Čeavlái sámi kultuvrrain
– Mii sáhttit buohkat čevllohallat dainna go nanu sámi kultuvra lea oassin min riikkas, min oktasaš historjjás ja min dálááiggis. Eallit ovttas bures ja gudnejahttimiin vaikko leat erohusat, lea okta deháleamos olahusain maid sáhttit geahččalit čađahit – sihke smávit searvevuođain Norggas ja máilmmis muđui, dajai Prinseassa Ingrid Alexandra sártnistis Kárášjogas su vuosttaš almmolaš galledeami oktavuođas Finnmárkkus.
2026 ođđajagemánnu 26
Gonagaslaš Allavuohta Prinseassa Ingrid Alexandra bođii Leavnnja girdišilljui Banakii sotnabeaivve maŋŋelgaskabeaivve, ja moadde diimmu maŋŋel lei son gearggus vuoddját guđa miilla guhkkosaš skohtermátkái Jergul Astu duottarstobusduoddarii Davit Cáskinjohtsuorggis Sámmolašbeaskas, Sara boazodoallobearraša guođohanbartii.
Maŋŋel go lei humadan Sara bearrašiin ja idjadan sin goađis, de beasai Prinseassa vuolgit ealu lusa ovdal go jorgalii fas Jergulii mánnodat ovdalgaskabeaivve.
Galledeapmi Kárášjogas
Kárášjoga skuvllas ledje buot oahppit sihke mánáidskuvla- ja nuoraidskuvladásis vuordime, ja maiddái Kárášjoga joatkkaskuvlla oahppit ja Kárášjoga mánáidgárddiin ledje boahtán. Prinseassa gulai luođi “Rápmi Kárášjohkii” maid 9A-luohkká ovdanbuvttii, ja «Beaivváš vuoibmi» maid luohkká 8A ovdanbuvttii, ovdal go ohppiidráđi jođiheaddjit 5. luohkás gitta 10. luohkkái ofelaste su skuvllas, ja dan maŋŋel galledii son guokte luohká skuvllas.
Seamma maŋŋelgaskabeaivve beasai Prinseassa Ingrid Alexandra vásihit Sámedikki. Maŋŋil ofelastima dievasčoahkkinsáles deaivvadii Prinseassa vuos Sámedikki joavkojođiheddjiiguin, ovdal go oahpai eambbo Sámedikki doaimmaid birra Sámedikki dievasčoahkkinjođiheaddjis Sandra Márjá Westas, Sámedikki presideanttas Silje Karine Muotkas, sin direktevrras Inger Marit Eira-Åhrénas ja Sámedikki nuoraidlávdegottis.
Sámediggi lea sámi álbmoga álbmotválljejuvvon parlameanta Norggas ja lea sorjjasmeahttun álbmotválljejuvvon orgána. Sámediggi galgá nannet sámi álbmoga politihkalaš sajádaga ja ovddidit sámi álbmoga beroštumiid Norggas, ja maiddái váikkuhit ovttaárvosaš ja vuoiggalaš gieđahallamii sámi álbmoga ektui. Vuosttaš Sámedikki rabai Gonagas Olav V golggotmánu 9. beaivvi 1989:s.
