Árbenortetvuorru
Norgga truvnnu maŋisboahtti-ortnetvuorru lea lineára. Dát mearkkaša ahte dušše son guhte lea gonagasa dahje ráđđejeaddji dronnega mánná, dahje muhtima mánná geas alddis lea árbenvuoigatvuohta, sáhttá árbet truvnnu.
Njuolggolinjjá manná eanet gáidan linjjá ovdalii, ja boarráset mánát leat ovddabealde nuorat mánáid. Dát lea mearriduvvon Vuođđolága 6. paragráfas.
Miessemánu 29. beaivvi 1990:s rievdadii Stuorradiggi Vuođđolága nu ahte boarráseamos mánná — beroškeahttá sohkabealis — manná ovddemusas maŋisboahtti-ortnetvuorus. Muhto lágas čuožžu maiddái ahte sidjiide geat leat riegádan ovdal go dát rievdadus bođii fápmui, guoská baicca dat boares njuolggadus ahte almmáiolbmot galget ovdalii nissonolbmuid. Dát dagahii ahte Ruvdnaprinsa Haakon bisui vuosttažin truvdnui, ja dan maŋŋá bođii su nieida Prinseassa Ingrid Alexandra.
Golbma buolvva
Vuođđolágas čuožžu maiddái ahte go riegáda prinsa dahje prinseassa geas lea árbenvuoigatvuohta truvdnui, de galgá namma ja riegádanáigi dieđihuvvot Stuorradiggái.
Vuođđoláhka § 6
Vuođđolága § 6 čuodjá ná
Árbbolaččat leat njuolggo sogamaŋisboahttit, nu ahte dušše dat Dronnega dahje Gonagasa mánát geat leat riegádan lobalaš náittusdilis, dahje geat leat su mánát geas alddis lea árbenriekti, sáhttet árbet, ja lagas linnjá manná ovddabeallái gáidan linnjá ja boarraseappot ovddabeallái nuorabuid.
Árbbolaččaid gaskii rehkenastojuvvo maid riegákeahtes mánná, mii dálán boahtá iežas sadjái árbelinnjás, go son riegáda máilbmái.
Árbenriekti ii leat ovttasge earás go sus gii lea riegádan maŋemus ráđđejeaddji Dronnega dahje Gonagasa njuolggo maŋisboahttin dahje su Oappá dahje Vielja máŋisboahtti, dahje gii ieš lea su Oabbá dahje Viellja.
Go riegáda Prinseassa dahje Prinsa geas lea árbenriekti Norgga Ruvdnui, galgá su namma ja riegádanáigi almmuhuvvot ovddemustá Stuoradiggái ja čállojuvvot dan Protokollii.
Sidjiide geat leat riegádan ovdal Jagi 1971, guoská dát Vuođđolága § 6 nugo dat mearriduvvui Skábmamánu 18. beaivvi 1905. Sidjiide geat leat riegádan ovdal Jagi 1990 guoská aŋkke dat ahte Bárdni manná ovddabeallái Nieidda.