Allaáiggálaš audiensa
Majestehta Gonagas vuostáiváldá buot ođđa ambassadevrraid geat galget iežaset riikka ovddastit Norggas, allaáiggálaš audienassas.
Ambassadevra lea iežas stáhtaoaivámuša sáttatolmmoš ja lea ožžon bargun ovddastit riikka. Go ođđa ambassadevra boahtá Norgii, de Majestehta Gonagas vuostáiváldá su formálalaš audienssas. Ambassadevra boahtá geiget iežas dovddusindahkanreivve – reivve mii ovdanbuktá ambassadevrra ja su doaimma. Easka maŋŋel go reive lea addon,sáhttá ambassadevra doaimmahišgoahtit iežas dehálaš bargguid.
Allaáiggálaš dilálašvuohta
Audiensa lea guovtti riikka deaivvadeapmi ja lea hirbmat allaiggálaš dilálašvuohta. Muhtin Gonagaslaš hoava biillain viežžá ambassadevrra ja hiljit vuodjá Šloahta ovddabeallái gos Majestehta Gonagasa Gardena soalddáhat čužžot ráiddus. Fanfára čuojahuvvo go ambassadevra boahtá.
Maŋŋel go lea vuolláičállán guosseprotokolla, de ambassadevra mieđuštuvvo Šloahta bajimus vestibylai gos hoava hoavda sávvá sutnje bures boahtima. Loddelanja duppal uvssat rahppojuvvojit, ja ambassadevra oahpásmuvvá Hoava jođiheddjiide ja adjutántabargiide.
Go de áigi dievvá, manná Hoava hoavda Gonagasa kantuvrii gos son dieđiha ahte ambassadevra lea boahtán ovdanbuktit iežas dovddusindahkanreivve. Maŋŋel go govvejeaddji lea govven Gonagasa ja ambassadevrra deaivvadeami, de soai joatkiba ságastallama almmá ahte oktage eará lea das – jus ii leš dárbu dulkii.
Bohtet miehtá máilmmi
Gonagas Harald vuostáiváldá ambassadevrraid miehtá máilmmi iežas kantuvrii - dábálaččat gaskal 25 ja 35 jahkásaččat.
Jagis 2024 bohte 24 ođđa ambassadevrra ovdanbuktit iežaset dovddusindahkanreivve. Sii bohte dáin riikkain: Mongolia, Kenya, Jamaica, Burundi, Ruošša, Botswana, Albania, Surinam, Ghana, Nederlánda, Brasila, Estteeana, Espánjja, Lulli-Korea, Saudi-Arabia, Mauritania, Thaieana, Costa Rica, Ruoŧŧa, Argentina, Zambia, Oman, Qatar ja Egypt.
Dasa lassin válddii Ruvdnaprinsaregenta vuostá golbma ambassadevrra go Gonagas lei buohcci. Sii bohte Armenias, Japánas ja Mexicos.
Bovdehusat diplomáhtalaš korpsii
Lea árbevierrun Gonagasbárrii bovdet ođđa diplomahttajoavkkuid virggálaš beaiveborramuššii Šloahtas. Ambassadevrrat sáhttet maiddái boahtit nu gohčoduvvon heaitinaudiensii go sin doaibmaáigodat lea loahpahuvvon. Olles diplomáhtalaš korpsa bovdejuvvo maiddái jeavddalaččat mállásiidda dahje vuostáiváldimiidda Šloahtas, Oscarshallas dahje Gonagasskiipa Norggas.
Eará audieanssat
Gonagas vuostáiváldá guossástalli stáhtaoaivámuččaid ja parlameantapresideanttaid, muhtumin leat mielde vel eará Gonagasviesu lahtut. Lea maid árbevierrun ahte dán jagáš Nobel ráfibálkkašumi ja Abel bálkkašumi vuoitit bohtet audienssii.
Sátni «audiensa» boahtá latiinnagiela sánis «gullat» ja mearkkaša «vejolašvuohta beassat gullot».
Gonagaslaččat vuostáiváldet jahkásaččat olu olbmuid audienssas. Sii bohtet ovdamearkkadihte go áigot čilget soames ášši, muitalit makkár doaimmat leat organisašuvnnas mas Gonagasbearaš lea suodjaleaddji, dahje soitet boahtit giitit dan ovddas go leat ožžon ortnega dahje medálja.
Gonagasas leat maid fásta audienssat stáhtaministariin, olgoriikaministariin ja Suodjalusa iešguđet suorggi ovddasteddjiiguin.
Audiensa mearkkaša «vejolašvuohta beassat gullot»
