Sárdni Kárášjoga skuvllas

Stáhtahálddašeaddji,
Sátnejođiheaddji,
Ráhkis buohkat,

Ollu giitu dán liekkus vuostáiváldimis dáppe Kárášjoga skuvllas. Mun lean illudan boahtit din guossái.

Áddiibehtet go maid dadjen? Mun duođai sávan dan- go mun lean hárjehallan olu! Mu mielas lea hui somá leat dáppe fárrolaga diiguin- lea go dis buorre dilli? Loaktibehtet go skuvllas? Mun illudan galledit soapmásiid din luohkkálanjain dás maŋŋelaš.

Dáppe Kárášjogas leat dis ollu buorit bealit maid galgá váldit vára. Dis lea luondu. Dis leat valáštallanjoavkkut, aktivitehtajoavkkut ja searvvit mat čađahit ollu gelddolaš doaimmaid, ja fargga oažžubehtet áibbas ođđa skuvlla.
Dis lea sihke sámi ja dáčča kultuvra mat ellet bálddalaga fárrolaga. Dis lea Sámediggi, man mun galledan maŋŋelaš odne – ja man áhčči ja áddjá galledeaba juohke njealját jagi virggálaš rahpama oktavuođas.

Muhto lea vel juoga mii soaitá leat buot deháleamos: Dii lehpet dás ovttas. Lea dat maid mii ovttas bargat ja maid mii ovttas hábmet, mii šaddá dan servodahkan mas mii eallit min árgabeaivvi. Doppe gos buohkat galget loaktit ja eallit bures.

Juste dál lean mun studeantan Sydneys Austrálias, lean ruovttus geasseluomus. Juste dál leat doppe 25 lieggaceahki, nu ahte temperatuvrraerohus lea oalle
stuoris. Muhto vaikko Australia ja Norgga gaskkas leat ollu erohusat, de mis leat maid ollu seammaláganvuođat. Earret eará leat goappašat riikkain álgoálbmotálbmogat. Álgoálbmogiin miehtá máilmmi leat ollu ovttaláganvuođat. Ja dađibahábut leat sii historjjálaččat vásihan olu váivviid.

Mun sávan ja jáhkán ahte mii dáppe Norggas leat joavdan oalle guhkás, ja giitosat daidda roahkkadis olbmuide geat min ovdal leat vázzán, rahčan ja láhčán geainnu. Lean duođaid hirpmástuvvan go oainnán mot sámi nuorat odne jotket áŋgiruššamiin – sihke kultuvrii, lundui ja gillii.

Mii sáhttit buohkat leat čeavlái dainna go nanu sámi kultuvra lea oassin min riikkas, min oktasaš historjjás ja min dálááiggis. Searválaga eallit buori eallima ja gudnejahttit earáid vaikko leat erohusat, lea okta dain deháleamos áššiin maid mii sáhttit geahččalit olahit – sihke smávva servodagain, Norggas ja máilmmis.

Mun sávan didjiide buot buori, ja sávan ahte joatkibehtet válit vára nubbi nuppis.

Giitu mu ovddas.