Hopp til hovedinnhold

Fokus: Falástallan ja olgodoaimmat

Olgoeallin, aktiivvalaš beaivválaš eallin ja falástallan leat dehálaččat Gonagaslaš Allavuođa Ruvdnaprinssa mielas – sihke persovnnalaččat ja maiddái servodatdoaibman.

Ruvdnaprinsa Haakon lea okto sis guhte geavaha daid vejolašvuođaid maid norgga luondu addá olbmuide, sihke falástallamis ja eará olgodoaimmain.  Geasset lea somá geahččaladdat iešguđetlágan čáhcefalástallamiid. Ruvdnaprinsa lea árjjalaš surfet, ja son máhttá maid kiting ja biekka mielde surfet.  Dálvvi áigge son gal áinnas čuoigá.

Ruvdnaprinsa lea máŋgii maid čuoigan Birkebeinerčuoigama – ja lea áinnas ustitlaččat gilvvohallan Danmárkku Gonagaslaš Allavuođaid Ruvdnaprinsa Frederikain.


Ruvdnaprinsa Haakon ja Ruvdnaprinsa Frederik ovdalaš go čuoigáiga 2017 Birkebeinerčuoigama. Govva: Geir Olsen / Birken / NTB Scanpix

Seammaládje go Majestehta Dronnet, juogada Ruvdnaprinsa maid áinnas iežas vásáhusaid go galgá dovddusindahkat Norgga dálvenašuvdnan ja turistaguovlun.

Aktiivvalaš árgabeaivvit

Norggas lea eanas olbmuin vejolašvuohta leahket olgun nu ollu go háliidit. Ruvdnaprinssa mielas lea hui hávski beassat ollu mátkkoštit olgun ja vásihit min ovddolaš luonddu. 2015:s lei son Olgoeallinjagi suodjaleaddji, ja čuovui eatnat lágidemiid miehtá dien jagi.

"Čuoigalehket, vulget váccašit, čierastallat, vulget tealtatuvrii, váriide gizzut, murjet, guollebivdui, guhkes vázzinmátkái – vulget beare makkár tuvrii de ain! Doppe sáhttibehtet ollu vásihit mii bisána eallináigái muitun, dajai Ruvdnaprinsa Haakon dalle go álggahii Olgoeallinjagi 2015.

Olggu ovddas eallin addá buoret eallinkvalitehta ja buoret dearvvašvuođa. Ruvdnaprinsa lea  maid dorjon Dearvvašlaš eallin guovddážiid (Frisklivssentralene) mat veahkehit olbmuid álgit eanet aktiivvalaččat eallit, ja son lei maid mielde Friskliv vázzimis Bygdøyas 2016:s.

Alladási falástallan

Ruvdnaprinsa Haakon lea gehččiid čohkkánsajis čurvon leahtu norgalaš falástalliide ollu gilvvohallamiin, ja lea maid máŋgga oktavuođas leamaš mielde lágideaddjin.

2017  čavčča ja  2018:s lágiduvvo surfing EM Borestrandas  Jærenis.  Ruvdnaprinsa, gii ieš lea viššal surfet, lea mielas miehtan searvat Norgga Borjjastansearvvi surfenlávdegoddái ja EM váldolávdegoddái.

Nuoraid olympiija gilvvohallamiid oktavuođas Lillehammeris 2016:s oaččui Ruvdnaprinsa vejolašvuođa ovttastahttit beroštumiid mat sus leat sihke falástallamii, nuoraide ja eaktodáhtolaš bargguide.  Ruvdnaprinsa lei gilvvohallamiid váldolávdegottis mielde – mii lea Nuoraid -OL stivrra ráđđeaddi orgána –ja son doarjjui earenoamážit eaktodáhtolaš lágidemiide rekrutterema.


Gonagasbearaš tribunas nuoraidgilvvohallamiid rahpandilálašvuođas. Govva: Geir Olsen / NTB Scanpix

 

Sihke Gonagasbárra ja Ruvdnaprinsabárra ledje mielde rahpanseremoniijas, ja Prinseassa Ingrid Alexandra cahkkehii dola – nugo Ruvdnaprinsa ieš dagai Lillehammer OL rahpamis 1994.

Ruvdnaprinsa Haakon lei maid Oslo Čuoigan-VM váldolávdegotti lahttu 2011:s.  Maiddái dalle searvvai son  áŋgirvuođain rekrutterendoaimmaide, ja de earenoamážit doaimmaide main kultuvrralaš girjáivuohta deattuhuvvui.

 

 

06.09.2017

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas
Ruvdnaprinsa Haakon rahpá Olgoeallinjagi 2015 Tøyenpárkkas. Govva: Lise Åserud, NTB Scanpix - Video: Sven Gj. Gjeruldsen, Gonagaslaš hoavva.