Integreren ja dialoga
Báhtareddjiid integreren ja guovlluid gaskasaš ovttasbargu lei dehálaš fáddán Majestehtaguovtto Gonagasa ja Dronnega otná prográmmas. Gonagas Harald rámidii iežas otná sártnis Jordana barggu olahit dialoga.
Njukčamánu 3. beaivi 2020
Jordanii leat hui ollu báhtareaddjit bisánan, eandalii sii geat bohtet Syrias, ja sii leat geatnegahttán addit buot mánáide riikkas oahppofálaldaga. Nu eatnat go 134 000 Syria máná vázzet skuvlla Jordanis. Norga addá ekonomalaš veahki, ja doarju guokte prošeavtta mat leat Norgga Spábbačiekčanlihtu (NFF) doaimmat. Ulbmil lea integreret mánáid falástallama bokte.
Spábbačiekčamiin integreret
Salt gávpogis, 30 kilomehtera oarjjabealde Amman, lea nieiddažiid skuvla Nusaibah bint Ka'ab. Ollu skuvllain Jordanis lea sihke beaivin ja veaigin oahpahus: iđđes bohtet Jordana mánát skuvlii. Veaigin divvet fas luohkkálanjat – de bohtet Syria mánát. Muhto dán skuvllas vázzet Jordana ja Syria mánát ovttas. Dat lea ge okta dain skuvllain gosa leat ráhkadan spábbačiekčanšilju NFF prošeavtta doarjagiin.
Odne finaiga Gonagas Harald ja Dronnet Sonja dien skuvllas.
Gonagasbárra beasai gullat movt Jordan integrere hui ollu Syria mánáid skuvllain, ja movt Norgga ja Jordana spábbačiekčanlihtut ovttasbarget. Spábbačiekčan lea buorre gaskaoapmi integrerenbarggus, go Syria ja Jordana mánát besset čiekčat spáppa ovttas ja stoahkat – ja dat lea maid dásseárvui gaskaoapmi. Ulbmil lea nannet nieiddažiid ja nissonolbmuid searvama servodahkii spábbačiekčama bokte.
Ja dasto lei spábbačiekčan. Gonagas ja Dronnet beasaiga oaidnit Norgga ja Jordana riikkačikčiid čiekčamin goappáge joavkkus, main ledje Syria ja Jordan nieiddažat seahkesearválaga ustitvuođačiekčamis.
Biibbalbáikkiin
Jordanis ja Gonagas Abdullah II lea earenoamáš rolla hálddašit risttalaš ja muslima bassivuođaid Jerusalemis. Gávdnojit maid dehálaš bassi báikkit Jordanis, ja okta dain lea Jesusa gástabáiki. Gonagas Harald ja Dronnet Sonja beasaiga fitnat dien bassibáikkis odne, ovttas Jordana Gonagasbárain ja Prinssain Ghazi bin Muhammad.
Báiki Jordaneatnogáttis lea dohkkehuvvon dat báikin gos Gásttašeaddji Johannes gásttašii Kristusa. Dát lea diehttelas hui guovddážis risttalaš gástaárbevierus, ja dat leamaš dehálaš pilegrimabáikin juo 2 000 jagi.
Gonagas Harald lea ieš gásttašuvvon Jordaneanu čáziin, Norgga gonagasbearraša árbevieru mielde.
Evangelalaš – luhteránalaš girku
Gonagasbárra oaččui maid vejolašvuođa fitnat Bethany Evangelalaš – luhteránalaš girkus. Dat lea okta čieža girkus iešguđet oskkusuorggis mii lea huksejuvvon dan báikái maŋŋá go Majestehta Gonagas Abdullah mearridii báikki dien ulbmilii.
Gonagas Harald ja Dronnet Sonja beasaiga gullat makkár ovttasbargu ja dialoga lea gaskal risttalaš ja muslima jođiheddjiid, ja iešguđet oskkuservodagaid ovddasteaddjit lohke teavsttaid Biibbalis ja Koranas.
Girkus leat ovcci Håkon Gullvåg maleriija čikŋan, ja norgga dáiddár muitalii ieš odne iežas bargguid birra. Váldomotiiva áltártávvalis lea lunddolaččat gástascena.
Israela ja ránnjáriikkaid soađit čuhce garrasit dan guvlui gosa girkut leat ceggejuvvon. Dohko ledje ovdamearkkadihte bidjan badjel 6 500 miinna. Norsk folkehjelp veahkehii miinnaid čorgenbargguin, ja 2012:s oassálasttii Ruvdnaprinsa Haakon seremoniijai mii čalmmustahtii ahte buot miinnat Jordanis ledje čorgejuvvon eret. Evangelalaš – luhteránalaš girku huksejuvvui 2013.
Dialogaseminára
Girkus oaidná Jordaneanu gitta Jerikoi Oarjeravddas ja – šerres beaivvi – gitta Jerusalemii. Hui stuora oassi Jordana ássiin leat palestinalaččat, ja riikii čuhcet ge Palestina ja Israela riiddut.
Norggas ja Jordanis lea goappašagain stuora beroštupmi oažžut johtui multilaterála ovttasbarggu, čoavdin dihtii daid ollu hástalusaid mat máilmmis lea dál.
Eske veaigin čuovui Gonagas Harald "Preserving Spaces for Dialogue" dialogaseminára loahpaheami. Lei Ráfidutkaninstituhtta mii dan lágidii ovttas Jordana Centre for Strategic Studies, ja doppe digaštalle makkár rollat Norggas ja Jordanis sáhttet leat, ja makkár ovttasbargan vejolašvuođat livčče.
Gonagas sártnui semináras ja rámidii Jordana barggu oččodit dialoga ja ovttasbarggu. Son čujuhii earenoamážit dasa movt Jordan lea nákcen vuostáiváldit nu ollu báhtareddjiid,movt lea ásahan arena ekonomalaš ovttasbargui ja ovddideapmái ja ohcan guovllu riidduide čovdosiid.
Ustitvuođamállásat
Eahkes leaba Gonagas Harald ja Dronnet Sonja Norgga ja Jordan ustitvuođamállásiid guossoheaddjit. Dohko čoahkkanit politihka, hálddahusaid, ealáhusaid, dutkiid, kultuvra-ja organisašuvnnaid ovddasteaddjit.
Stáhtaguossástallan loahpahuvvo ihttin, de sii fitnet máilmmidovddus dološgávpogis Petra.
