Gonagaslaš heajat 2001

Gonagaslaš allavuohta Ruvdnaprinsa Haakon ja dalá Mette-Marit Tjessem Høiby náitaleigga Oslo duopmogirkus borgemánu 25, beaivve 2001. Norga oaččui ođđa ruvdnaprinseassa.

Šloahta ovdašillju. Govva: Cornelius Poppe, NTB

Ruvdnaprinssa Haakona ja Mette-Marit Tjessem Høiby lohpádallan almmuhuvvui juovlamánu 1. beaivve 2000. Diibmu 17.00 borgemánu 25. beaivvi čuovvovaš jagi, ledje heajat.

Vihaheapmi

Badjel 800 headjaguossi ledje čoahkkanan Oslo duopmogirkui. Boahttevaš ruvdnaprinsabárra vácciiga fárrolaga girkoláhtti mielde Nils Henrik Aasheima headjašuoŋa čuojadettiin ja čohkkedeigga girku ovddemužžii.

Linda Tånevik lei Ruvdnaprinseassa náittosvihtán ja Dánmárkku dalá Ruvdnaprinsa Fredrik lei ges Ruvdnaprinssa Haakona vihtán. Marius Borg Høiby lei maid náittosbára mielde headjabártnážin, lassin Betina ja Emilie Swanstrøm, Kamilla ja Anniken Bjørnøy ja Tuva Høiby geat ledje headjanieiddažat.

Seremoniija

Bisma Gunnar Stålsett doaimmahii vihaheami ja sárdnidii ráhkisvuođa birra Paulusa vuosttaš girjji korintalaččaide vuođul: Dál bissot dát golbma: osku, doaivu ja ráhkisvuohta. Muhto stuorimus dain lea ráhkisvuohta.

-Odne leat dát dudno, dát čáppa sánit Biibbalis. Dat muitalit makkár guvlui galgabeahtti vázzit dudno ovttaseallimis, eallin man osku, doaivva ja ráhkisvuohta guddet, dajai bisma.

Musihkka vihaheami oktavuođas

Čuovvovaš musihkka čuojahuvvui vihaheami oktavuođas:

Brudemarsj. Komponista: Nils Henrik Aasheim
Versikkel for kor og orgel. Komponista: Trond Kverno
Mitt hjerte alltid vanker. Lávllui Mari Boine
Herre over alle slekter. Teaksta: Roald Fangen. Nuohtta: Terje Kvam
Olggosváccidettiin: Gamal bruremarsj fra Nord-gudbrandsdal. Ovdanbuvttii ja saksofovdnii lágiduvvon: Jan Garbarek, orgelii lágiduvvon: Kåre Nordstoga

Dronnet ja Ruvdnaprinsa stelleba luvrra ovdal gállámállásiid. Govven: Lise Åserud / NTB

Vihačuvla

Vihačuvla lea ráhkaduvvon assás silkecrêpas ja dipmá silketyllaávdnasis, báidnojuvvon ecru. Seakkáža birra lea ávnnas dego beaitta, muhto olggumusas lea ávnnas fanahallon nu ahte šaddá measta áibbas jalgadin.Vuolpu gallju vitnjut ja das lea guokte mehter guhkosaš luvra mii gessojuvvo, ja dát lea Dronnet Maudčuvllaid muitun. Oktiibuot leat čuvllas 125 mehtera silketyllaávnnas. Čuvlla vuolit oassi lea ráhkaduvvon silkegeorgettas, organzas ja gazarain, ávnnas mii lea stirddas, muhto seammás geabbil.. Stuora sisvuolpu ráhkaduvvon tyllas dagaha čuvlii lassi voluma.

Guhtta mehter guhkkosaš luvra lei darvvihuvvon Ruvdnaprinseassa vuovttaide. Diadema man Ruvdnaprinseassa geavahii lea 1910 rájes, ja dat lei skeaŋkka Gonagas Haraldis ja Dronnet Sonjas.

Vihavitku lieđit ledje ráhkaduvvon guhkedáleš hámis giehtamáddaga birra.Dás ledje čuovvovaš lieđit: márbmorlanterne, wandaorkidé, hortensia ja ruvssut guvgesrukses ja sáhppesalit ivnniin, lassin helmmuide ja metállaárppuide.

Feastamállásat

Feastamállásiin Šloahtas ledje buot Eurohpá gonagasviesuin boahtán ovddasteaddjit, lassin almmolaš Norgga ovddasteddjiide, organisašuvnnaide, bearrašii ja ustibiidda. Seammás lágiduvvojedje maid feastamállásat Oslo Militære Samfundas.