Sivdnádallan -ipmilbálvalusas ođđasis

Gonagasbára ollii odne veaigin ávvudanmátkkistis Troandimii, maŋŋel go leat leamaš Romssas ja Budejjus. Gonagas Harald beasai ge de sávvat buresboahtima gieddefestii iežas «troandin ruovttus».

- Troandin lea midjiide hui earenoamáš báiki. Ii dušše munnuide Dronnegiin, muhto olles Norgga monarkiijai, nugo dat áiggiid čađa lea čiekŋalit ruohtasnuvvan. Nidarosduopmogirkus mii duođai dovdat movt historjá boahtá min eallimii, ja gávdná min saji olmmošráiddus ja olles ráidun dáhpáhusain mat oktiibuot dahket min riikka historjjá, dajai Gonagas go sávai olbmuide buresboahtima gieddefestii Stiftsgárdimis.

Feastaipmilbálvalus

Ovdalgaskabeaivvi lei olles Gonagasbearaš čoahkkanan duopmogirkui ávvudanipmilbálvalussii. Dat lei allaáiggálaš ja liekkus ávvuipmilbálvalus mii čuzii Gonagasbára dovdduide – nugo sivdnádallanipmilbálvalus dagai dalle 25 jagi dás ovdal.

Sártnistis maid Gonagas Harald doalai veaigin, giittii son buriid vásáhusaid ovddas ja muittašii ávvubeaivvi mii lei 25 jagi dás ovdal, mii su mielas lea sudnuide addán nu buori álggu go vejolaš sudno gonagasdoibmii.

Ipmilbálvalus Nidarosduopmogirkus doalvvui munno maŋos áiggis, jahkái 1991, muitalii Gonagas.
- Geassemánu 23. beaivi 25 jagi dás ovdal lea stuorámus beaivi munno eallimiin. Lei nu dovdduide čuohcci dáhpáhus dalle, ahte buohkat min bearrašis leimmet veaháš olggobealde iežamet go bođiimet duopmogirkus olggos ja oinniimet olmmošeatnatvuođa mii doppe lei min vuordimin. (...)

- Sihke seremoniija iešalddis ja mátkki mii dan maŋŋel čuovui, attii munnuide buoremus álggu maid juo livččiimet sáhttán oažžut iežamet doibmii. In goassege vajáldahte dan go vulggiimet Troandima gáttis fávlái. Go Ravnkloa kájás vulggiimet ja oinniimet olmmošeatnatvuođa ja leavggaid njozet báhcimin jávkkohahkii, de orui easka ollisvuohta badjáneamen munnje. Ahte dál, dál de álgá dát doaibmá.

Álge Ravnkloas

Stiftsgárdima gieddefeasta lei maŋemus oassi dán ávvudanbeaivvis, mas lei nu viiddis sisdoallu. Doalut álge iđđesbeaivvi diibmu 10.00 "álbmot iđitborramušain" Ravnkloas. Doppe doalai sátnejođiheaddji Rita Otervik sártni, Aydan ja Jassá čuojaheigga musihka, ja sii besse oaidnit mánáiddáidaga ja dasa lassin besse vel njálgga borramuša máistet earet eará Fiskehallenis.

Beaivvi dáhpáhusat loahpahuvvojedje gieddefeasttain Stiftsgárdimis, mii lea Gonagasbearraša almmolaš orrungárdin Troandimis. Doppe ledje sihke stuoradiggepresideanta Olemic Thommesen, stáhtaministtar Erna Solberg ja alimusrievttijustitiarius Toril Marie Øie – ja vel 600 eará bovdejuvvon guossi.

Nuoraidpolitihkar Muzaffer Kara doalai sártni, Marit Johanne Nielsen ja pianočuojaheaddji Kyrre Havdal ovdanbuvttiiga opera, ja NTNU jazzmusihkkárat ja Troandin katedrála skuvlla dánsejeaddjit maid guoimmuhedje.

Gonagasbárra lea dál gaskkamuttus geasi ávvudanmátkkis. Eahkes vulget sii viidáseappot lulás mearragátti. Boahtte bisánanbáiki lea Bergen, gosa sii jovdet lávvordaga geassemánu 25. beaivvi.