Stáhtaráđđi
Bearjadagaid diibmu 11:00 doallá Majestehta Gonagas Stáhtaráđi. Čoahkkin lea Stáhtaráđđesálas Gonagaslaš šloahtas.
Go Ráđđehus lea čoahkis dahkame mearrádusaid, de dat dáhpáhuvvá Stáhtaráđis. Stáhtaráđi jođiha Gonagas, ja mearrádusat čállojuvvojit nu ahte dain čuožžu ahte lea ”Gonagas Stáhtaráđis” mii lea mearrádusa dahkan. Gonagas galgá dohkkehit buot lágáid ja mearrádusaid mat dahkkojuvvojit, ja daid galgá stáhtaministtar dahje su sadjásaš, vel vuolláičállit ovdal dat leat fámus.
Muhtomin gohččojuvvo Stáhtaráđđi earenoamáš čoahkkimii. Dat dáhpáhuvvá go juoga earenoamážit dáhpáhuvvá, ovdamearkkadihte jus fáhkka šaddá molsut muhtun stáhtaráđi, jus Gonagasvissui lea ođđa olmmoš riegádan, dahje eará erenoamáš dilit.
Badjel bealli stáhtaráđi lahtuin fertejit leat čoahkkimis mielde vai ráđis lea mearridanváldi.
Truvdnoárbbolaš
Lagamus truvdnoárbbolaš sáhttá searvat stáhtaráđđečoahkkimiidda go lea deavdán 18 jagi- muhto sus ii leat jienastanváldi ii ge ovddasvástádus.Muhto jus Gonagas lea buohcci dahje olgoriikamátkkis, de jođiha Ruvdnaprinsa Stáhtaráđi Ruvdnaprinsaregeantan.
Hui hárve oktavuođain, go sihke Gonagas ja Ruvdnaprinsa leaba eret, de lágiduvvo Stáhtaráđđi Stáhtaministara kántuvrras. Gonagas oažžu dasto dieđuid mearrádusaid birra nuppes go Stáhtaráđđi čoahkkana Šlohttii.
Čoahkkima čađaheapmi
Go diibmu lahkonišgoahtá 11:00, de boahtá stáhtaministtar oktan ministaraiiguin Šlohttii. Sii čoahkkanit Ministtarsaloŋgii ovdal go fárrolaga mannet Stáhtaráđđesálii. Gonagas boahtá maŋimus, vejolaččat lea Ruvdnaprinsa mielde, ja son de dearvvaha juohkehačča.
Go buohkat leat čoahkkanan, de čohkkába Gonagas ja Ruvdnaprinsa beavdegeažis. Stáhtaráđđečálli čohkká nuppi beavdegeažis, Norgga lágat vel das ovddabealde su. Stáhtaministtar čohkkeda sadjái Gonagasa gurut bealde, ja eará ministarat gávdnet sajiideaset virgejagiid ja rolla mielde. Dasto jearrá Gonagas vurrolagaid juohke ministaris ahte leago sus ášši ovdanbuktit.
Stáhtaráđđesála: Dáiddalaš čiŋaheapmi
"Gonagasa beavdi" ráhkaduvvui 1800-logu loahpageahčen ja lea máŋgii stuoriduvvon go ministariid lohku lea lassánan. Go koronapandemiija bođii Norgii jagis 2020, de stuoridedje Šloahta viessogálvosnihkkárat fas beavddi, nu ahte stáhtaráđđečoahkkimiid sáhtii čađahit oadjebas njoammuneastadangaskkain ministariid gaskkas.
Beavddi bajábealde heaŋgá stuora dáhkkečuovga. Dasa lea gollejuvvon bustávaiguin čállojuvvon "Riika galgá huksejuvvot lága mielde". Sánit leat vižžojuvvon ovtta Norgga boarráseamos lágain, Frostatinglágas, mii čállojuvvui sullii jagis 1260.
Seinniin leat golbma stuora njuohtama mat govvidit dehálaš historjjálaš dáhpáhusaid Norggas ja Gonagasviesu historjjás: Gonagas Haakon lávke gáddái Norgga Gonagassan skábmamánu 25. beaivvi 1905, Gonagas Haakon vuordnu váli Stuorradikkis skábmamánu 27. beaivvi 1905, ja Gonagasbearraša máhccan ruoktot maŋŋel nuppi máilmmisoađi, geassemánu 7.beaivvi 1947.
Mearrádusat mat gusket Gonagassii ja Stáhtaráđđái gávdnojit Vuođđolága B-kapihttalis.