Mogao - báktelanjain
Jus muhtun báiki galgá sáhttit čállojuvvot máilmmi kulturárbelistui, de ferte dat deavdit ovtta guđa eavttuin. Mogao- báktelanjat devdet buot guhtta eavttu. Odne oaččui Gonagasbárra vejolašvuođa fitnat geahččamin dien earenoamáš báikki.
Golggotmánu 13. beaivi 2018
Majestehtaguovttos Gonagas ja Dronnet leaba dál guossin Dunhuangas Gansu provinssas davvi - oarje Kinas. Dat gávpot lea boares kulturhistorjjálaš gávpot mii okte lei dehálaš bisánanbáiki Silkegeainnu gávppašeddjiide ja pilgrimaide. Das deaivvadedje nuorta ja oarjemátkkálaččaid impulssat. Dat ledje India, Eurohpá, Guovddáš-Asia, Iran ja Mongolia mátkkálaččat.
Oanehaš mátkki olggobealde gávpoga leat Mogao- báktelanjat. Das lea áiggiid čađa ollu buolvvat muŋkkat ja pilgrimat ráhkadan máilmmi stuorámus buddhismmalaš dáiddačoakkáldaga mas leat dáidá, skulptuvrrat ja arkitektuvra, sullii 1 000 jagi áigodagas, 300-logu rájes. Doppe leat suodjalan 492 báktelanja ja 1987:s biddjojuvvo diet báktelanjat UNESCO máilmmiárbelistui.
Gonagasbárra beasai oaidnit máŋga báktelanja odne, earet eará dan maid gohčodit «girjerájuslatnjan», gos leat gávdnat hui ollu teavsttaid mat leat čállojuvvon gaskal jagiid 600 ja 1200. Teavsttaid vuođul sáhttá ovddolaččat guorahallat kiinnálaš ja guovddáš-Asia historjjá.
Guoddevaš turisma
Sáttomeahcis leat Mogao- báktelanjat ceavzán sihke sáttostoarpmain ja garra dálkkiid siste badjel 1 500 jagi. Muhto dál lea boahtán ođđa hástalus: dađistaga lassáneaddji mátkkálaččat geat hálidit oaidnit ja návddašit dien báikki.
Turisma lea dehálaš ealáhus Dunhuangas, muhto lea dárbu gávdnat balánssa nu ahte nagoda seammás vára váldit daid stuora kultuvrralaš árvvuin mat leat diein báktelanjaid. Danin leat čađahuvvon ollu doaimmat maid ulbmil lea gozihit turistarávnnji ja oanidit geahččanáiggi báktelanjaid siste.
Dunhuang Academy lea bidjan ollu návccaid báktelanjaid digitaliseremii, nu ahte šaddet olahanmuddui sihke kiinnálaš ja olles máilmmi olbmuide – sihke govvan, video ja virtual reality bokte neahtas.
Viidáseappot Beijingii
Eske veaigin guđii Gonagasbárra Gansu-provinssa ja vulggiiga mátkkoštit viidáseappot oaivegávpogii, Beijingii. Doppe sávve kiinnálaš eiseválddiid ovddasteaddjit sudnuide almmolaš buresboahtima.
Kiinnálaš gudnigarde čuoččui ráidun go Gonagasbárra bođii Beijingii. Govva: Heiko Junge, NTB Scanpix
Mánnodat iđit joatká almmolaš prográmma ja sisdoallun lea buresbirgejumi ovddideapmi ja dálvefalástallan.
Kina 2018
Majestehtaguovttos Gonagas ja Dronnet leigga stáhtaguossástallamis Kinas golggotmánu 11.- 19. beivviid, stuorámus norgga delegašuvnna njunušin mii goassege leamaš. Dás sáhtát govaiguin čuovvut dien mátkki.
Čájeha 8 oktiibuot 79