Norgga prinseassa
Gonagaslaš Allavuohta Prinseassa Ingrid Alexandra lea nubbin árbenráiddus, áhčis Ruvdnaprinssa maŋis. Prinseassa lea dál lohkame servodatfága Australias, muhto čađaha maiddái muhtin virggálaš doaimmaid Gonagasviesu ovddas.
Ođđajagimánu 21. beaivvi 2022:s olahii Prinseassa Ingrid Alexandra válddálašvuođaagi ja dan oktavuođas oaččui Prinseassa iežas kantuvrra Gonagaslaš šloahtas. Lagamus jagiid lea dattege su deháleamos bargun ain vuoruhit oahpu, ja čakčat 2025 álggii son servodatdiehtagiid studeret Sydney universitehtas.
Almmolaš doaimmat
Prinseassa Ingrid Alexandra lea váldán badjelasas olu almmolaš doaimmaid ja joatká dákkár doaimmaigun nu guhká go heive su oahpu ektui.
Cuoŋománus 2025 oassálasttii Prinseassa vuosttaš geardde virggálaš prográmmas stáhtagalledeami oktavuođas. Lei Islándda presideantagbára galledeapmi Norggas.
Vuosttaš doaimmat
Prinseassa Ingrid Alexandra berošta birasgáhttemis ja dálkkádagas, ja juste dát ledje ge fáddán Prinseassa vuosttaš almmolaš doaimmas, earret miessemánu 17.beaivvi ja Holmenkollen čuoiganfestivála: Ovttas Ruvdnaprinseassain dearvvahii son Birasageantaparáda (Miljøagentparade) Šloahttašiljus, Máilmmi birasbeaivvi oktavuođas jagis 2009.
Vuosttaš iešheanalaš doaibma
Jagis 2015 lei Prinseassas vuosttaš iešheanalaš doaibma go gásttašii Gádjunsearvvi ođđa fatnasa "Elias". Jagis 2016 son cahkkehii dola nuoraid olympiagilvvuid rahpanseremoniijas Lillehammeris 13 000 olbmo ovddas, ja skábmamánus 2018gásttašii son Norgga ođđa dutkanfatnasa, FF Kronprins Haakon.
Čuovvola árbevieruid
Gonagasbearraša árbevierru dearvvahit mánáidtoga Šloahttabalkoŋggas álggahuvvui juo jagis 1906. Prinseassa Ingrid Alexandra lea viđat buolva balkoŋggas ja lei doppe juo iežas vuosttaš miessemánu 17.beaivvi-ávvudeamis.
