Prinseassa ja Suodjalus
Gonagaslaš Allavuohta Prinseassa Ingrid Alexandra čađahii su vuosttasgearddebálvalusa Inšenevrabataljovnnas Brigáda Nord:as 2024-2025. Prinseassa bálvalii Skjold leairras Málatvuomi suohkanis.
Inšenevrasoalddáhii Alexandrai álggii bálvalus gávcci vahkkosaš rekruhttaáigodagain, ja dan áigodagas ožžo soalddáhat oahpu vuđolaš soalddátgelbbolašvuođain, nugo vearjjuid geavaheamis, meahcceoperašuvnnain ja mot birget gáibideaddji dilálašvuođain.
Rekruhttaáigodaga maŋŋel álggii fágaoahppu, ja de oaččui Prinseassa bálvalusbargioahpu šaddat báhččin fallehaninšenevrapanserfievrrus (CV90). Oassin fallehaninšenevrajoavkkus lea báhččis ovddasvástádus hálddašit fievrru vearjovuogádagaid, 40 mm kanovnna ja mitraljøsa, ja leat lagamus doarjja fievrru jođiheaddjái. Dát lea virgi mii gáibida teknihkalaš áddejumi, dárkilisvuođa ja jođánis mearridanattáldaga, ja gáibida lagas ovttasbarggu muđui joavkkuin ja eará vovnnaiguin joavkkus.
15 mánu bálvalusáigi
Fágaoahpu válljen dagahii ahte Prinseassa Ingrid Alexandra ja muđui kompaniija čađahedje 15 mánu bálvalusáiggi. Son luobai cuoŋománu 4. beaivve 2025.
-Jáhkán ahte deháleamos maid lean oahppan lea ahte olmmoš máhttá olu eanet go jurddaša, ja ahte mii leat olu gievrrabut ovttas earáiguin. Leš dal joavkkus, veagas dahje kompaniijas, de olaha olu eanet go ii leat okto, dajai inšenevrasoalddát Alexandra hárjehallama oktavuođas čakčamánus 2024:s.
Uniforbma badjelasas Šloahttabalkoŋŋas
Go mánáidtoga váccii Šloahta ovddabealde álbmotbeaivvi, de čuoččui Prinseassa Ingrid Alexandra iežas bálvalusuniforpmain Šloahttabalkoŋŋas. Son čuoččui doppe Gonagasviesu ovddasteaddjin, muhto maiddái daid olu nuorra dievdduid ja nissonolbmuid ovddasteaddjin geat juohke jagi čađahit vuosttašgearddebálvalusa.
Seamma dagai su áddjá, Majestehta Gonagas Harald, go son čađahii vuosttašgearddebálvalusa measta 70 jagi ovdal.
Galledeapmi skeaŋkan
Prinseassa Ingrid Alexandra finai galledeame máŋga iešguđet oasi Suodjalusas ovdal vuosttašgearddebálvalusa. Eanansuodjalus, Mearrasuodjalus ja Áibmosuodjalusveahka ožžo Prinseassa guossin maŋŋel go son oaččui dáid vásáhusaid skeaŋkan 18-jagi beaivái.
Maiddái su konfirmašuvnna oktavuođas galledii Suodjalusa, dalle finai Jegertroppena guossis.
