Stuora feastasále
Stuora feastasále lea Gonagaslaš Šloahta eanemus čiŋahuvvon latnja. Dat geavahuvvo stuorra vuostáiváldimiidda, mállásiidda ja eará doaluide—ja maiddái daid hárvenaš dilálašvuođain go lágiduvvo bálla Šloahtas.
Buohkat geat vuostáiváldet Gonagasa ánssumedálja, bovdejuvvojit Šlohttii. Medáljavuostáiváldiide ja sin mieđušteddjiide guossohuvvojit herskot Stuora feastasále jorba beavddis,oktan musihkain ja sártniiguin. Jagis 2005 lágiduvvui easkaásahuvvon Fosselogaldallan ja Fossebálkkašumi geigen dáppe. Lea jurddašuvvon ahte galgá šaddat fásta árbevierrun.
Stuora feastasáles leat maiddái eará lágideamit, nugo Afternoon tea gosa bovdejit buollisearaid miehta riika konsearttaide, vuostáiváldimiidda ja gaskabeivviide.
Hábmen ja čiŋaheapmi
Šloahttaarkiteakta Linstow lei ferten čađahit olu seastimiid su álgoálgosaš plánáin Šloahta huksema dáfus, muhto Stuora feastasále oktavuođas son gal ii vuollánan. Son čálii: “ Dán sále hábmema oktavuođas lea munnje leamaš veadjemeahttun ávkkástallat arkitektuvrramálle mainna seastá. De dát latnja ii moktege deavdde gáibádusaid maid galgá”.
Ledje einnostan golahit 12 000 speciedálera dása. Dat lea okta goalmmádasoassi supmis mii lei juolluduvvon ollesnuppi gearddi latnjagálvvuide.
Sále lea 360 njealjehasmehtera stuoru ja lea guovtti gearddis, ja lea 10,7 mehtera alu robi vuolde. Galleriijas, mii birastahttá nuppi gearddi, leat 24 vilges stukkamárbmora stoalppu ja 24 muorrapilára mat leat dego juolgin galleriijai. Ivnnit leat vuosttažettiin vielgat ja golli, čuvgesrukses oasážat seinniin ja gollejuvvon listtut. Rohpi lea čielga alitivnnis ja gollejuvvon násttit leat hearvan. Stuora oassi sále čiŋaheamis lei diŋgojuvvon gárvvisin Berlinas.
Stuora feastasále rohpi
Várut jus dánsestit...
Ornamenttat Stuora feastasále robis eai leat ráhkaduvvon gipssas, muhto baicca assá geađebáhpiris mii lea gollejuvvon. Dat galggai dagahit unnit vára sidjiide geat doppe dánsejedje.
Linstow čálii ahte go olbmot doppe dánsejit ja latnja dasto dego doarggista, de sáhtii leat veahá várálaš sidjiide geat ledje das vuolde. Go dáhkkečikŋa gahččá dan mađe allodagas, de dat lea maid oalle lossat, deattuhii arkiteakta. Ledje dovddus ovdamearkat mot nu lei geavvan. Ornameanttat mat leat dahkkon assá báhpiris seaguhuvvon geađgeduovdagiin fas leat hui geahppasat ja danin eai leatjur nu váralaččat jus gahččet...
Dieđusge biddjui parkeahttaláhtti. Linstow ákkastalai ná: Berlinas ii gávdno eará go parkeahttaláhtti buot dánsenbáikkiin, ja doppe oaivvilduvvo leat oalát veadjemeahttumin dánset láhttis mii lea ráhkaduvvon fielluiguin.
Muhto dát gusto maiddái dagahii vára gussiide. Norggas han eai lean olbmot hárjánan parkehttii, ja daddjo ahte olu guossit njalkkihedje ja gahčče dan njalka láhttis Šloahta vihahangállás jagis 1849.
Vihaheapmi šloahttabállain
Šloahtta vihahuvvui jagis 1849 stuora bállain justefal Stuora feastasáles. Sullii 1200 guossi ledje bovdejuvvon. Maŋŋel leat doppe lágiduvvon olu stuora doalut, nugo gonagaslaš heajat ja muhtun ávvudeamit.
Lihttoloahpaheami čuođi jagi-ávvudeami oktavuođas jagis 2005 bovdiiga Gonagas Harald ja Dronnet Sonja 500 guossi miehtá riikka šloahttabállai, ja 1993:s ávvudeigga silbanáittosbeaivvi bállain Stuorra feastasáles. Gonagas Haakon ja Dronnet Mette-Marit dánssuiga náittosválssa dáppe 2001:s—nu mo Gonagas Olav ja Ruvdnaprinseassa Märtha dagaiga 1929:s, ja Gonagas Harald ja Dronnet Sonja 1968:s.
Muhtumin lea bálla
Maŋemus divodanbarggut Stuora feastasáles gárvánedje 2005:s. Dalle lei rohpi fas ožžon ruovttoluotta álgoálgosaš šerres alitivnni, ja stukkamárbmora stoalpput ledje dárkilit divoduvvon. Eanemus erenoamáš bargu lei sále álgoálgosaš čuovgakruvnnuid rekonstrukšuvdna.
