Sámi čájáhus Dáiddastáljas
- Sápmi lea álo nu ovddolaš! Majestehta Dronnet sávai buresboahtima ovdal go Sámedikki presideanta Aili Keskitalo rabai dan stuora sámi dáiddačájáhusa DáiddaStáljas duorastateahket.
Guovvamánu 7. beaivi 2019
- Sávan ahte dáinna čájáhusain beassat gaskkustit oasi sámi dáidagis ja kultuvrras, maid álo lea ovddošan, loga Majestehta Dronnet iežas buresboahtinsártnis. Sus ledje maid máŋga buori muittu guossástallanmátkkiin Sámis.
Rahpansártni doalai Sámediggepresideanta Aili Keskitalo. Dáidda cuvke rájiid – nu dahká maid dát čájáhus, čujuhii son. Dat cuvke rájiid sihke dáiddahámiid, riikkarájiid ja buolvvaid hárrái. Čájáhusas oaidnit golmma buolvva sámi dáiddáriid bargguid. Das leat dáiddaduojit Norggas, Ruoŧas ja Suomas, ja ovddastit máŋga iešguđetlágan dáiddalaš bargguid.
Sihke maleriijat ja govat, grafihkka ja tekstiiladáidda, video, skulptuvrrat ja installašuvnnat lea čohkkejuvvon DáiddaStálljii. Soaitá dá leat sierra sámi dáiddaviesu álgu, sávai Keskitalo, danin go sámi dáidagis ii leat gostege ruoktu dál.
Mii lea sámi dáidda?
Dáiddár Synnøve Persen, guhte maid lei mielde čájáhusa fágalaš ráđis, divui dien gažaldaga iežas sáhkavuorus – ja sávai ahte eat goassege diesa oččoše loahpalaš vástádusa. Lea dáiddalašvuođa rolla jearrat ja hástalit. Dat ii galgga sirrejuvvot ja biddjojuvvot hiŋgaliidda.
Dát čájáhus lea gudnin sámi dáidagii ja dáiddáriidda, deattuhii váldokurator Knut Ljøgodt. Dat ii geahččal defineret, muhto čájehit viidodaga ja girjáivuođa.
