøndelága ráji lagamusas:
– Bindal suohkanis eallibehtet gaskal davvi-ja lulli guovlluid, gaskal Nordlándda ja Trøndelága. Muhto orrubehtet gal bures birgeme dan dilis- ja váldibehtet buoremus osiid goabbatge osiin, namuhii Gonagas Harald otná sártnis.
– Olu almmolaš ovttasbargu manná davasi, ja valáštallan, gávppašeapmi ja kulturvásáhusat ges lulás.
Kulturprográmma Seglerplassen-báikkis
Ovdalgaskeabeaivve ollii Gonagasbárra Terråk-nammasaš suohkanguovddážii gos lágiduvvui kulturprográmma Seglerplassen-nammasaš báikkis. Gonagas ja Dronnet vásiheigga sihke lávluma, dánsuma ja oaččuiga maiddái oasáža Bindala historjjás.
Dáppe lea mearra álo leamaš dehálaš, ja fanashuksenárbevierru lea nanus dán guovllus. Ja danin geigiige sátnejođiheaddji Britt Helstad earret eará modealla árbevirolaš Bindalsfæringas skeaŋkan Gonagasbárrii.
Peacepainting
Gonagas ja Dronnet beasaiga maiddái gullat gelddolaš vuođđudusa birra man namma lea Peacepainting. Sin sáttasátni lea ráfi, ovttaárvosašvuohta ja oktiigullevašvuohta lundui. Mánát ja nuorat ráhkadit govaid main boahtá ovdan ahte sávvet buoret máilmmi- ráfiin, iluin ja vuoiggalašvuođain buohkaide. Juohke gova nammii ráhkaduvvo maiddái dikta ja historjá. Ovtta gova váldet ruoktot, nubbi govva biddjo čájáhussii.
Sin barggut leat čájehuvvon Stuoradikkis, ON-visttis Genevas ja NATO váldoguovddážis. Muhto maiddái olu skuvllain museain, kafeain, hoteallain ja eará báikkiin gos olbmot vánddardit. Ja buot dát álggahuvvui juste fal Bindalas jagis 2007, ja dál leat 22 riika mielde dás.
Gonagas Harald namuhii maiddái dan prošeavtta su sártnis, ja celkkii ahte dát lea fiidnámus prošeavttaid searvvis maid birra son lea gullan.
- Mu mielas lea dát hirbmat erenoamáš vuohki mot čohkke positiivvalaš searaid. Ja mun sávan váimmolaš lihkkusávaldagaid boahtteáiggi hárrái.
Gonagasbárra beasai oaidnit peacepainting čájáhusa Helgelándda musea ossodaga olggobealde Bindalas. Doppe lei maiddái vejolašvuohta oahppat eanet báikkálaš fanashuksema ja vuovdedoalu birra. Dasa lassin beasai doppe oahpásmuvvat báikkálaš fitnodahkii, Bindalsbruket, mii skáhppo uvssaid – ja pláhtaid maidda mánát peacepainting-prošeavttas njuhtet govaid.
Dego máidnasis vižžojuvvon
Galledeapmi Bindalas lei maŋemus bisánanbáiki Gonagabára fylkkamátkkis Nordlánddas dán vuoru. Gonagas Harald geahččalii čoahkkáigeassit galledeami su sártnis:
– "Dát beaivvit čáppa Helgelánddarittus leat dego máidnasis vižžojuvvon! Moai letne nu giitevaččat. Ja munnuide leat báhcán muitogovat ja muittut maid válde mielde viidáseappot – olbmot ja báikkit, lávlagat ja historjját mat leat guoskkahan ja čuohcan munnuide. Gonagas Harald.
– Juohke sajis gos letne fitnan, de lohket olbmot munnuide ahte dán suohkanis lea buoremus orrut, dajai Dronnet.
– Lea hirbmat buorre gullat ahte buohkat rámidit ja čevllohallet juste sin suohkana geažil.
Nordland 2023
Fotoalbum med bilder fra Kongeparets fylkestur til Nordland 5.-8. juni 2023. De kommende fire dagene vil Kongeparet besøke kommunene Hemnes, Hattfjelldal, Leirfjord, Vevelstad, Sømna og Bindal. Her kan du følge reisen i bilder.
Čájeha 8 oktiibuot 75