Njuike váldosisdollui

Fokus: Girjjálašvuohta

Gonagaslaš Allavuohta Ruvdnaprinseassa lea viššalis lohkki geas lea stuora beroštupmi girjjiide. Son hálida earáiguin juogadit iežas lohkanilu ja nie viiddidit buori girjjálašvuođa – dainna nana jáhkuin ahte juohkehačča várás gávdno girji.

Jagi mielde galgá Ruvdnaprinseassa Mette-Marit čuovvut ollu girjjálaš lágidemiid, mat leat hui iešguđetláganat: Sáhttá leat lohkanboddu mánáide Šloahttašiljus dahje Oscarhállas, girjjálaš festiválat dahje girjerájus guossástallamat. Ruvdnaprinseassa geahččala maid láhčit dili čoahkkimiidda norgga girjjálašvuođa birra go lea almmolaš guossástallamiin olgoriikkain.

"In sáhte govahallat makkár eallin livččii girjjiid haga. Unnivuođa rájes juo leat munnje lohkan, ja lean beassan mannat jurddamáilmmi lanjaide. Lohkan ja siskkáldas govat maid dat addá, dovddut maid dat boktá – lea dahkan mun buoret, jierbmát ja eanet jurddašeaddji olmmožin."

Norgga girjjálašvuođa ambassadevra

Cuoŋománu 26. beaivvi 2017 álggii Ruvdnaprinseassa norgga girjjálašvuođa ambassadevran olgoriikkain. Norga galgá leat guosseriika máilmmi deháleamos girjemeassuin Frankfurt Book Fair 2019. Ruvdnaprinseassa áigu searvat guovddáš doaluide guosseriikaprošeavtta oktavuođas. Norgga girjjálašvuođa ovddidanrolla lea máilmmiviidosaš ja dat doaibma bistá viidábut go Frankfurt 2019. Norgga girjjálašvuohta birge bures olgoriikkain, ja Ruvdnaprinseassa hálida leat veahkkin nannemin dan vel eanet.

Ruvdnaprinseassa lohká André Bjerke oassin NRK poesiijamaratonas "Løgn og forbannet dikt". Govva: NRK

Girjjálaštoga

Liikká lea Ruvdnaprinseassa girjjálašvuođa áŋggirdeamis okta lágideapmi mas lea earenoamáš sadji: Girjjálaštoga

Maŋemus jagiid lea Ruvdnaprinseassa mátkkoštan girjjálaš togamátkkiin. NSB ja Deichmanske girjerájus Oslos leat veahkehan su. Toga ii čuovo NSB ruvttuáiggiid, ja lassin Gonagasvovdnii, geassá toga maid vovnna mas lea kafea, čohkkánvovnna ja ii unnimustá Girjerájusvovnna. Dat lea earenoamážit ráhkaduvvon togavovdna mas leat Deichmann girjjit, ja maiddái oassi Ruvdnaprinseassa iežas girjjiin. Go toga bisána vuordit muhtun báikkálaš stašuvdnii, de lea dat dábálaččat rabas sidjiide geat hálidit gáfegohpu dahje girjji maid sáhttet lohkat.

Ruvdnaprinseassa Girjjálaštoga girherájusvivnnas. Govva: Lise Åserud / NTB scanpix

Mátkki vuolde láhčá Ruvdnaprinseassa dili girjjálaš deaivvademiide, gos girječállit ja álbmot sáhttet deaivvadit. Dábálaččat leat diet deaivvadeamit báikkálaš girjerádjosiin, muhto maiddái girjjálašvuođa viesuin ja stašuvdnabáikkiin leat leamaš diekkár ovddolaš čoahkkimat. 

Budejjus Stjørdalii

Vuosttaš togamátkki čuovui Nordlandsbanen – Budejjus Stjørdalii – 2014:s.

Kronprinsessa ånnetji Lidteratuvretåågen våaromen bïjre soptseste. Guvvie: Gånkan hoffe

Dat lei Ruvdnaprinseassa persovnnalaš girjemátki, gos son muitalii iežas favorihtaid ja iežas lohkanvásáhusaid birra.

Dien vuosttaš girjjálaštogas ledje iešguđetlágan fáttát: Fauskes lei mánáidgirjjálašvuohta ja Rognanis nuoraidgirjjálašvuohta. Ráhkisvuohta girjjálašvuođas lei fáddán go Girjjálaštoga ollii Mo i Ranai – mii lea várra dat fáddá man birra buot eanemusat lea čállojuvvon. Mussiris lei sámi girjjálašvuohta guovddážis, ja Ruvdnaprinseassa Mette-Marit gesii ovdan Nils Aslak Valkeapää, gii sutnje lea ollu mearkkašan. Snoasas lei sáhka tabuáššiid birra, ja girjjálaš favorihtat juogaduvvojedje Steinkjeras. Stjørdal lei mátkki loahppa dalle, ja doppe lei ieš Shakespeare fáddán. 

Troandimis Hamarii

2015:s vujii toga Troandimis Hamarii – ja bisánii dáin báikkiin: Oppdal, Ringebu ja Lillehammer. Vuosttaš Girjjálaštogas juogadii Ruvdnaprinseassa iežas lohkanvásáhusaid. Dán háve gullui girječálliid iežaset jietna, ja sii serve ságastallamiidda sihke lohkkiin ja girjjálašvuođa ráhkadeaddjin. Fáddán lei identitehta,  fáddá mii leamaš norgga girjjálašvuođas maŋemus jagiid. Logadettiin sáhttá olmmoš lahkonit sihke iežas ja earáid eallimii.

Girječállit Tore Renberg ja Harald Rosenløw Eeg mátkkošteigga Ruvdnaprinseassain fárrolaga Girjjálaštogas 2015. Govva: Heiko Junge / NTB scanpix

Mátkkoštettiin ságastallojuvvui fáttá birra iešguđet geahččanguovllus: iešbiografiija geavaheapmi girjjálašvuođas, maid girjjiid dahket minguin lohkkiiguin, girjjálašvuohta ja ruohttasat, mo girječállit ráhkadit iežaset girjeolbmuid – ja mo mii presenteret iežamet sosiála mediain.

Girjjálaštoga joavddai Lillehammerii dan beaivvi go Sigrid Undset- beaivvit – Norgga Girjjálašfestivála – álggahuvvui. Ruvdnaprinseassa doalai rahpansártni ja finai muhtun festiválalávuin ja lágidii iežas girjelávguma.

Bergensbanen

Girjjálašvuođas deaivvadit mii dávjá olbmuiguin leat juogaládje leat veaháš olggobealde, ja 2016:s lei ge olggobeallái šaddan fáddán Girjjálaštogas. Buohkat dovdet duollet dálle ahte leat olggobeallái šaddan. Dan eat dovdda dušše mii – girjjálašvuohta čájeha ahte ollu earáin lea seammalágan dilli go mis. Mátkeguoibmin ledje Ruvdnaprinseassas girječállit geat leat čállán teavsttaid mat gusket olggobeallái šaddamii. Son guhte lohká ii leat goassege okto. Juohkehažžii gávdno girji.

Ruvdnaprinseassa álggahii ságastallama gaskal Geir Gulliksen ja Lars Saabye Christensen Hønefoss girjerádjosis. Govva: Lise Åserud / NTB scanpix

Dien jagi ledje togas mielde ollu Det Norske Teatret neavttárat, geat čájehedje lávddis girječálliid teavsttaid.

#Mu girji

Girjjálaštoga váikkuha dasa ahte máŋggas juogadit girjerávvagiid ja lohkanilu sosiála mediain Mu girji/Minbok vuolde. Leaŋkalisttus gávnnat ávžžuhusaid.

 

28.05.2018

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas