Buresbirgejupmi ja falástallanillu

Kina bargá ollu dan badjelii ahte oažžut iežas álbmoga geafivuođas eret, ja dasa leat gidden fuomášumi eará báikkiin. Eske iđđes álggaheigga Majestehtaguovttos Gonagas ja Dronnet iežaska prográmma Kina servodatfágalaš dutkanakademiijas CASS – gos buresbirgejumi ovddideapmi lei beaivvi fáttá.

Gonagas Harald rabai vuosttaš – norgga-kiinnálaš symposia servodatfágasuorggis, man duogábealde leat CASS ja NUPI – Norgga olgoriikapolitihkalaš instituhtta. Symposia galgá leat bissovaš dáhpáhus mii galgá gieđahallat ON internašuvnnalaš guoddevašvuođa ulbmiliid, masa jahkásaččat válljejuvvojit fáttát.

Gonagas čujuhii dasa man dehálaš buresbirgejeaddji stáhta ovddideapmi lea leamaš Norggas. Son deattuhii maid servodatdieđalaš dutkama rolla, man dehálaš dat lea leamaš ja ain lea dán barggus. Dan rolla son deattuhii earenoamážiid sála studeanttaide ja dutkiide:

- I would like to remind all of you who are students and researchers of how important it is to think independently, to work in teams, and to gain cross-cultural understanding. You all have the potential to make a real difference, to help build an even better future for the coming generations.

Juvlasabehiiguin Olympiapárkkas

Beijinga Olympiapárka huksejuvvui 2008 geassegilvvuide. Dál leat bárrahis ráhkkaneamen 2022 dálvegilvvuide mat galget lágiduvvot dáppe. Kiinnálaš eiseválddit sávvet eanebuid searvat dálvefalástallamiidda, ja dál áigot ge soahpat álggahit stuorát norgga-kiinnálaš ovttasbarggu olympiija gilvvuid rádjái.

Diet ovttasbargu čalmmustahttojuvvui odne juvlasabehiiguin ja falástallaniluin olggobealde dovddus «Loddebeassi» arenas.

Birrasii čuođi kiinnálaš máná besse geahččalit čuoigat juvlasabehiiguin, ja buorit veahkit sidjiide ledje Norgga falástallansearvvi bagadallit. Kiinnálaš ja norgalaš čuoigit besse maid čájehit iežaset dáiddalašvuođa. Ja olles diet dilálašvuohta loahpahuvvui stafeahtain, gos sihke norgalaš ja kiinnálaš oasseváldit ledje stafeahttajoavkkuin.

Dálvefalástallan lei maid fáddán otná lunššas, man guossoheaddji lei Kina falástallanministtar, Gou Zhongwen.

Ustitvuođamállásat

Odne eahkes, báikkálaš áiggi mielde, leigga Gonagas Harald ja Dronnet Sonja stuora norgalaš-kiinnálaš delegašuvnna ustitvuođamállásiid guossoheaddjit. Mállásiin ledje 300 guossi geain lea ollu mearkkašupmi min guovtti riikka ovttasbarggus, masa gullet suorggit nugo politihkka ja servodateallin, ealáhusat, akademiija, falástallan, kultuvra ja media.

Eahkeda lágideapmi lei hábmejuvvon kultuvrralaš ja biepmuid deaivvadeapmin, man oktasašnamahus lei áhpi. Šattai hui muitinveara eahket gos ledje sihke kiinnálaš ja norgalaš kulturovdanbuktimat. Guossit besse iluin deaivvadit nuorra falástalliiguin Thai Chi ja Kungfu, ja dasa lassin guoimmuhedje vel lávlut ja musihkkárat.

Dronnet Sonja sávai gussiige buresboahtima, ja son beasai iluin maid sávvat baryton čuojaheaddjái Liao Changyongii buresboahtima – guhte vuittii Dronnet Sonja Internašuvnnalaš Musihkkagilvvu 1997:s.