Gonagasskiipa Norge
Norgga álbmot attii Gonagasskiippa Norge skeaŋkan Gonagas Haakonii VII, go vuos lei čađahuvvon riikkaviidosaš ruhtačoagginákšuvdna 1947:s. Skiippa oamasta Majestehta Gonagas, muhto lea Mearrasuodjalus mii dan jođiha. Go Gonagas lea K/S Norge skiippas, de libarda Gonagasleavga badjin skiippa maŋŋestivllis.
Gonagasskiippa borjjastanplána rievdá jagis jahkái. Geasseáigodat bistá dábálaččat miessemánu gaskkamuttus gitta loahpageahčái čakčamánu. Majestehta Gonagas mearkkašahttá ieš geasi álgima go loaiddasta Gonagaskiipii Norgii ja čađaha inspekšuvnna, ja mearkkašahttá maid geasi nohkama go čađaha inspekšuvnna ja vuolgá eret skiippas.
Gonagasskiippa historjá
Kongeskipet Norge lea nubbi gonagasskiippain mat vel leat gávdnamis máilmmis, maŋŋá go brihttalaš gonagasskiipa Britannia váldojuvvui eret anus 1997:s. Nubbi lea dánska gonagasskiipa Dannebrog.
Fálaldagas maid Prinsa Carl oaččui Norgga ráđđehusas 1905:s, dalle go jerrojuvvui álgit gonagassan, čállojuvvui maid ahte son galggai oažžut “yachta, ráhkkanahttojuvvon váldit atnui vaikko goas, stáhta rehket ala". Muhto ruđalaš dilli Norggas dakka maŋŋá uniuvnna bieđganeami lei dakkár ahte Gonagas Haakon ii gáibidan sierra skiippa.
Álbmotskeaŋka
Easka maŋŋá 2. máilmmisoađi badjánii fas sierra Gonagasskiippa gažaldat. Aviisačállosiid bokte miehtá riikka ávžžuhuvvui olles riikka searvat addit álbmotskeaŋkka Gonagasa 75-jagi beaivái, namalassii skiippa. Suoidnemánus 1947 ostojuvvui brihttalaš mohtoryacht Philante 1,5 mill. ruvdnui.
Philante
Philante lei brihttalaš yacht, huksejuvvon 1937:s brihttalaš girdifabrihka Thomas Sopwith ovddas. Dan áiggi lei dát mohtoryachta máilmmi stuorámus. Sopwith geavahii skiippa iežas regattafatnasiidda básan, ja 1938:s lei juo Philante norgga mearaid alde vuosttaš geardde – earet eará Hankøregattas. Namma Philante lei ráhkaduvvon oamasteaddji ja su eamida namaid vuođul; Phyllis og Thomas. Phil (mii lea Phyllis oanádus) an(d) T(homas) e(e lasihuvvon dadjama várás).
Eskorteskiipa
Go 2. máilmmisoahti buollái de rekvirerii brihttalaš mearrasuodjalus "Philante". Vuosttaš jagiid geavahuvvui fanas eskorteskiipan Atlánterábi konvoiaide, ja dasto 1942 rájes sirdojuvvui dat konvoieskorte bálvalussii hárjehallanskiipan. 1946:s doaimmahuvvui skiipa ruovttoluotta oamasteaddjái Thomas Sopwith ja jagi maŋŋá dat vuvdojuvvui Norgii.
Skeaŋkka divodeapmi
Gonagas Haakon oaččui skeaŋkan modealla dán skiippas su 75-jagi beaivái, muhto ovdal go Gonagas sáhtii oažžut dán álbmotskeaŋkka, de lei dárbu hukset skiipa earaládje ja ođasmahttit dan. Lei earenoamáš ollu bargu mii čađahuvvui skiippa siskkobealde. Arkiteakta Finn Nilsson lei váldoovddasvástideaddji siskkáldas dávviriid háhkamis. Miessemánu 17. beaivvi 1948 beasai skiipahoavda, kommanderkapteaidna Christian Monsen, geassit bajás kommandovimpela vuosttaš geardde, ja geassemánu 9. beaivvi besse ge addit álbmotskeaŋkka Gonagas Haakonii.
Skiipa gásttašuvvui "Norge".
Kongeskipet
Fakta om Kongeskipet
- Lengde: 80,2 meter
- Bredde: 11,6 meter
- Dybde: 4,7 meter
- Bruttotonnasje: 1628 tonn
- Maksimumsfart: 16 knop
- Marsjfart: 14 knop
- Rekkevidde: 6500 nautiske mil
- Hjemmehavn: Oslo
- Kallesignal: LAMA
- Klasse: 1A1 Yacht
- Maskineri: To Bergen Diesel, 1760 hk hver
- Bygget av Camper & Nicholsons Ltd., Gosport, England i 1937
- Innredning: Arkitekt Finn Nilsson
Gonagasskiippa birra
Gonagasskiippa birra
- Guhkkodat: 80,2 mettara
- Govdodat: 11,6 mettara
- Čikŋodat: 4,7 mettara
- Bruttodeaddu: 1628 tonna
- Eanemusleahttu: 16 knop
- Mársaleahttu: 14 knop
- Olahanviidodat: 6500 nautalaš miilla
- Ruovttuhámman: Oslo
- Gohččunsignála: LAMA Klassa: 1A1 Yacht
- Mašiinnat: Guokte Bergen Diesel, 1760 hk goabbáge
- Huksejeaddji: Camper & Nicholsons Ltd., Gosport, Eŋgelánda 1937.
- Arkiteakta Finn Nilsson