Mátki joatká Helgálánddarittus

Ovdalgaskabeaivve ollii Gonagasbárra Leirfjord suohkanii Gonagasskiippain Norge.

Dasto manne valáštallanšilljui gosa lei bovdejuvvon álbmotfestii lávlumiin ja musihkain. Leirfjord Seniordans ávvuda 25-jagi dán jagi, ja sii bokte movtta go čájehedje "Rumba under stjernene". Loahpas guoimmuhedje nuorra lášmohallit Leirfjord valáštallansearvvis.

Leirfjord lea daid suohkaniid searvvis Norggas gos stuora oassi ássiin leat badjel 100 jagi boarrásat. Suohkan lea rámis gos sis lea buorre boarrásiiddikšun, ja dan namuhii maiddái Gonagas su sártnis.

– Moai Dronnegiin letne olu boarraseappot go 80 jagi, ja de dálo illudetne boahtit báikkiide gos lea buorre boarrásiiddikšun ja fuolahus. Ja nu gusto: dáppe Leirfjord suohkanis letne dovdan dán buori fuolahusa ja divššu dakkaviđe go lávkiime gáddái, dajai gonagas Harald.

Muhto maiddái nuoraid searat lassánit. Dá lea boaittobealsuohkan mii nagoda vuosterávnnjis doaibmat bures, ja olmmošlohku lea lassánan maŋemus logi jagi. Dát maiddái seammás mearkkaša ahte ođđa nuoraidklubba ja ođđa skuvlavisti lea ceggejuvvon, ja ahte mánáidgárdefálaldat lea buoriduvvon.

Maŋŋel kulturprográmma, galledii Gonagasbárra smávva vuovdinbeavddážiid gos earret eará oinniiga maid mánáidgárdemánát ja skuvlamánát ledje ráhkadan, ja soai beassaiga maiddái máistit báikkálaš ja internationála borramušaid – dego ovdamearkkan dasa man girjái ja mággabealát Leifjord lea odne. Gonagas ja Donnet maiddái gulaiga makkár plánat leat Arven-nammasaš báikái, mii galgá šaddat gelbbolašvuođaguovddážin boahtteáiggi ođasmuvviservogaide.

- Visti ja plána lea hirbmat berošteaddji ja hirpmáhuhtti. Ja dát lea dehálaš! Buohkain lea dárbu ipmirdit oktavuođaid: gos min riggodagat bohtet, mot daid buoremusat hálddaša ja mot boahtteáiggis sahttá dáid ávkkástallat buoremus lági mielde vai bohtet ávkin ja illun nu oallugiidda go vejolaš, dajai Gonagas.

Viidáseappot Vevelstad suohkanii

Maŋŋelgaskabeaivve ollii Gonagaskiipa Vevelstad suohkanii. Dáppe álggahuvvui galledeapmi rabas doaluiguin Vevelstad Gilišiljus.

Gonagasbárra oinniiga osiid Vevelstadspelet-čájálmasas, man vuolggasadji lea Magnus Berrføtt saga Snorre "Heimskringla" čállosis. Dás boahtá ovdan riidu gaskal su ja Gonagas Håkon Magnusson "Toresfostre". Dušše báikki ássit oasálastet čájálmasas ja buohkat leat amatevrrat.

Gonagasbára guoimmuhedje maiddái lávlumiin ja musihkain, ja soai gulaiga maiddái ođđa dávvirvuorkkávistti plánaid birra.

- Musihkka, koarra, korpsa ja teáhter – gal mun lean oalát hirpmáhuvvan das man máŋggabealálaš ja hutkás giliolbmot dáppe leat. Vevelstada lea báiki gos lea buorre bajásšaddat – ja eallit olles eallima, dajai Dronnet Sonja.

Gonagasbárra galledii maiddái čáppa Vevelstad girku, gos lea erenoamáš govva man itálialaš dáiddár Joseph Pisani lea ráhkadan. Govva gárvánii seammás go girku váldui atnui jagis 1796. Sátnejođiheaddji Torhild Haugan lea ieš dáiddahistorihhkkár ja muitalii eanet dán gova birra mii lea nu erenoamáš ahte ii gávdno sullásašge obanassiige Davviriikain.

Buot ássit bovdejuvvon gaskabeivviide

Vevelstad lea čáppa guovllus Helgelánddarittus. Suohkanis orrot sullii 460 olbmo, ja lea dan dáfus okta unnius suohkaniin Norggas. Danin geavahii suohkan liibba bovdet buot ássiid mállásiidda ovttas Gonagasain ja Dronnegiin.

Mállásiin ledje báikkálaš borramušgálvvut vuođđun.Vel gáffe ge bođii bákkálaš, historjjálaš gávpesajis – namalassii Forvik báikkis mii lea dán suohkanis. Goahkka-ja dárjuoahpposuorggi oahppit Brønnøysunda joatkkaskuvllas ráhkadedje-ja gussohedje borramuša.

Gonagasbárra joatká Nordlándda fylkkamátkki, ja boahtte bisánanbáiki lea Sømna suohkan.