Prinsa konfirmerejuvvon

Girkobiellut čudje go Gonagabearaš bođii girkui. Dasto čuvvo konfirmánttat, sin searvvis maiddái Prinsa Sverre Magnus, Jan Garbarek "The creek" čáppa nuohtaide. Searvegoddi čuoččahii dearvvahit konfirmánttaid ja čužžo vuosttaš sálmma lávlludettiin, "Deg å få skode".

Seremoniija

Suohkanbáhppa Karoline Astrup, kapellána Marita Elvemo Sivertsen ja searvegotti pedagoga Liv-Iren Westnes jođihedje ipmilbálvalusa. Maiddái Norgga girku jođiheaddji, Olav Fykse Tveit čuovui ipmilbálvalusa.

Kapellána Marita Elvemo Sivertsen doalai beaivvi sártni. Son logai teavstta Lukas 15, bártni birra guhte máhcai gáhtamiin ruoktot fas go lei skihtardan buot iežas árbbi, ja su áhčči bijai almmatge gieđaid su čeabet birra ja sávai sutnje buresboahtima. Juohkehaš ferte gávdnat su iežas geainnu, ja buohkat meddet, deattuhii kapellána. De leage buorre diehtit ahte álo leat muhtumat geat hálidit midjiide dušše buori ja ahte álo gávdnojit geainnut ruovttu guvlui.

Son loahpahii muhtun sániiguin Sigrid lávlagis "Home to you", maid Beate Løvås Solem lávllui dakka maŋŋelaš.

Searvegoddi rohkadalai konfirmánttaid ovddas ovdalgo suohkanbáhppa Astrup bivddii sin boahtit áltarii:

- Ráhkis konfirmánttat. Risttalaš oskui lehpet dii gásttašuvvon. Risttalaš ohppui lehpet dii oahpahuvvon. Loaiddastehket dál ovdan Hearrá áltarii, vai mii beassat juohkehačča ovddas rohkadallat Jesusa nammii.

Konfirmašuvdnaipmilbálvalus loahpahuvvui sálmmain "Deg være ære", ja de čuvvo liturgat konfirmánttaid girkus olggos. Norgga girku jođiheaddji čuovui Gonagasbearraša Asker girkus olggos.
Bearaš doalai priváhta konfirmašuvndnadoaluid Skaugumis eahkes.

Prinsa konfirmerejuvvui ovttas ovcciin eará konfirmánttain. Dan joavkkus leat eanet konfirmánttat, muhto koronadávdda dihte lágiduvvojit ollu smávit konfirmašuvdnadoalut dan sadjái go stuora seremoniija ovttas buohkaiguin. Juohke konfirmánta beasai ieš válljet guhttanuppelohkái guossi seremoniijai.