Norgga ruvdnaprinseassa

Gonagaslaš Allavuohta Ruvdnaprinseassa Ingrid Alexandra lea vuosttažin Norgga truvnnu árbenráiddus. Ruvdnaprinseassa lohká dál servodatfágaid, muhto čađaha maiddái almmolaš doaimmaid Gonagasviesu ovddas.

Ođđajagimánu 21. beaivvi 2022 olahii Ruvdnaprinseassa Ingrid Alexandra válddálašvuođabeaivvi, ja dan beaivvi oktavuođas oaččui son sierra kantuvrra Gonagaslaš šloahtas. Lagamus jagiid lea dattege su deháleamos doaibma bidjat návccaid oahpu čađaheapmái.

2025 čavčča álggahii Ruvdnaprinseassa servodatfága oahpahusa Sydney universitehtas, muhto dállea son lonohallanstudeanta Servodatdiehtaga fakultehtas Oslo universitehtas.

Almmolaš doaimmat

Go Gonagas Harald V jámii borgemánu 28. beaivvi 2026, de šattai ovddeš Ruvdnaprinsabárra riikka ođđa Gonagas ja Dronnet, ja Prinseassa Ingrid Alexandra šattai Norgga Ruvdnaprinseassan. Son sáhttá searvat stáhtaráđđái iežas áhči, Gonagas Haakona,mielde ja doaibmat regeantan jus Gonagas lea buohcame dahje mátkkošta olgoriikkas.

Válli Vuođđoláhkii

Čakčamánu 1. beaivvi 2026—maŋŋel go Gonagas Haakon VIII lei vurdnon váli Vuođđoláhkii Stuorradikkis – de vuolláičálii Ruvdnaprinseassa Ingrid Alexandra iežas váli:

“Mun lohpidan ja vuortnun ovddastit ráđđehusa vuođđolága ja lágaid mielde, nu ahte veahket mu Ipmil, buotveagalaš ja buotdiehtti!»

Ruvdnoárbbolačča válli čuožžu Vuođđolága § 44 ja lea eaktun doaibmat regeantan go Gonagas lea eret, ja ovdamearkka dihte jođihit stáhtaráđi.

Vuolláičállojuvvon váli dolvo Stuorradiggái gos hoava hoavda geigii dán stuorradiggepresidentii.

Ruvdnaprinseassa Ingrid Alexandra lea juo čađahan olu virggálaš doaimmaid. Cuoŋománus 2025 son lei mielde vuosttaš geardde virggálaš prográmmas stáhtaguossástallama oktavuoŋđas. Lei Islándda presideantabárra geat galledeigga Norgga.

Cuoŋománus 2025 oassálastii dalá Prinseassa Ingrid Alexandra virggálaš prográmmas stáhtagalledeami oktavuođas. Lei Islándda presideantabárra geat finaiga Norggas. Govven:Ola Vatn, Gonagaslaš hoavva

Dalá Prinseassa Ingrid Alexandra, lei vuosttaš virggálaš galledeamis Finnmárkkus ođđajagimánus 2026. Dasa gulai earret eará galledeapmi Sámedikkis. Govven: Fredrik Varfjell / NTB

Dalá Prinseassa Ingrid Alexandra ja Prinsa Sverre Magnus doarjjuiga dievdduid riikkajoavkku spábbačiekčanmáilmmimeašttirgilvvuin geasset 2026. Dás čuovvuba Norgga čiekčama Senegala vuostá. Govven: Simen Sund / Gonagaslaš hoavva

Juovlamánus 2025 oassálasttiiga Ruvdnaprinsa ja Prinseassa šealggoreavas govllebivdotuvrras dutkanfatnasiin mas lea Prinseassa namma. Govven: Heiko Junge / NTB

Prinseassa lei mielde ovddasteame Norgga go fránska presideantabárra finai virggálaš galledeamis geassemánus 2025. Govva: Stian Lysberg Solum / NTB

Prinseassa Ingrid Alexandra čoagganeamis ovdal juovllaid Šloahttakapeallas 2024. Govven: Heiko Junge / NTB

Mánáid sárgumat ledje vuordime Ruvdnaprinseassa Mette-Marit ja Prinseassa Ingrid Alexandra go galledeigga mánáid- ja nuoraidossodaga Drammen buohcceviesus ovdal juovllaid 2024. Govven: Gorm Kallestad, NTB

Ruvdnaprinseassa Mette-Marit, Prinseassa Ingrid Alexandra ja Ruvdnaprinsa Haakon galledit Riikkabuohcceviesu juovlaruohta 2022. Govven: Terje Bendiksby / NTB

Militearabálvalus

2024 álggahii dalá Prinseassa Ingrid Alexandra vuosttasgearddebálvalusa Brigade Nord Inšenevrabataljovnnas. Menig Alexandra bálvalii Skjold leairras Siskkit- Tromssas gos lei inšenevrasoalddát ja lei bálvalussajádat báhččin CV90 STING-vovnnas. Prinseassa luobai bálvalusas cuoŋománu 4.beaivve 2025.

Menig Alexandra lei inšenevrasoalddát Skjold leairras. Ovttas kompaniijain bálvalii son oktiibuot 15 mánu. Govven: Simen Sund, Gonagaslaš hoavva.

Vuosttaš doaimmat

Ruvdnaprinseassa Ingrid Alexandra berošta birasgáhttemis ja dálkkádagas, ja juste dát ledje ge fáddán dalá Prinseassa vuosttaš almmolaš doaimmas, earret miessemánu 17.beaivvi ja Holmenkollen čuoiganfestivála: Ovttas Ruvdnaprinseassain dearvvahii son Birasageantaparáda (Miljøagentparade) Šloahttašiljus, Máilmmi birasbeaivvi oktavuođas jagis 2009.

Vuosttaš iešheanalaš doaibma

Jagis 2015 lei dalá Prinseassas vuosttaš iešheanalaš doaibma go gásttašii Gádjunsearvvi ođđa fatnasa "Elias". Jagis 2016 son cahkkehii dola nuoraid olympiagilvvuid rahpanseremoniijas Lillehammeris 13 000 olbmo ovddas, ja skábmamánus 2018gásttašii son Norgga ođđa dutkanfatnasa, FF Kronprins Haakon.

Čuovvola árbevieruid

Gonagasbearraša árbevierru dearvvahit mánáidtoga Šloahttabalkoŋggas álggahuvvui juo jagis 1906. Ruvdnaprinseassa Ingrid Alexandra lea viđat buolva balkoŋggas ja lei doppe juo iežas vuosttaš miessemánu 17.beaivvi-ávvudeamis.

Ruvdnaprinseassa ja Prinseassa Ingrid Alexandra váldiiba vuostá Birasageantaparáda Šloahttašiljus 2009:s. Govven: Lise Åserud, NTB

Prinseassa Ingrid Alexandra gásttašii gádjunfatnasa "Elias" miessemánu 4. beaivve 2015. Govven: Terje Pedersen, NTB

Prinseassa cahkkehii dola nuoraid olympiagilvvuid rahpamis Lillehammeris jagis 2016. Govven: Geir Olsen / NTB

Prinseassa Ingrid Alexandra gásttaša dutkanfatnasa «Kronprins Haakon» jagis 2018. Govven: Rune Kongsro/Gonagaslaš hoavva

Juohke jagi leat Skaugum Arenas šiljočiekčan-meašttirgilvvut – dá jagis 2019. Govven: Lise Åserud, NTB

Sierra skulptuvrapárka

2016 geasi rahppojuvvui Prinseassa Ingrid Alexandra Skulptuvrapárka Šloahttapárkkas. Doppe leat mánáid skulptuvrrat – maid mánát ieža leat ráhkadan. Juohke jagi gitta 2019 rádjái leat skulptuvrrat lassánan dohko, ja dalá Prinseassa lea ieš leamaš mielde válljeme evttohusain maid skuvlamánát miehtá riikka leat sádden.

Prinseassa Ingrid Alexandra lei ieš ofelažžan skulptuvrapárkkas go Gonagaslaš Allavuođat Prinsa William ja Hertuginna Kate galledeigga Norgga 2018:s.