– Buorre leat davvi-Norggas fas
Majestehtaguovttos Gonagas ja Dronnet leaba odne álggahan fylkkamátkki Nordlánddas. – Dáppe davvin lea vuoiŋŋahat nu friddja – dáppe gos lea nu olu mearra, várri ja albmi. Ja erenoamáš olu smáđáhkis olbmot, dajai Gonagas Harald mátkki vuosttaš sártnis.
2023 geassemánnu 5
Njeallji beaivvis galleda Gonagasbárra guhtta suohkana Nordlánddas gos ovdal eaba leat leamaš álmmolaš galledeamis – Hemnes, Árborde, Leirfjord, Vevelstad, Sømna ja Bindal.
Hemnes suohkan lei vuosttaš bisánanbáiki fylkkamátkkis.
Biebmokultuvra ja fanashuksenárbevierru
Diibmu 10.00 lávkii Gonagasbárra nannámii Hemnesberget káijas ja váccašeigga das Sjøgatai go lei ceggejuvvon lávdi.
Gárttaiga dattege orustit guktii. Steinar Jørgensen muitalii fanashuksenvieruid birra Hemnes guovllus. Jørgensen lea máŋggaid jagiid juo áŋgiruššan Hemnesberget guovllu fanashuksenárbevieruid oažžut ovdan. 1970-logu rádjái lei suohkan njunnožis fanashuksemis. Gonagas maiddái guoskkahii fanashuksenárbevieruid su sártnis.
– Lea dehálaš váldit vára dološ giehtaduodjeárbevieruid – beare jeara Dronnegis! Ii leat bálljo vejolaš oba bissehit ge su jus son álgá dáid birra hupmat, dajai Gonagas ja bovttii sihke mojiid ja reaškkasa.
Go nuppes bisáneigga, de beasaiga gullat kamkake-kultuvrra birra. Heidi Fagerbakk ja Olav Mastervik gullaba Bleikvassli gilisearvái ja sidjiide lea dehálaš doalahit dieđuid báikkálaš, árbevirolaš borramuša birra. Ja “kamkake” lea erenoamáš láibbastat man eai láibbo eará sajiin go Hemnesa báikkiin Korgen, Bleikvassli ja Leirskardalen. Kamkakekultuvra lea dološ vierru. Diktačálli ja báhppa Petter Dass (1647-1707) čálii "Kam-Kager" birra dovddus divttas Nordlands Trompet.
Sámi árbi ja Hemnesjazz
Lávddis čájehuvvui čájálmas mas bođii ovdan Hemnes suohkana historjá ja kultuvra. Hemnes ja Helgelánda lea lullisámi-ja ubmisámiguovlu, ja lávddi prográmma vuosttaš oassi lei dánsun. Ja dát dánsun lei oassi Klemetspelet-bihtás – mii lea historjjálaš neaktinbihttá lullisámi dievddu Klemet Persona birra. Ovddit jahkečuohtemolsuma áiggis orui son bearrašiinnis duolba geađggi suoji vuolde Leirskardalena bajimusas.
–Dáppe leat gusto vaikko man olu musihkkalaš taleanttat ja kreatiiva fámut, dajai Gonagas Harald gii ovttas Dronnet Sonjain vásihii čáppa lávluma Onsdagskoret pensionisttain, ovddeš Idol-oasseváldis Astelle (Anna Anita Jaskiv), Bitchy Big Boobies-dálueamit lávlunjoavkkus, skuvlaoahppis Lisbeth Buskli ja jazzlávlus Sigrid Brennhaug.
Jazz lea guovddážis Hemnesas, ja juohke jagi, borgemánu álggus, lágiduvvo Hemnesjazz Hemnesberget mearragáttis.
Sátnejođiheaddji Paul Asphaug doalai sártni, doppe ledje maiddái dearvvuođat ukrainalaš álbmogis Hemnesas, sii gulle historjjáid nuppi máilmmesoađis ja Lapphella jahkeduhátbáikkis. Maŋŋel čájálmasa deaivvadeigga Gonagas ja Dronnet njealjásiin geat leat ožžon Gonagas ánssumedáljja, ja dasto vel Birgit Sandmo gii lei lieđđenieiddaš dalle go Gonagas Olav ja Prinseassa Astrid finaiga Hemnesas gonagasmátkkis Davvi Norggas 1959.
Hemnesas leat sullii 4400 ássi ja lea dat suohkan gos leat eanemus olbmot daid suohkaniid searvvis gos Gonagasbárra fitná dán fylkkamátkkis. Hemnesas leat vihtta čoahkkebáikki: Hemnesberget, Finneidfjord, Bjerka, Bleikvasslia ja Korgen. Dáppe lea maiddá Davvi-Norgga alimus várri – Oksskolten mii lea 1916 mehtera.
Nordland 2023
Fotoalbum med bilder fra Kongeparets fylkestur til Nordland 5.-8. juni 2023. De kommende fire dagene vil Kongeparet besøke kommunene Hemnes, Hattfjelldal, Leirfjord, Vevelstad, Sømna og Bindal. Her kan du følge reisen i bilder.
Čájeha 8 oktiibuot 75