Sámi dáidda DáiddaStáljas

Čájáhusas leat birrasii 50 dáiddalaš barggu. Dat rahppojuvvo guovvamánu 8.beaivvi 2019 ja lea rabas miehtá giđa ja geasi.

1970-logu rájes oažžugohte dáiddára dađistaga dehálit rolla sámi identitehta hábmemis.

Pioneara Iver Jåks (Norga) ovttastahtii sámi giehtaduodjeárbevieru -duoji – ja su konseptuála jurdagiid iežas installašuvnnain. Máze-joavku álggahuvvui 1978:s ja speadjalasttii dan áiggi politihkalaš dili. Guovtti dáiddára barggut dien joavkkus čájehuvvojit DáiddaStáljas: Synnøve Persen ja Britta Marakatt-Labba (Ruoŧŧa).

Marakatt-Labba monumentála bargu, 24 mehter guhku tekstiiladuodji Historjá, galgá leat okta guovddáš elemeanttain čájáhusas. Rátnu lea ráhkaduvvon muitalussan – mii lea sámi myhtalaš universa, mas leat referánssat sámi historjái ja beaivválaš eallimii. Dán dáiddalaš barggu leat luoikkahan Romssa Universitehtas - Norgga árktalaš universitehtas.

Synnøve Persen oaččui Davviriikkalaš Ráđi gidnibálkkašumi 2018, iežas dáiddalaš barggu ovddas sihke našuvnnalaččat ja internašuvnnalaččat, ja go lea bargan loktet sámi dáidaga, giela ja identitehta. Su barggut čájehuvvojit Dronnet Sonja DáiddaStáljas filmmain Bassi eatnamat/Hellige landskap.

Nuorat buolvva ovddastit earet eará dáiddárat Marja Helander (Suopma) iežas Govvaráidduin, mas govvida dálá sámi servodagaid, ja Joar Nango (Norga) su installašuvnnain maid lea ráhkadan earenoamážit dán čájáhussii.

Kurateren

Čájáhusa lea lágidan ja ordnen dr.philos. Knut Ljøgodt (Davvinorgga Dáiddamusea ovdalaš direktevra, dál Nordic Institute of Art), ovttasbarggus dáiddahistorihkkáriin Nina Høye (Gonagaslaš hoavva). Prošeavtta dáiddafágalaš ráđis lea mielde dáiddárat Synnøve Persen ja Inger Blix Kvammen, ja maiddái kuratora Charis Gullickson (Davvinorgga Dáiddamusea ja UiT – Norgga árktalaš universitehta).